රහසක් අහලා

විපක්ෂයෙ ප්‍රධාන දේශපාලන පක්ෂයකට සම්බන්ධ මන්ත්‍රීන් තුන් හතර දෙනෙක් පසුගියදා හොර රහසේම පොහොට්ටුවෙ ලොක්කෙක් හමුවුණාලු... ඒ පක්ෂ මාරුවකට නම් නෙවෙයි දේශපාලන ක්ෂේත්‍රයට අදාළ රහසක් දැනගන්නලු... 

ඉතින් මේ පිරිස පොහොට්ටු ලොක්කගෙන් අහල තිබෙන්නේ සංවේදී දේශපාලන ප්‍රශ්නයක් බවත් අපට ආරංචියි. එයාල අහපු ප්‍රශ්නය වුණේ රටේ දැන් ඉන්න ලොකු තැනට ඉදිරි මහ පුටු ඡන්දෙදි පොහොට්ටු කස්ටිය සහාය දෙනවද කියලයි.
මේ ප්‍රශ්නයෙන් පුදුමයට පත්වුණු පොහොට්ටු ලොක්ක ඇහුව අපි කාට සහාය දුන්නත් ඔයාලට මොකද කියල...
ඊටපස්සෙ එයාල ඇත්ත කතාව කිව්වලු..

''අපිටත් රටේ ලොකු මහත්තයගෙන් ආරාධනා පිට ආරාධනා ලැබෙනව එහාට එන්න කියල. ඉතින් අපිට යන්න කලින් දැනගන්න ඕනෙ වුණේ ඉදිරි ඡන්දෙදි ඔබතුමාල රටේ ලොකු මහත්තයට සහාය දෙනවද කියලයි. මොකද ඔබතුමාලගෙ සහාය නැතුව එතුමාට සටනක් දෙන්න අමාරු බව පේනව''... කියල විපක්ෂ මන්ත්‍රී පිරිස පොහොට්ටු ලොක්කට කිව්ව.
ඊටපස්සෙ පොහොට්ටු ලොක්ක කිව්වෙ මෙහෙමයි. ''අපි තවම තීන්දු කරල නැහැ සහාය දෙනවද නැත්ද කියල. ඒ හින්ද ඔබතුමාල හිතල බලල කරන දෙයක් කරන්න'' කියලයි...