විස්තර ප්‍රචාරක ඇමැති
ගිය සුමානෙ ගාල්ල පැත්තෙ ඇතිවුණ උණුසුම නිවන්න කොළඹින් ඇමැති කස්ටිය ගණනාවක් ගාල්ලට ගියා. මෙහෙම ගිය ඇමැතිවරු අතරෙ සමහරු උත්සාහ කළේ ප්‍රශ්නය ගැන කතා කරන ගමන්ම තමන්ට මේ වැඩෙන් වැඩි පබ්ලිසිටියක් ගන්නලු.
රටේ වෙළෙඳාම භාරව ඉන්න පුත්තලම් පැත්තෙ මහත්තයත් තමන්ගෙ මිනිස්සුන්ට වෙච්ච හානිය බලන්න මෙහෙම ගිය කෙනෙක්...
ඒත් උන්නැහේ ගාල්ලට බහිනකොට අවාසනාවට වගේ මාධ්‍ය කස්ටිය එතන හිටියෙ නැහැ... ඉතින් මේ ගැන වෙළෙඳ ලොක්කට හරි අප්සෙට්... ඒත් එතුමා තමන්ගෙ වැඩේ කරගන්න ක්‍රමයක් හොයාගත්තලු...
ඒ අනුව එතුමා කරපු සංචාරය ගැන වීඩියෝ වාර්තාවක් තමන්ගෙ ජංගම දුරකතනයෙන් ලබාගන්න උන්නැහේ ටක්ගාල තීන්දු කළා. ඇමැති තැන ජනතාවගෙ දුක බලන හැටි මොබයිල් ෆෝන් එකෙන් වීඩියෝ කිරීම තමන් එක්ක ගියපු ගෝලයකුට භාර දුන්න... ඉතින් ගෝලයට කිව්ව විදියට සිද්ධිය වීඩියෝ කළත් ඒ ගැන විස්තර වාර්තාවක් වීඩියෝවට ඇතුළත් කරන්න ගෝලයට බැරිවෙලා...
විස්තරේ නැතුව වීඩියෝව විතරක් වැඩක් නැති නිසා ඇමැතිතුමා අප්සෙට් ගියා... ඒත් ඔය අතරෙ උන්නැහේට ගණදෙවි නුවණක් පහළ වුණා. ඒ අනුව ගෝලය සිද්ධිය වීඩියෝ කරද්දි විස්තර ප්‍රචාරය කිරීම ඇමැතිතුමාම භාරගත්ත...
ඒ විදියට ඇමැතිතැන ගාල්ලෙ ජනදුක නිවන විදිය ගැන වීඩියෝ වාර්තාවක් ටක්ගාල හරිගස්සපු උන්නැහේ ඒක ෆේස්බුක් මගින් ප්‍රචාරය වෙන්නත් සැලැස්සුව.
උන්නැහේලගෙ මේ දක්ෂකම් රටේ හැම පොදුජන වැඩකදිම පාවිච්චි කරනව නම් කොච්චර හොඳද කියල ඒක දැකපු අපට හිතුණා.
