මල්ට මලලු
අත පාටියෙ දෙගොල්ල එකට ඡන්දෙ කොරන්න ගත්ත උත්සාහයක් සේරම කඩාකප්පල් කළේ පොහොට්ටු විපක්ෂයේ ඉන්න දෙතුන් දෙනෙක්ය කියල එක කතාවයි.
මේ චෝදනාව එල්ල වුණ අය අතරෙ ගිරුවායෙ මල් මන්ත්‍රී තැනත් හිටිය. ඉතින් ඒ ගැන බොහොම හිත් අමාරු කරගත් වයඹ පැත්තෙ සෙල්ලං ඇමැති තැන එකතුව වළක්වන අයට ප්‍රසිද්ධියෙම දොස් පරොස් කියන්න පටන් ගත්ත.
මේ අල්ල පනල්ලෙ දවසක් දියවන්නා කවුන්සිලේ කොරිඩෝවකදි මල්ට - සෙල්ලං හම්බවුණා...
ඔන්න ඒ පාර සෙල්ලම් මහත්තය ආයෙම තමන්ගෙ මාතෘකාව ඇදල ගත්ත...
ඔයාල ඇයි මේ එකතුවට විරුද්ධ - සෙල්ලං - මල් ගෙන් ඇහුව. “ඔව් මම විරුද්ධයි... අපිට ගහල ගහල කරන්න පුළුවන් දේවල් සේරම කරනකොට ඔයාලට මේ එකතුවීම ගැන මතක් වුණේ එහෙම නැත්ද? මල් සෙල්ලංගෙන් ඇහුව.
ඒ පාර සෙල්ලං මහත්තය එකතුවේ අගය පහදා දෙන දේසනයක් කරන්න ලෑස්තිවුණා. එතකොට තවත් කේන්ති ගත්ත මල් මන්තිරි තැන අනේ අයියේ අරව... කතා කරන්නෙ නැතුව අපි වෙන වැඩක් බලාගනිමු... කියල යන්න ගියා.