අපේ රට ලෝකයට ගෙනගිය වෛද්‍යවරයෙක්
- සෙත්සුව ආයුර්වේද රෝහලේ කළමනාකාර අධ්‍යක්ෂ ආයුර්වේද වෛද්‍ය සුජීව ප්‍රසන්න විතානගේ
ආයුර්වේදයට පෙම් කළත් ඔහුගේ ප්‍රේමයේ දිශානතින් නෙක ඉසව් කරා විහිද පවතී. සොබාදහමට ප්‍රේමණීය වූ ඒ ආයුර්වේද වෛද්‍යවරයා කලාවට, ගීතයට සේම සිනමාවටද පෙම් බැඳි ප්‍රේමවන්තයෙකි. මානවීය ප්‍රේමයකින් සකල මිනිස් සංහතියට සහකම්පන හැඟුම් සමුදායකින් ආදරය කරන සොඳුරු මිනිසෙකි. ඒ සියල්ල තුළ ඔහු නිර්මාණශීලී චින්තකයෙකි. ඒ චින්තනය ආයුර්වේද වෛද්‍ය විද්‍යාව තුළ නව නිෂ්පාදන රැසක් ලොවට දායාද කරන්නට තරම් ප්‍රබල වීම සැබැවින්ම සම්මානනීය වෙයි. වෙසෙසින්ම ප්‍රශංසනීය වෙයි.
ආයුර්වේද වෛද්‍ය සුජීවගේ ගුරු හාමුදුරුවන් වන්නේ වග ඥානාලෝක යතිවරයාණන් වහන්සේය. කොළඹ විශ්වවිද්‍යාලයෙන් ආයුර්වේද වෛද්‍ය විද්‍යාව ප්‍රගුණ කළ වෛද්‍ය සුජීව සරසවි සමයේ විප්ලවීය චින්තකයකු ලෙස දැක්වූ ශිෂ්‍ය දේශපාලනමය ක්‍රියාකාරීත්වය තුළින් උපන් ජවය අද ඔහු විශ්වීය වටිනාකමක් ඇති ආයුර්වේද වෛද්‍යවරයකු සහ ආයුර්වේද නිෂ්පාදන රැසක හිමිකරුවකු බවට පත් කිරීම දක්වා ප්‍රබල පිටිවහලක් වූ බවට සැක නැත.
වග ඥානාලෝක යතිවරයාණන් වහන්සේගේ ප්‍රාණජීව තෛලය පෙරටු කරගත් වෙදකමේ ශක්තිමත් දෙවැනි පුරුක වූයේ වෛද්‍ය සුජීවය. ඔහුගේ ජීවිතය නිතැතින්ම සොබාදහමත් සමඟ ඒකාත්මික වන්නේ සොබාදහමේ ඖෂධ පැළෑටි, මල් ඵලවලින් තොර ආයුර්වේදයක් භාරත දේශයේ හෝ අන් කිසිම තැනක නොතිබුණු නිසා යැයි මට සිතේ.
සුවිශේෂීම කාරණාවක් වන්නේ ආයුර්වේද නිෂ්පාදනයක් ලෙස ඇමෙරිකානු වෙළෙඳපොළේ FBA ලියාපදිංචිය යටතේ බෙදාහරින්නට හිමිකම් ලද ශ්‍රී ලංකාවේ එකම ආයුර්වේද නිෂ්පාදනය වන්නේද ප්‍රාණජීව තෛලයයි. යුරෝපයේ ඇතැම් රටවලටත්, ඉතාලිය, කැනඩාව, ඔස්ට්‍රේලියාව, ජපානය, මැලේසියාව වැනි රටවල්වලටත් සෙත්සුව රෝහලේ නිෂ්පාදනය කරන වෛද්‍ය සුජීවගේ නිෂ්පාදන උදෙසා පවතින්නේ ඉහළම ඉල්ලුමකි. රටට ඩොලර් අවැසි මොහොතක ඩොලර් උල්පත් සාදන නිෂ්පාදන ලෝකයටම මුදාහරිමින් ජන්මලාභය ලද භූමිය වෙනුවෙන් තම පුරවැසි යුතුකම ඉටු කරන වෛද්‍ය සුජීවගේ මෙහෙවර සැබැවින්ම ප්‍රශංසනීයව අගය කළ යුතුමය. ආයුර්වේදීය නිෂ්පාදන හැත්තෑවකට ආසන්න සංඛ්‍යාවක් නිෂ්පාදනය කරමින් තවද තවත් නිෂ්පාදන පිළිබඳව අත්හදා බැලීම් කරමින් තවත් ලෙසකින් මෙම ආයුර්වේද වෛද්‍යවරයා ඉටු කරන්නේ නිරෝගී සුව සම්පතින් සපිරි මිනිස් වගක් ලෝකයට දායාද කරනු උදෙසා අප්‍රමාණ මෙහෙවරකි.
වග ඥානාලෝක යතිවරයාණන් වහන්සේ ඔබට දුන්න අවවාද අනුශාසනාවලට අද දවසේ ආයුර්වේද නිෂ්පාදන රැසක් ලොවට තිළිණ කරන ව්‍යාපාරිකයෙක් ලෙස ඔබ ගරු කරන්නේ කොහොමද?
මගේ ගුරු හාමුදුරුවන්ට මම සදාතනිකව ණයගැතියි. උන්වහන්සේ ළඟ ඉතාමත් කැපකිරීමෙන් අවංකව සේවය කළ නිසා තමයි ගුරු මුෂ්ටියකින් තොරව උන්වහන්සේ ප්‍රගුණ කළ විද්‍යාව මට දායාද කළේ. උන්වහන්සේ මට කියපු එක දෙයක් තමයි ඖෂධයක් හදද්දි ඊට අවශ්‍ය එක අමුද්‍රව්‍යයක් හෝ අඩු වුණොත් ඒ ඖෂධය හදන්න එපා. එතකොට ඒ ඖෂධයෙන් එන ගුණය එන්නෙ නැහැ. රෝගියෙක් කියන්නෙ අසරණව, පිහිටක් බලාපොරොත්තුවෙන් වෛද්‍යවරයෙක් ළඟට එන කෙනෙක්. ඒ නිසා කවදාවත් රෝගියකුට අංශුමාත්‍රයකවත් වංචාවක් බොරුවක් කරන්න එපා කියන එක උන්වහන්සේ අවධාරණයෙන් දුන් අනුශාසනාවක්. ඒ අනුශාසනාව මම අදටත් පුදුමාකාර භක්තියකින් පිළිගන්නවා.
සෙත්සුව ආයුර්වේද රෝහල් භූමිය පුරා ඇවිදගෙන යද්දී නැහැ පුඩු අතරේ දැවටෙන්නේ ඖෂධීය සුවඳය. ඒ භූමියේ සරන සුළං රුල්ලක පවා දැවටෙමින් එම ඖෂධ සුවඳ හැම අත විහිද යයි. යන්ත්‍රානුසාරයෙන් නිෂ්පාදනය වන බොහෝ ඖෂධවලට අමුද්‍රව්‍ය වන්නේ දේශීය පැළෑටි, ඖෂධ සහ ඖෂධීය වටිනාකමක් ඇති ගොරක, සියඹලා, කහ වැනි අමුද්‍රව්‍යයයි. ඒ සියල්ල ඉතාමත් පිරිසිදු මට්ටමින් ඖෂධ නිෂ්පාදනය සඳහා භාවිත කරන අයුරු අපි සියැසින් දුටුවෙමු. තවද යන්ත්‍රානුසාරයෙන් ඖෂධ නිෂ්පාදනය කරන විට දක්වන ක්‍රමානුකූල පිළිවෙළ සැබැවින්ම ප්‍රසාදජනකය. ඇතැම් නිෂ්පාදනයන්හිදී යකඩ කැබැල්ලක්, ඇණයක් වැනි දෙයක් අංශුමාත්‍රිකව හෝ අමුද්‍රව්‍ය සමඟ මුසු වී තිබුණොත් ඒවා පිරික්සීම සඳහා කාන්දම් භාවිත කිරීම දක්වා සූක්ෂම ක්‍රමවේද ඔස්සේ ඉතාමත් ප්‍රශස්ත සහ ක්‍රමානුකූල, සුපිරිසිදු ලෙස සියලු ඖෂධ නිෂ්පාදනය කරන අයුරු සැබැවින්ම අපූරුය. මෙම නිෂ්පාදනවල ප්‍රමිතිය ඇගයීමට ලක්වූයේ දේශීයව පමණක් නොව, විදේශීයව වීමද අගය කළ යුතුමය.
වෛද්‍ය සුජීව ප්‍රසන්න විතානගේ අමතක කළ නොහැකි මාතෘකාවක් බවට පත්වන තවත් එක් සංසිද්ධියක් වන්නේ කංසා අපනයනය පිළිබඳව ඔහු ඇති කළ ප්‍රබල කථිකාවයි. කංසා යනු ඉතාමත් ඖෂධීය ගුණයෙන් යුත් ශාකයක් වන අතර කංසා ශාකයේ විවිධ කොටස් බටහිර සහ යුරෝපීය රටවල ටොෆි, චොක්ලට්, කිරි ආදී විවිධ නිෂ්පාදන සඳහා ප්‍රධාන අමුද්‍රව්‍ය ලෙස යොදාගනී. ශ්‍රී ලාංකික සාර භූමිය ලෝකයේ ඉහළම වටිනාකම් ඇති කංසා විශේෂ වගා කිරීම සඳහා බෙහෙවින් යෝග්‍ය අතර කංසා අපනයනයෙන් ඩොලර් උල්පත් සාදාගත හැකි මාර්ග පිළිබඳව ගැඹුරින් සහ සහේතුකව කතා කළ වෙනත් කෙනෙක් මතකයට නොඑන තරමට ආයුර්වේද වෛද්‍ය සුජීව විතානගේ ඒ පිළිබඳව නැගූ හඬ ප්‍රබලය.
''මේ රටට ආව සුදු ජාතිකයන් ඉතා සූක්ෂමව අපේ මුදුන් මුල් දෙකක් විනාශ කළා. එකක් අංගම්පොර සටන් කලාව. අනෙක කංසා. ඒ දෙකම තහනම් කළේ ඒ දෙකේම ශක්තිය, ජවය, වටිනාකම ඔවුන් අඳුරගත්ත නිසා. අපේ රටේ කංසා තහනම් කරපු ඔවුන් අද ඔවුන්ගේ රටවල්වල කංසා ආශ්‍රයෙන් දැවැන්ත නිෂ්පාදන වෙළෙඳපොළක් නිර්මාණය කරගෙන තිබෙනවා. කංසා ශාකයේ කොළ ඒ කොළවලින් ගන්නා සාරය ආයුර්වේදීය වෙදකම සඳහා අපි පාවිච්චි කළේ මීට අවුරුදු 3500කට පෙර සිටයි. ලෝක ඉතිහාසය පිරික්සද්දී කංසා කියන්නෙ අවුරුදු 12,000ක් තරම් ඈත ඉතිහාසයක් තුළ සිට මිනිසාගේ යහපත උදෙසා භාවිත කළ ශාකයක්. ලෝකයේ හොඳම ආලේපන වර්ග නිෂ්පාදනයට වගේම අද වෙද්දි රෙදි කර්මාන්තයට, නූල් කර්මාන්තයට, ලණු කර්මාන්තයට, කඩදාසි කර්මාන්තයට වගේ කර්මාන්ත රැසකට කංසා ශාකයේ සාර යොදාගන්නවා. ආයුර්වේදීය වශයෙන් ගත්තාම කංසා ඇට කියන්නෙ හොඳම පෝෂණ අවශ්‍යතාවයක්. ඒ වගේම කංසා කියන්නෙ හොඳම වාජීකරණ උත්ප්‍රේරකයක්. වයසත් එක්ක මිනිසුන් වයසට යා යුතු නැහැ කියන එක මම විශ්වාස කරනවා. මරණයතෙක් හැකි උපරිමයෙන් මිනිසුන්ගේ කායික ශක්තිය, ලිංගික ශක්තිය මෙන්ම තාරුණ්‍ය පවත්වාගෙන යාමට හැකි නම් එය හරි සුන්දර සංසිද්ධියක්. ලෝකයට අවශ්‍ය සියල්ල වෙනස්ව දැකිය හැකි නිර්මාණශීලී මිනිසුන්. කංසා කියන්නෙ ඒ සියල්ල පිරිනමන දෙවියන්ගෙන් ලද ත්‍යාගයක් සේ වටිනා ආයුර්වේදීය ඖෂධයක්. එහෙම පසුබිමක අදටත් අපේ රටේ කංසා වගාව තහනම් වීම කනගාටුවට කාරණයක්. එහෙත් මේ මොහොතේත් කංසා අපනයනයට ඉඩ ලැබෙයි කියන සුබවාදී බලාපොරොත්තුවක් මගේ හිතේ තියෙනවා.'' ඒ වෛද්‍ය සුජීව විතානගේ සුබවාදී දැක්මකින් කළ දිගු කතාවක සමුච්ච අර්ථයයි.
සරු බිමක, හිස් බිමක, තනි බිමක, මුඩු බිමක පැළවුණත් වනස්පතියක් වන්නට ළදලු විදාහල පැළයකට දිනක හැකි වන්නේය. වටිනාම සිද්ධාන්තය වන්නේ පැළවුණු පොළොව නොව, පැළවී මහ ගසක් බවට පරිවර්තනය වීමේ සුබ සිහිනයයි. එක දිගට නිවාඩුවක් නොගෙන, විවේකයක් නොගෙන, නිස්කාංසු සුවයක් නොවිඳ වසර ගණනක් එක දිගට වැඩ කළ මහන්සියක අප්‍රමාණ ප්‍රතිඵල සාරසුබාවට අත්විඳින ආයුර්වේද වෛද්‍ය සුජීව ප්‍රසන්න විතානගේ යනු සරු බිමක පැළවී මහා වනස්පතියක් සේ ඉහළට එසවුණු මහ ගසක්මය.
I සංජීවිකා
සේයාරූ - සුමුදු හේවාපතිරණ
