මුකේෂ් අම්බානි සිය ව්‍යාපාර දරුවන්ට පවරයි
ඉන්දියානු ප්‍රකෝටිපතියෙකු වන මුකේෂ් අම්බානි තම ව්‍යාපාරික අධිරාජ්‍යය තම දරුවන්ට පැවරීමට සැලසුම් සකස් කර ඇත. එහෙත් ඔහු තමන්ට ඉක්මනින් විශ්‍රාම යාමට අදහසක් නොමැති බවද අවධාරණය කර ඇත.
65 හැවිරිදි අම්බානි ඉකුත් සඳුදා ඔහුගේ අනුප්‍රාප්තික සැලැස්ම සකස් කරමින්, ඔහුගේ රිලයන්ස් ඉන්ඩස්ට්‍රීස් සමූහයේ කොටස් හිමියන්ට අවධාරණය කළේ තම දරුවන් තිදෙනා සිය ව්‍යාපාර ජාලයේ ප්‍රමුඛත්වය ගන්නා අය බවය. රිලයන්ස් ඉන්ඩස්ට්‍රීස්හි සභාපති සහ ප්‍රවර්ධකයා වන අම්බානිට ඊෂා නමැති දියණියක් සහ අනන්ත් සහ ආකාෂ් නම් වූ පුතුන් දෙදෙනෙකු සිටිති. මුම්බායි කොටස් හුවමාරුව වෙත සමාගමේ නවතම ගොනු කිරීම අනුව, අම්බානිගේ බිරිඳ සහ දරුවන් ඔහුගේ සමූහ ව්‍යාපාරයෙන් 51% කට ආසන්න ප්‍රමාණයක් පාලනය කරයි.
ආසියාවේ දෙවැනි ධනවත්ම පුද්ගලයා වන අම්බානිට දශක දෙකකට පෙර ඔහුගේ පියාගෙන් තෙල් ව්‍යාපාරයක් උරුම වූ අතර, ඔහු පසුගිය වසර කිහිපය ගතකළේ තාක්‍ෂණය, පුනර්ජනනීය බලශක්තිය සහ සිල්ලර වෙළඳාමට එය විවිධාංගීකරණය කිරීමටය. ඔහු 2016දී ජංගම දුරකථන ජාලයක් ලෙස Reliance Jio දියත් කළේය. එතැන් සිට එය මිලියන 400 කට අධික පරිශීලකයින් රුස්කර ඇති අතර ප්‍රවාහන සේවාවක්, ෆයිබර් බ්‍රෝඩ්බෑන්ඩ් ජාලයක්, වීඩියෝ සම්මන්ත්‍රණ යෙදුමක් සහ ඩිජිටල් ගෙවීම් ආදී සේවාවන් දියත් කර ඇත. Reliance සමූහය දැන් එහි කොටස් වෙළඳපොළ වටිනාකම මත පදනම්ව රුපියල් ට්‍රිලියන 17.8 (ඩොලර් බිලියන 224) වේ.