රාහුල් ගාන්ධිට වසර 2ක සිර දඬුවමක්!
සාපරාධී අපහාස නඩුවක් සම්බන්ධයෙන් ඉන්දීය විපක්ෂ නායක රාහුල් ගාන්ධිට වසර දෙකක සිරදඬුවමක් නියම කර තිබේ. 2019 මැතිවරණ රැලියකදී අග්‍රාමාත්‍ය නරේන්ද්‍ර මෝදිගේ වාසගම පිළිබඳ අදහස් දැක්වීම සම්බන්ධයෙන් කොංග්‍රස් මන්ත්‍රී රාහුල් ගාන්ධි ගුජරාට් ප්‍රාන්තයේ අධිකරණය විසින් වරදකරු කරනු ලැබීය.
දඬුවම් නියම කිරීම සඳහා උසාවියට පැමිණ සිටි ගාන්ධි මහතාට දින 30ක් ඇප මත බන්ධනාගාරයෙන් පිටත සිටීමට හැකි අතර ඔහු අභියාචනයක් ඉදිරිපත් කරන්නට නියමිතය.
ලබන වසරේ මැතිවරණය පැවැත්වීමට නියමිත අතර කොංග්‍රස් ප්‍රකාශකයකු කියා සිටියේ ආණ්ඩුවේ "අඳුරු ක්‍රියා" හෙළිදරව් කිරීම නිසා මෙලෙස රාහුල් ඉලක්ක කර ඇති බවයි.
පාලක භාරතීය ජනතා පක්ෂය (BJP) පවසන්නේ පසුගිය මැතිවරණයට පෙර පැවැති ප්‍රචාරක ව්‍යාපාරය දක්වා දිවෙන මෙම නඩුවේ නිසි අධිකරණ ක්‍රියාවලියක් අනුගමනය කර ඇති බවයි.
2019 අප්‍රේල් මාසයේදී කර්නාටක ප්‍රාන්තයේ පැවැති රැලියකදී කතා කරමින් ගාන්ධි මහතා මෙසේ පවසා ඇත: "මේ සියලු සොරුන්ට මෝදි වාසගම ලෙස ඇත්තේ ඇයි? නිරාව් මෝදි, ලලිත් මෝදි, නරේන්ද්‍ර මෝදි."
නිරාව් මෝදි පලා ගිය ඉන්දීය දියමන්ති ව්‍යාපාරිකයකු වන අතර ලලිත් මෝදි ඉන්දීය ප්‍රිමියර් ලීගයේ හිටපු ප්‍රධානියකු වන අතර ඔහු එරට ක්‍රිකට් පාලක මණ්ඩලය විසින් ජීවිතාන්තය දක්වා තහනම් කර ඇත. ගාන්ධි මහතා තර්ක කරන්නේ තමන් එම ප්‍රකාශය කළේ රටේ දූෂණය ගැන ඉස්මතු කිරීමට බවත් එය කිසිදු ප්‍රජාවකට එරෙහිව එල්ල වූවක් නොවන බවත්ය.