මිහිමත ජීවය අතුගා දමන අනාගත ’සුපිරි මහාද්වීපය’
අනාගතයේදී අලුතෙන් බිහිවීමට නියමිත ‘සුපිරි මහාද්වීපය’ මිනිසුන් සහ ඒ වනවිට ජීවතුන් අතර සිටිය හැකි අනෙකුත් සියලුම ක්ෂීරපායින් පෘථිවිය මතින් අතුගා දමා එය ඔවුන්ට වාසයට නුසුදුසු තත්ත්වයට පත්කළ හැකි බව අධ්‍යයනයක් මගින් පෙන්වා දී තිබේ.
වසර මිලියන 250කින් පමණ ලෝකයේ මහාද්වීප එක්වී Pangea Ultima නම් සුපිරි මහාද්වීපයක් සෑදීමට නියමිත බව මේ අධ්‍යයනය තහවුරු කරයි. එක්සත් රාජධානියේ බ්‍රිස්ටල් විශ්ව විද්‍යාලයේ විද්‍යාඥයන් සුපිරි පරිගණකවලට ඇතුළත් කළ දේශගුණික ආකෘති භාවිතා කරමින් ඉදිරි අනාගතයේ සිදුවිය හැකි දේශගුණික පෙරුළි ගැන සහ ඒවා තීව්‍ර වන ආකාරය ගැන ප්‍රථම අනාවැකි පළ කළහ. මේ අනුව අනාගතයේ බිහිවීමට නියමිත ‘සුපිරි මහාද්වීපයේ' අධික තාපයට දිගු කලක් නිරාවරණය වීමට පරිණාමය නොවූ මිනිසුන්ට සහ ක්ෂීරපායින්ට එය අතිශයින් උණුසුම්, වියලි සහ වාසයට නුසුදුසු ස්ථානයක් වන බව ඔවුහු සොයා ගත්හ. Pangea Ultima නිර්මාණය වීම නිසා නිරන්තර ගිනිකඳු පිපිරීම්, කාබන්ඩයොක්සයිඩ් වායුගෝලයට විදීම සහ ග්‍රහලෝකය උණුසුම් කිරීම පමණක් නොව, සූර්යයා දීප්තිමත් වී වැඩි ශක්තියක් විමෝචනය කර පෘථිවිය තවදුරටත් උණුසුම් වන බව ඔවුන් සොයා ගෙන ඇත.
