බුකර් සාහිත්‍ය සම්මානය අයර්ලන්තයේ පෝල් ලින්ච්ට!

මෙවර බුකර් සාහිත්‍ය සම්මානයෙන් පිදුම් ලැබූවේ අයර්ලන්තයේ තරුණ සාහිත්‍යධරයකු වන පෝල් ලින්ච්ය. සාහිත්‍ය නිර්මාණ වෙනුවෙන් පිරිනැමෙන ලොව ඉහළම සම්මානය වන බුකර් සම්මානය හිමිවූයේ පෝල් ලින්ච්ගේ Prophet Song කෘතිය සඳහාය.

Prophet Song ඔහුගේ පස්වැනි සාහිත්‍ය කෘතියයි. එය ලියා අවසන් කිරීමට වසර 4කට වඩා ගත වූ බවත් පෝල් ලින්ච් ප්‍රකාශ කර තිබේ. ‘මා මේ කෘතිය ලිවීම ආරම්භ කළේ මගේ පුතා ඉපදීමට මාස කිහිපයකටත් පෙරයි. ඒත් කෘතිය ලියා අවසන් කරන විට පුතා සිටියේ සෙල්ලම් පාපැදියක් පැදීමට තරම් හැකියාව ඇති වයස් මට්ටමක.’ යැයි පෝල් ලින්ච් සඳහන් කර ඇත. සිරියාවේ යුද්ධය සහ සරණාගතයන්ගේ අර්බුදය සිය කෘතිය සඳහා උත්තේජනයක් සැපයූ බව බුකර් සම්මානයෙන් පිදුම් ලැබීමෙන් පසු පෝල් ලින්ච් ප්‍රකාශ කළේය.