යුරෝ මුදල් නිර්මාතෘ ඩෙලෝර්ස් සමුගනියි!
යුරෝ මුදල් ඒකකය නිර්මාණය කිරීමේ ප්‍රධාන චරිතයක් වූ හිටපු යුරෝපීය කොමිසමේ සභාපති ජැක් ඩෙලෝර්ස් ඉකුත් බදාදා වයස අවුරුදු 98දී මිය ගියේය.
සමාජවාදියෙකු වන ඩෙලෝර්ස් ප්‍රංශයේ ඉහළ දේශපාලන ජීවිතයක් ගතකළ අතර, ඔහු 1985දී යුරෝපා සංගම් කොමිසමේ සභාපති වීමට පෙර 1980 ගණන්වල මුල් භාගයේ ජනාධිපති ප්‍රංශුවා මිත්‍රොන්ඩ් යටතේ මුදල් ඇමැති ලෙස සේවය කළේය.
ඔහුගේ 10 වසරක සභාපති ධූරය යුරෝපා සංගම් කොමිසම් ඉතිහාසයේ දීර්ඝතම ධුර කාලය වන අතර නූතන යුරෝපයේ හැඩරුව වෙනස් කිරීමට දායක වූ සමය බවට තහවුරුව ඇත. Delors යටතේ, යුරෝපීය සංගමය සැලකිය යුතු ලෙස වෙනස් වූ අතර, තනි යුරෝපීය පනත, Schengen ගිවිසුම, Erasmus ශිෂ්‍ය හුවමාරු වැඩසටහන, පොදු කෘෂිකාර්මික ප්‍රතිපත්ති සහ ආර්ථික හා මූල්‍ය සංගමයේ ප්‍රතිසංස්කරණය ඇතුළු ප්‍රධාන ප්‍රතිසංස්කරණ ගණනාවක් හඳුන්වා දෙන ලදී. යුරෝ මුදල් නිර්මාණය ඒ අතර සිදුකළ ප්‍රමුඛ ප්‍රබල වෙනසයි.