ඇමෙරිකාවට රුසියානු න්‍යෂ්ටික ප්‍රහාරයක්!
රුසියානු න්‍යෂ්ටික ප්‍රහාරයක් ඇමෙරිකාවට එල්ලවේද යන සැකයක් පසුගිය සතියේ ලොව පුරා පැතිර ගියේය. ඇමෙරිකාව අසලටම න්‍යෂ්ටික බලැති සබ්මැරීනයක් ඇතුළු නැව් හතරකින් යුත් රුසියානු නාවික හමුදා කණ්ඩායමක් ළඟා වීමත් සමඟිනි.
රුසියානු ආරක්ෂක අමාත්‍යාංශය බටහිර අත්ලාන්තික් සාගරයේ සහ කැරිබියන් මුහුදේ සැලසුම් කර ඇති අභ්‍යාස මාලාවේ කොටසක් ලෙස මාර්ගෝපදේශ-මිසයිල සහිත සබ්මැරීනයක් වන Kazan, අද්මිරාල් ගොර්ෂ්කොව් නමැති මාර්ගෝපදේශ මිසයිල නෞකාව, දිවි ගලවා ගැනීමේ ටග් යාත්‍රාවක් වන නිකොලායි චිකර් ඇතුළු නැව් 4 ක් මේ අනුව කියුබාව අසලට පැමිණ තිබුණි.
ඇමෙරිකාව වඩාත් සැලකිලිමත් වූයේ අත්ලාන්තික් සාගරයේ රුසියානු මිසයිල අභ්‍යාසවල කොටසක් ලෙස නැගෙනහිර වෙරළට ඔබ්බෙන් ක්‍රියාත්මක වීමත් නාවික සැතපුම් 1,000 ක පරාසයක් සහිත Yasen-M පන්තියේ මඟපෙන්වන මිසයිල සහිත න්‍යෂ්ටික සබ්මැරීනයක් වන Kazan, මෙම නාවික ක්‍රියාකාරී කණ්ඩායමට අයත් වීමත් හේතුවෙනි.
Gorshkov සහ Kazan රුසියානු නාවික හමුදාවේ වඩාත්ම දියුණු යාත්‍රා වන අතර විවිධ නැව් නාශක සහ ගොඩබිම් ප්‍රහාරක මිසයිලවලින් සන්නද්ධ කළ හැකිය.
දින පහක සංචාරයක් සඳහා බදාදා හවානා වෙත පැමිණ තිබූ මෙම යාත්‍රා ඇමෙරිකාවේ ෆ්ලොරිඩා වෙරළ තීරයේ සිට සැතපුම් 100 කට ආසන්න දුරකට පැමිණීම ගැන පෙන්ටගනය තුළ ද නොසන්සුන්තාවක් හට ගත්තේය. රුසියානු නාවුක කණ්ඩායමට ප්‍රතිචාර වශයෙන්, එක්සත් ජනපදය විසින් ප්‍රංශ නාවික හමුදා නෞකාවක් සහ කැනේඩියානු යුද නෞකාවක් සමඟ සම්බන්ධ වූ මාර්ගෝපදේශක-මිසයිල විනාශ කරන යාත්‍රා තුනක් පිටත් කර හරින ලදී. ප්‍රසිද්ධියේ ලබාගත හැකි ගුවන් දත්තවලට අනුව කැනේඩියානු සහ එක්සත් ජනපද සබ්මැරීන් විරෝධී ගුවන් යානා රුසියානු නැව් සංක්‍රමණය නිරීක්ෂණය කර තිබුණි.
හවානා වරාය සංචාරයෙන් අනතුරුව එම නෞකා කලාපය තුළ ඒකාබද්ධ ගුවන් සහ නාවික අභ්‍යාස පැවැත්වීමට සැලසුම් කර ඇති බව රුසියානු හමුදා බලධාරීහු කියා සිටියහ.