ලෝක කුසලානයට සැරසෙන සෞදියේ විස්මිත ක්‍රීඩාංගණ 11ක්
සෞදි අරාබිය 2034 ලෝක කුසලානය සඳහා විස්මිත නව ක්‍රීඩාංගණ 11ක් ඉදිකරමින් සිටියි. එය ලොව එතෙක් මෙතෙක් සිදු කර ඇති මිල අධිකම ක්‍රීඩා ඉදිකිරීම් ව්‍යාපෘතිය විය හැකි බව වාර්තා වේ.
මෙහි වඩාත්ම කැපීපෙනෙන සැලසුම වන්නේ රියාද්හි කඳු බෑවුමක ඉදිකර ඇති අනාගතරූපී LED පැනල්වලින් සරසා ඇති ආසන 45,000 ක ක්‍රීඩාංගණයයි.
තවත් එකක් තවමත් ඉදිකර නොමැති එරට නියෝම් නගරයේ පොළොව මත මීටර් 350ක් ඉහළින් ඉදි කෙරේ. Neom යනු දැනට කාන්තාරයේ ඉදිවෙමින් පවතින නගරයක් වන අතර එය සැතපුම් 106 ක් දිග වනු ඇත. එය අහස සීඹින සමාන්තර ගොඩනැගිලිවලින් සැදුම්ලත් ගෘහස්ත හෙවත් වැසුණු නගරයකි.
Neom ක්‍රීඩාංගණයට ළඟා විය හැක්කේ රියැදුරන් නොමැති වාහන සහ අධිවේගී සෝපානවලට පමණි. මේ අතර ප්‍රේක්ෂකයන් 92,000කට අසුන්ගත හැකි කිං සල්මාන් ක්‍රීඩාංගණය ප්‍රධානතම කැපීපෙනෙන ස්ථානය වනු ඇත.
මෙබඳු නවතම ක්‍රීඩාංගණ 11ක් නිර්මාණය වෙමින් පවතින අතර සෞදි ප්‍රෝ ලීගයට අයත් දැනට භාවිත වන ක්‍රීඩාංගණ හතරක් ද ප්‍රතිසංස්කරණය කෙරේ. 2034 ලෝක කුසලානය සඳහා දැනට එකම ලංසුකරු සෞදි අරාබියයි.
