මහා කවි හෝමර් හොරෙක් අල්ලයි!
ග්‍රීකයේ මහා කවි හෝමර් මුල්වීමෙන් හොරෙක් කොටු කර ගැනීමට ඉතාලි පොලිසියට හැකිව තිබේ. පසුගියදා රාත්‍රියක ඉතාලි අගනුවර නේවාසික ගොඩනැගිල්ලක පිහිටි නිවෙසකට ඇතුළු වී සොරකමේ යෙදුණු අයකු එහි කුටියක තිබූ ග්‍රීකයේ මහා කවි හෝමර් විසින් ලියන ලද ‘ඉලියඩ් වීර කාව්‍ය’ කෘතිය දැක නිවසේ සඳලු තලයට වී එය කියවමින් සිටිය දී හසු වී ඇත.
පොතට වහල් වී සඳලු තලයට වී එය කියවමින් සිටි 38 හැවිරිදි මේ පුද්ගලයා ගෙහිමියා විසින් දැක ඇති අතර, ඒ බව පොලිසියට දැනුම් දී ඇත. ගෙහිමියා දැකීමෙන් පසු එම සඳලු තලයෙන් පැන පලා යෑමට උත්සාහ කළ සොරා පසුව පොලිස් නිලධාරීන් විසින් අත්අඩංගුවට ගනු ලැබූ බව වාර්තා වේ. වඩාත් අපූරු කාරණාව වන්නේ මේ පුවත පිළිබඳ තොරතුරු වාර්තා වීමෙන් පසු එම කෘතිය ඉතාලි බසට පරිවර්තනය කරනු ලැබූ ලේඛකයා ප්‍රකාශ කර ඇත්තේ සොරාට එය අවසානය වන තෙක් කියැවීමට නොහැකි වූ බැවින් පොතේ පිටපතක් ඔහුට යැවීමට කටයුතු කරන බවය.