යුක්රේනය වනසන පුටින්ගේ සැලසුම!
යුක්රේනය විනාශ කිරීමේ පුටින්ගේ මුල් සැලැස්ම සහිත ලේඛනයක් දැන් මාධ්‍ය වෙත කාන්දු වී තිබේ. එලෙස හෙළිදරව් වී ඇත්තේ ව්ලැඩිමීර් පුටින් විසින් ඔහුගේ ප්‍රතිවාදියා, Volodymyr Zelensky වෙත ප්‍රහාරයට පෙර ඉදිරිපත් කරන ලද මුල්ම සාම යෝජනාවය. මෙම ලේඛනය මගින් යුක්රේනයට දැරිය නොහැකි කොන්දේසි ගණනාවක් පුටින් පනවා ඇති බව පෙනී යයි.
නැගෙනහිර යුරෝපයේ, මධ්‍යම ආසියාවේ සහ මැදපෙරදිග රටවලට ප්‍රවෘත්ති, තොරතුරු සහ විශ්ලේෂණ විකාශනය කරන එක්සත් ජනපද රජයේ අරමුදල් ලබන සංවිධානයක් වන රේඩියෝ ෆ්‍රී යුරෝප් හි Systema මාධ්‍ය ආයතනය විසින් මෙම ගිවිසුම කාන්දු කර ඇත.
රේඩියෝ ෆ්‍රී යුරෝපය වාර්තා කරන පරිදි, රුසියානු බලධාරීන් විසින් මෙම ගිවිසුම 2022 මාර්තු 7 වැනි දින බෙලරුසියාවේ බෙලවේෂා නගරයේ දී ඔවුන්ගේ යුක්රේන සගයන් වෙත ඉදිරිපත් කර තිබේ. ඒ රුසියාව යුක්රේන භූමිය ආක්‍රමණය කිරීම දියත් කිරීමෙන් දින 11 කට පසුව මොස්කව් සහ කියෙව් නියෝජිතයන් අතර තුන්වැනි සාකච්ඡා වටය තුළදීය.
“යුක්රේනය විනාශ කිරීමේ සැලැස්මක්” ලෙස මේ හෙළිදරව්ව සිදු කළ මාධ්‍ය මෙම ගිවිසුම නිර්වචනය කර තිබේ. 2022 වසන්තයේ දී ක්‍රෙම්ලිනය විසින් යෝජනා කරන ලද මේ කොන්දේසි මගින් යුක්රේනය “බෙදීම, නිරායුධ කිරීම, ජාත්‍යන්තරව හුදෙකලා කර, තවදුරටත් රුසියානු ආක්‍රමණකාරීත්වයට එරෙහිව ආරක්ෂා වීමට එයට ඇති හැකියාව මුළුමනින්ම බිඳ දමන සුළු බව” මෙම මාධ්‍ය පෙන්වා දෙයි.
මෙම ගිවිසුම මගින් ප්‍රධාන වශයෙන් යුක්රේනයේ මිලිටරි හැකියාවන් සහ රට තුළ විදේශ බලවේග පැවතීම සම්බන්ධයෙන් ඉතා දැඩි සීමා පනවා ඇති අතර ප්‍රශ්නගත බෙදුම්වාදී මායිම් ප්‍රදේශ අත්හැරීමට පවා ඉල්ලා ඇත. එසේම යුක්රේනයට තම හමුදාව 50,000 දක්වා අඩු කළ යුතු බව එහි ඇති වගන්තිවලින් එකකින් බල කර ඇත. නිලධාරීන් 1,500 ක් පමණක් තබා ගත යුතු බව එය කියයි. දැනට, යුක්රේනයේ ක්‍රියාකාරී සොල්දාදුවන් 900,000 ක් පමණ සිටිති.
එම ගිවිසුමේ භූමිය සම්බන්ධයෙන් ප්‍රකාශයට පත් කර ඇති කොන්දේසි අනුව, යුක්රේන පාලනය යටතේ පවතින ප්‍රදේශ ඇතුළුව ඩොනෙට්ස්ක් සහ ලු‍ගාන්ස්ක් යන ස්වයං-ප්‍රකාශිත මහජන සමූහාණ්ඩු යුක්රේනය විසින් පිළිගත යුතුව ඇත. මීට අමතරව, 2014 සිට හානියට පත් ඩොන්බාස් හි යටිතල පහසුකම් නැවත ගොඩනැගීමේ පිරිවැය එරට විසින් දැරිය යුතුය. 2014 වසරේ සිට යුක්රේනය සහ එහි මිත්‍ර රටවල් විසින් රුසියානු සමාගම් සහ පුද්ගලයන්ට එරෙහිව පනවා ඇති සම්බාධක අවසන් කිරීමට ද ගිවිසුම උත්සාහ කර ඇත. අවසාන වශයෙන්, යුක්රේනයේ නිල භාෂාවක් ලෙස රුසියානු භාෂාව ස්ථාපිත කරන ලෙසත්, යුක්රේන ඕතඩොක්ස් පල්ලියේ දේපළ මොස්කව් වෙත ආපසු ලබා දෙන ලෙසත් එය ඉල්ලා සිටියි. දෙවැනි ලෝක සංග්‍රාමයේ ජයග්‍රහණයට සම්බන්ධ සෝවියට් සහ කොමියුනිස්ට් සංකේත රට තුළ නැවත භාවිත කිරීමට ඉඩ දිය යුතු බවට ද මේ ගිවිසුම බල කර සිටියි. මේ සියල්ල සාමයට නොව සටනට බල කෙරෙන කොන්දේසි බව මාධ්‍ය විවේචන පෙන්වා දෙයි.