හොලිවුඩයද වැනසූ ඇමෙරිකාවේ මහා ලැව් ගින්න
ගොඩනැගිලි 1,121 ක් සහමුලින්ම පුළුස්සා දැමූ 2018 Woolsey පැතිර ගිය ගින්න අභිබවා යමින් ලොස් ඇන්ජලීස් ඉතිහාසයේ වඩාත්ම විනාශකාරී ලැව්ගිනි ජාලාව ලෙස නම්කළ හැකි විනාශකාරී ගින්න මේ වන විට ද පැතිර යමින් පවතී. එය ඉක්මනින්ම කැලිෆෝනියා ඉතිහාසයේ වඩාත්ම විනාශකාරී ගින්න බවට පත්වන ලකුණු පහළ වී ඇත.
මේ මහා ලැව්ගිනි නිසා සිදුවූ මරණ සංඛ්‍යාව 7 ක් යැයි මුලින් වාර්තා වුවද සිකුරාදා වන විට ශීඝ්‍රයෙන් පැතිර ගිය ගින්න හේතුවෙන් සිදුවූ සමස්ත මරණ සංඛ්‍යාව නිසි ලෙස ගණනය කර නොතිබුණි. ගොඩනැගිලි දහස් ගණනක් විනාශ වී දස දහස් ගණනකට උන්හිටිතැන් අතහැර පලා යාමට සිදුව ඇත.
එක් ලැව්ගින්නක් නොව ප්‍රධාන ගිනිජාලා 5 කට එකවර මුහුණ දීමට ප්‍රාන්ත වැසියන්ට සිදුව ඇත. Eaton, Hurst, Kenneth, Lidia සහ Palisades ඇතුළුව කලාපයේ අවම වශයෙන් ලැව්ගිනි 5 කට ගිනි නිවන නිලධාරීන්ට ප්‍රතිචාර දැක්වීමට සිදුව ඇත. ඒවා ඒකාබද්ධව අක්කර 29,795 ක් පමණ පුරා පැතිර ඇත. ගිනි නිවීම් සඳහා ප්‍රමාණවත් කාර්ය මණ්ඩලයක් නොමැති LA ප්‍රාන්ත ගිනි නිවන දෙපාර්තමේන්තුව, “ප්‍රධාන පඳුරු ගිනි ගැනීම්” එකක් හෝ දෙකක් සඳහා සූදානම්ව සිටියේය. නමුත් දැන් 5 කට වැඩි ගිනි ගැනීම් සඳහා වෙහෙසකර ප්‍රතිචාර දැක්වීමකට කැපවීමට ඔවුන්ට සිදුව ඇත. සිකුරාදා වන විට තවත් අතුරු ගිනිජාලා රාශියක් තැනින් තැනින් හිස ඔසොවා එමින් ගින්න දෙගුණ තෙගුණ වී තිබුණි. මැලිබු සහ සැන්ටා මොනිකා අතර ලෝක ප්‍රකට හොලිවුඩය ද ඇතුළත් වෙරළබඩ ප්‍රදේශය ගිනිබත් කරමින් පැතිර යන මධ්‍ය ගිනි ජාලාව වූ පැලිසේඩ්ස් ගින්න බදාදා වන විට අක්කර 15,800 කට වඩා වැඩි භූමි ප්‍රදේශයක් දක්වා පැතිර ගියේය. කිසිදු පාලනයක් නොමැතිව එය දැනටමත් අවම වශයෙන් ගොඩනැගිලි 1,000 ක් විනාශ කර ඇති අතර, එය ලොස් ඇන්ජලීස් ප්‍රාන්තයේ මෙතෙක් සිදු වූ වඩාත්ම විනාශකාරී ගින්න බවට පත්ව ඇති බව කැල්ෆයර් වාර්තා පෙන්වා දෙයි.
හොලිවුඩයේ තරු පන්තියේ නළු නිළියන්ට අයත් බිලියන ගණන් වටිනා මහා මන්දිර අළුකර දැමීමට ද පැලිසේඩ් සමත් විය. මේ ගින්න හේතුවෙන් නාසා ආයතනයේ ප්‍රධාන පරීක්ෂණාගාරය වන කැල්ටෙක් ආයතනය ඇතුළු ප්‍රධාන ආයතන ගණනාවක් වසා දැමිණි. හැරි කුමරුගේ මාලිගයක් මෙන්ම පැරිස් හිල්ටන්, කාර්ඩිශාන්, ඇන්තනි හොප්කින්ස්, අරියානා ග්‍රන්ඩේ, ජේම්ස් වුඩ්ස්, මැන්ඩි මුවර් බිලී ක්‍රිස්ටල්, ටීනා නෝල්ස්, කැරී එල්වෙස්, රිකී ලේක්, මෙලිසා රිවර්, ඇනා ෆාරිස්, ස්පෙන්සර් ප්‍රට්, හයිඩි මොන්ටැග්, ඩයෑන් වොරන් සහ කැමරන් මැතිසන් වැනි ජනකාන්ත පිරිසකට ඔවුන්ගේ ජීවිත කාලයක්ම හරිහම්බ කළ දේ නිවාස ගිනි ගැනීමත් සමඟ අහිමි වී ඇත.
අනෙක් දැවැන්ත ගින්න වන වේගයෙන් ගමන් කරන ඊටන් ගින්න, අල්ටඩේනා හි නිවාස සහ ව්‍යාපාර සිය ගණනක් විනාශ වී ඇත. “එය හුදෙක් අභූත දර්ශනයක් බඳුය. යුද පිටියක් බඳුය”. ඊටන් ගින්න ලොස් ඇන්ජලීස් ජාතික වනය ද ගිලගෙන තිබේ. ගින්න අක්කර 10,000 කට වඩා වැඩි ප්‍රදේශයකට පැතිර ගිය අතර ගොඩනැගිලි 13,000 කට පමණ තර්ජනයක් එල්ල වෙමින් පවතී. කෙනත් ගින්න බටහිර කඳුකරය හරහා වේගයෙන් පැතිර යමින් අතරමග හමුවන සියල්ල ගිනිබත් කළ අතර, Kardashians වැනි සුප්‍රකට නළු නිළියන්ට අයත් නිවාස සහිත Calabasas සහ Hidden Hills කලාපයේ මහා පරිමාණ විනාශයකට හේතු වූ ගින්නක් හිතාමතාම ඇවිලවීමේ සිද්ධියක් සම්බන්ධව කළ විමර්ශනයක දී එක් සැකකරුවකු අත්අඩංගුවට ගෙන ඇත. ප්‍රාන්ත ඔස්සේ හමා යන තද සුළඟින් ධාවනය වන මූලික ගිනිජාලා පහෙන් අවම වශයෙන් පුද්ගලයන් හත්දෙනකු මියගිය බව මුලින් තහවුරු වී තිබූ අතර තවත් අයට “සැලකිය යුතු තුවාල” සිදු වී ඇති බව නිලධාරීහු පැවසූහ. මූලිකව 150,000 කට වැඩි පිරිසක් ඉවත් කිරීමේ නියෝග යටතේ සිටියහ.