සීතල පිපිඤ්ඤා එක්ක නැවුම් කකුළුවෝ කොළඹට ආපු ජපන් හෝටලේ Kyoto Mirai

Kyoto Mirai කියන්නේ කොළඹට ආපු අලුත්ම ජපන් හෝටලේ විදිහට හැඳින්වුවොත් නිවැරදියි. තරමක් මිලාධික වුණත් නැවුම් අඩුම කුඩුම දාලා හදන මේ ජපන් කෑම හරිම රසවත්. සුදු පැහැ බිත්තිවලිනුත් දැවමය මේස පුටුවලිනුත් සමන්විත මේ අවන්හලේ තියෙන්නේ සරල පෙනුමක්. ඒ වගේම අවන්හලේ Zashiki කොටසට ගියොත් ගාලු පාරේ දර්ශනයත් සමඟ ආහාර රස විඳින්න පුළුවන්. අවන්හල පිහිටා තියෙන්නේ ගාලු පාර අයිනේ කොල්ලුපිටියේයි. 
අපි මුලින්ම රස බැලුවේ Lemon Iced Tea එකක් සහ Virgin Mojito එකක්. හොඳ රස පදමට තිබුණු ඒ බීම වර්ග දෙකම නැවුම් බවකින් යුතුව හොඳ ආහාර ගැනීමේ අත්දැකීමකට මුල පුරන්න කදිමයි!

Kyoto Mirai සී ෆුඩ් ආහාර ගැන කතාකිරීමේදී eel සහ arkshell අමතක කරන්නම බැහැ. විශේෂයෙන්ම සාමාන්‍ය ආහාරවලට වඩා එහා ගිය දෙයක් රස විඳින්න කැමති කෙනෙක්ට ඒවා ගොඩක් ගැලපෙනවා. 

Squid Sashimi සහ Lagoon Crab with Cucumber කියන්නේ මෙතැන තියෙන ඉස්තරම්ම ආහාර දීසි දෙකක්. විශේෂයෙන්ම දෙවැනියට කියපු ආහාර දීසියේ නැවුම් කකුළුවන් සහ සීතල පිපිඤ්ඤා එකතුව පුදුම එලවන සුලුයි. Pickled Tuna in Soya Sauce, Octopus සහ Arkshell කියන්නේ මෙතැන තියෙන තවත් රසවත් තේරීම් කිහිපයක්.

මේ වගේ විවිධ ආහාර රස බලමින් සිටින අතරතුරේදී අවන්හලේ ප්‍රධාන සූපවේදියා වන හිරෝයා නාගා අපිට තවත් රසවත් ආහාර වර්ග කිහිපයක් ම හඳුන්වාදුන්නා. Grilled Chicken Teriyaki සහ Organic Chicken Karaage ඒ අතර තිබුණා.  Lagoon Crab Tempura on Rice සහ  Pork Katsudon කියන්නේ බත් සමඟ පිළිගැන්වෙන ආහාර දීසි දෙකක්. එයින් පළමුවැන්න නැවුම් කකුළුවන් සහ ජපන් ලූණු එක්ක පිළිගන්වද්දී දෙවැන්න ඉතාම මොළොක් පෝක් එක්ක පිළිගැන්වෙනවා.

නටාෂා ප්‍රනාන්දුපුල්ලේ
සේයා රූ - කණිෂ්ක ගනේවත්ත