රාජකීය මංගල උත්සවයක්

ග්‍රහලොව මනාලිය වූ සිකුරු 2015 පෙබරවාරි 24 වැනි ඉරු දින, එනම් අද දින රාත්‍රී 10.48ට සෙනසුරැට අයත් මකර රාශියට පිවිස 2019 මාර්තු 22 වැනි කිවි දින දක්වාම එම රාශියෙහි ගමන් කරයි. 

මෙම තත්ත්වය අප රට කෙරේ කෙසේ බලපානවාද යන්න මුලින්ම සොයා බලමු.

ආරෝග්‍යශාලා, සමාජසේවා ආයතනවල දියුණුව හා සුබසිද්ධිය වෙනුවෙන් රජය විසින් විවිධ ක්‍රියාමාර්ග ගනු ලබනු ඇත. යම් යම් හේතු මත කුඩා දරුවන්ට මෙන්ම ස්ත්‍රීන්ට මාරක ඇතිවන කාලයක් වන අතර, ළමා හිංසනද ඉහළ යනු ඇත. කතුන්ට අමානුෂීය ලෙස පහරදීම්ද, ඝාතනය කිරීම්ද, සියදිවි හානිකර ගැනීම්ද වාර්තා වෙයි. ප්‍රසිද්ධ කාන්තාවකට, දේශපාලන කටයුතුවල නියැලි හෝ වෛද්‍ය ක්ෂේත්‍රයේ නියුතු කාන්තාවකට මාරක වේ.

විදේශීය වශයෙන් විමසා බැලීමේදී රාජකීය මංගල උත්සවයක් ඇතිවනු ඇත. උසස් කාන්තාවකට, රාජකීය කාන්තාවකට මාරක වේ. රාජ්‍ය නායකයකුගේ කීර්තිනාමයට හානිවන අතර වෙළෙඳ ව්‍යාපාරික ගොඩනැගිලිවලට ත්‍රස්ත ප්‍රහාර එල්ලවනු ඇත.
ලග්නවලට බලපාන්නේ මෙසේය.

මේෂ - මංගල යෝජන

ඔබට යහපත් ඵල අත්වේ. අන් අය අතර කැපීපෙනෙන තත්ත්වයට පත්වනු ඇත. තම මතයට අනුව කටයුතු කරන වකවානුවක් වන අතර අවිවාහක අයට මංගල යෝජනා ඇතිවන අතර හදිසි ඉක්මන් තීරණ ගැනීමෙන් වළකින්න. 

වෘෂභ - ආගමික කටයුතු

ව්‍යාපාරික කටයුතුවල නිරතවී සිටින අයට ලාභ අත්නොවන කාලයක් වේ. ආගමික කටයුතු වෙනුවෙන් සහභාගී වනු ඇත. තම කටයුතුවලට විවිධ පාර්ශවවලින් බාධා ඇතිවනු ඇත.

මිථුන - ලෙඩරෝග

ඔබට ශුභ ඵල අත්නොවනු ඇත. සමාජසේවා කටයුතුවල නිරතවී සිටින අයට යහපත්ය. තමාගේ කටයුතුවලට විවිධ බාධා මතුවනු ඇත. උගුර ආශ්‍රිත පීඩාවකින් ප්‍රතිකාර ගැනීමට සිදුවනු ඇත.

කටක - ව්‍යාපාරවලට හොඳයි

ව්‍යාපාරික කටයුතුවල නිරතවී සිටින අයට ඉතා යහපත් වන අතර නව ව්‍යාපාර ආරම්භයටද සුදුසු කාලයක් වනු ඇත. පවුල් දිවියේද සමගිය වර්ධනය වන අතර අවිවාහක අයට මංගල යෝජනා ඉදිරිපත් වනු ඇත.

සිංහ - ස්ථාන මාරු

ඔබගේ කටයුතුවලට විවිධ අයගෙන් බාධා එල්ලවනු ඇත. සේවා ස්ථානයේ වෙනසක්, ස්ථාන මාරුවක් අපේක්ෂා කළ අයගේ බලාපොරොත්තු ඉෂ්ඨ වේ. නව රුකියාවක් බලාපොරොත්තු වන අයට ගැලපෙන රැකියාවක් නොලැබෙන කාලයක් වේ.

කන්‍යා - පෙර පින් මතුවේ 

ඔබට පෙර පින් බලය ගෙන දෙන කාලයක් වනු ඇත. කලා කටයුතුවල නිරත අයට යහපත් වන අතර හිතමිතුරන්ගෙන්ද උදව් අත්වන, විරුද්ධ ලිංගික ආකර්ශනයට ලක්වන වකවානුවක් වේ.

තුලා - දුර ගමන්

නව ඉඩමක්, නිවසක් මිලදී ගැනීමට යහපත් වන කාලයක් වේ. අවිවාහක අයට මංගල යෝජනා ඇතිවනු ඇත. අන් අය අතර කැපීපෙනෙන තත්ත්වයට පත්වනු ඇත. දුර ගමන් යෙදෙන කාලයක්ද වනු ඇත.

වෘශ්චික - විනෝද ගමන්

සන්නිවේදන කටයුතුවල නිරතවී සිටින අයට යහපත් වන අතර වැඩිපුර තමා ගැන සිතා කටයුතු කිරීම හේතුවෙන් හිතමිතුරන් තමා සමඟ අමනාපකම් ඇතිකරගනු ඇත. කෙටි විනෝද ගමනක් යාමට අවකාශ ලැබෙනු ඇත.

ධනු - විවිධ බාධා

ඔබ අන් අයට ප්‍රිය පුද්ගලයකු බවට පත්වන අතර කලා කටයුතුවල නිරතවී සිටින අයට යහපත් ඵල අත්වනු ඇත. යම් යම් කටයුතුවලට විවිධ පාර්ශව මගින් බාධා ඇතිකරනු ඇත.

මකර - හදිසි කේන්ති

ඔබට යහපත් ඵල අත්වන අතර ඕනෑම දෙයක් පිළිබඳ විමර්ශනශීලීව තීරණ ගන්නා කාලයක් වේ. හදිසි කේන්ති ගතිද ඇතිවන කාලයක් වන අතර පවුල් දිවියේ සමගිය වර්ධනය වන කාලයක්ද වේ. නව ව්‍යාපාර ආරම්භයටද යහපත් වනු ඇත.

කුම්භ - ඇස්වල පීඩා

එතරම් යහපත් නොවන අතර ඔබගේ කටයුතුවලට විවිධ පාර්ශවවලින් බාධා ඇතිකරනු ඇත. පවුල් දිවියේද සමගියට බාධා ඇතිවනු ඇත. දුර ගමන් යෙදෙන අතර ඇස්වල පීඩා මතුවන කාලයක් වේ.

මීන - උදව් උපකාර

ඔබගේ දියුණුවට බාධා ඇතිවන කාලයක් වන අතර සමාජසේවා කටයුතුවල නිරතවී සිටින අයට ශුභ ඵල අත්වනු ඇත. හිතමිතුරන්ගෙන්ද උදව් ලැබෙන අතර අන් අයට ප්‍රිය පුද්ගලයකු බවට පත්වනු ඇත.

ජ්‍යොතිෂ නන්දන
ප්‍රවීණ ජ්‍යොතිෂවේදි ජ්‍යොතිෂාචාර්ය
රේණුක වික්‍රමසිංහ
සුවණැන ජ්‍යොතිෂ පර්යේෂණායතනය
ඔලබොඩුව, ගෝනපල