ලොකු පුටුවලට අපලයි

ග්‍රහ මණ්ඩලයේ රජු වූ සූර්යා ග්‍රහ රාශි වලල්ලේ අවසන් රාශිය වූ මීන රාශියට 2019 මාර්තු මස 15 වන කිවි දින අළුයම 5.41 පිවිසේ. බ්‍රහස්පතිට අයත් පුවපුටුප නැකතේ හතර වන පාදයෙන් සෙනසුරුට අයත් උත්‍රපුටුප නැකත් සම්පූර්ණවත් බුධට අයත් රේවති නැකතේ සම්පූර්ණවත් ගමනින් 2019 අප්‍රේල් 14 වන ඉරුදින දක්වාම සූර්යා තමාට මිත්‍ර රාශියෙහි ගමන් කරනු ඇත.

මේ තත්ත්වය අප රට කෙරෙහි අවධානය යොමු කිරීමේදී යම් යම් කටයුතු වෙනුවෙන් රජයට අමතර මුදල් වැය කිරීමක් කිරීමට සිදුවනු ඇත. කෘෂි කර්මාන්තයට බාධා මතු කරමින් ඇතිවී තිබූ කෘමි දළඹු උවදුර මැඩලීමට සාර්ථක ක්‍රමවේදයක් ක්‍රියාවට නන්වනු ලබන කාලයක් වේ. රටේ උසස් කීර්තිමත් පුද්ගලයින්ට අශුභ වන අතර ඔවුනට මාරක යෙදෙනු ඇත. 

මන්ත්‍රීවරුන් අතර වාද විවාද මතුවන අතර දේශපාලන කේෂත්‍රයේ නියැලි අයකුට ද ඔවුන්ගේ පවුල්වල අයට ද ඉතා අයහපත් වන අතර මාරක හෝ අපල ගෙන දෙන කාලයක් වේ.
විදේශීය වශයෙන් විමසා බැලීමේදී

අයර්ලන්තය, ආසියාතික රටවල්, සයිප්‍රස්, පර්සියාව යන රටවල බදු බර ඉහළ යන කාලයක් වන අතර ආර්ථික වර්ධනයට බාධා ඇතිවනු ඇත. බ්‍රසීලය, ග්‍රීසිය, තුර්කිය, බැබිලෝනියාව, ස්විස්ටර්ලන්තය යන රටවල මහජනයා යම් භීතියකින් යුක්තව ගතකරනු ඇත. ස්පාඤ්ඤය, ප්‍රංශය, හන්ගේරියාව, අරාබිය ආශ්‍රිත රටවල් සහ ඕස්ට්‍රේලියාවේ බිහිසුණු රථ වාහන අනතුරැ ඇතිවීම්ද ආගමික නායකයකුට මාරක ද උද්ගත වේ. එසේම විද්‍යාත්මක නව සොයා ගැනීමක් ද ඇති වන කාලයකි. පෘතුගාලය, ලිබියාව, සහරා කාන්තාරය අවට රටවල් ආශ්‍රිතව කර්මාන්තශාලා ගොඩනැගිලි හදිසි ගිනි තැබීමකට ලක්වීමක්ද වේ. 

මීළඟට ඔබට

මේෂ - වැඩට බාධා

යහපත් ඵල අත්නොවනු ඇත. ඔබගේ යම් යම් වැඩකටයුතුවලට බාධා ඇති වනු ඇත. විදේශ ගතවීමේ අපේක්ෂාවෙන් සිටි අයගේ බලාපොරොත්තු ඉෂ්ඨ කරගත හැකිවන අතර ඇස්වල පීඩා මතුවෙයි.

වෘෂභ - දේශපාලනයට හොඳයි

ඔබට යහපත් ඵල අත්වනු ඇත. දේශපාලන කටයුතුවල නිතර වී සිටින අයට ද ශුභ ඵල ලැබේ. අන් අයගේ උදව් උපකාර ලැබුණද යම් යම් කටයුතු අපහසුවීම්වලට ලක්වනු ඇත.

මිථුන - උසස් වීම්

සේවා ස්ථානය ආශ්‍රිතව යම්කිසි ගැටලුවක් පැවතියේ නම් එම ප්‍රශ්න දුරු කරගත හැකි කාලයක් වෙයි. සේවා උසස් වීමක් අපේක්ෂා කළ අයගේ බලාපොරොත්තු ඉෂ්ඨ කරගත හැකිවනු ඇත. සිතේ සහනය ඇතිවනු ඇත.

කටක - සතුරන් මැඩලයි

යහපත් ඵල අත්වන අතර ඔබගේ සියලු කටයුතු සාර්ථක වේ. විදේශ ගතව අධ්‍යාපනයේ නිරත වීමට අපේක්ෂා කළ අයගේ බලාපොරොත්තු ඉෂ්ඨ කරගත හැකිවනු ඇත. ලේඛන කටයුතුවල නිරත අයට ද ශුභඵල අත්වේ. තමන්ට එරෙහිව පැවති සතුරු උපද්‍රව මැඩ පැවැත්විය හැකි වනු ඇත.

සිංහ - අතපසු වීම්

ඔබට යහපත් නොවනු ඇත. පවුල් දිවියේද ප්‍රශ්න ඇතිවන අතර යම් යම් කටයුතු අතපසුවීම්වලට ලක්වනු ඇත. ගමන්වලින් හදිසි ශරීර පීඩා ඇතිවිය හැකි බැවින් කල්පනාකාරීවන්න.

කන්‍යා - සිරුරේ ලේ දෝෂ

අන් අයගේ ගැටලුවලට මැදි නොවී සිටිය යුතුය. එම ප්‍රශ්නවලට මැදිවීම තුළින් තමාට අවාසියක් ඇතිවනු ඇත. නීතිමය ගැටලුවක් ඇතිවිය හැකි බැවින් පරිස්සම් වන්න. ශරීරයේ උෂ්ණ ගතියද ලේ දෝෂ ද මතුවනු ඇත.

තුලා - විදේශ ගමන්

ඔබට එරෙහිව පැවති සතුරු උපද්‍රව දුරුකර ගත හැකි වනු ඇත. ඔබගේ උත්සාහයේ තරමට ඵල අත්කර ගත නොහැකි කාලයක් වන අතර දුර ගමන් විදේශ ගමන් අපේක්ෂාවන් ඉෂ්ඨ කරගත හැකි වනු ඇත. 

වෘශ්චික - නිතර සතුටෙන්

යම් යම් කටයුතු අතපසුවීම් ප්‍රමාදවීම් ඇතිවන අතර නිතර සතුටින් කාලය ගත කරන්නාවූත් කාලයක් වනු ඇත. යම් යම් කටයුතුවලට නොබියව ඉදිරිපත් වේ. යහපත් ඵලද ලබාගන්නාවූ කාලයක් වේ.

ධනු - සතුරන් පසුබසී

යහපත් ඵල අත්වනු ඇත. ඔබගේ කටයුතු සාර්ථක වන අතර සිතේ සහනය අඩු වූවද සේවා ස්ථානය ආශ්‍රිතව පැවති ප්‍රශ්න මඟහරවා ගතහැකි වනු ඇත. ඔබට එරෙහි සතුරු උපද්‍රවද මඟහරවා ගතහැකි කාලයක් වේ.

මකර - උරම හිමිකම් ලැබේ

නීතිමය ප්‍රශ්නයකට මැදිවිය හැකි බැවින් කල්පනාකාරීව කටයුතු කරන්න. උරුම හිමිකමක් ලබා ගැනීමට හැකිවනු ඇත. තමන් කරන කටයුතුවල ප්‍රමාද ගති අතපසු වීම්ද ඇතිවනු ඇත. ශරීරයේ ලේ ආශ්‍රිත පීඩා මතුවන කාලයකි.

කුම්භ - ආර්ථික අපහසුතා

පවුල් දිවියේ සමගියට බාධා ඇති වන්නාවූ කාලයක් වන අතර ආර්ථික අපහසුතා ද ඇතිවනු ඇත. තමාගේ උත්සාහයේ තරමට ලැබෙන්නා වූ ඵලය අඩු කාලයක් වන අතර ඇස් ආශ්‍රිත පීඩාවක් ඇතිවනු ඇත.

මීන - සිත් අමනාපකම්

තම මතයට වැඩ කිරීමට යාම නිසා හිතවතුන් සමඟ සිත් අමනාපකම් ඇතිකරගනු ඇත. විශාල අන්දමෙන් මුදල් යොදවා කටයුතු කිරීමට සුදුසු කාලයක් නොවනු ඇත. සේවා ස්ථානයේ පැවති ප්‍රශ්න මඟහැරි යන අතර විදේශ ගමන් බලාපොරොත්තු ඉෂ්ඨ කරගත හැකි වනු ඇත.

ජ්‍යොතිෂ නන්දන
ප්‍රවීණ ජ්‍යොතිෂවේදි ජ්‍යොතිෂාචාර්ය
රේණුක වික්‍රමසිංහ
සුවණැන ජ්‍යොතිෂ පර්යේෂණායතනය
ඔලබොඩුව, ගෝනපල