පාලකයන්ගේ රහස් වැඩ එළියට

ග්‍රහලොව මනාලිය වූ සිකුරු ග්‍රහයා හා හදිසි කඩාකප්පල්කාරී ක්ෂණික විපත් ඇති කිරීමට සමත් වූ නැප්චූන් ද එකිනෙකා අතර ගැටුමක් ඇතිකර ගැනීමක් 2019 අප්‍රේල් 10 වැනි බුධ දින උදේ 11 පසුවී විනාඩි 45ට සිදුවෙයි. සෙනසුරුට අයත් කුම්භ රාශියෙහි බ්‍රහස්පතිට අයත් පුවපුටුව නැකතේ ප්‍රථම පාදයේදී සිකුරු හා නැප්චූන් එකම අංශකයක ගමන් කරමින් එකිනෙකා අභිබවා යාමට උත්සාහ දැරීමෙන් මෙය සිදුවේ. ඒ හේතුවෙන් සිකුරුගේ හා නැප්චූන්ගේ අයහපත් වූ ග්‍රහ කිරණ පෘථිවිය වෙතට එල්ල වනු ඇත. මෙහි බලපෑම ඉදිරි මාස 2ක් පමණ පවතී.

අප රට කෙරෙහි අවධානය යොමු කිරීමේදී කුඩා දරුවන්ට යම් යම් හේතු මත සිදුවන අනතුරැ ඉහළ යන අතර ගංඟා, මුහුදු අසල දියනෑම් කිරීමේදී ඉතා පරිස්සම් විය යුතු වේ. අනාරක්ෂිත ළිං ආශ්‍රිතව ගැවසීමේදීද වැඩි අවධානය යොමුකළ යුතුය. මේ කාලයේ ස්ත්‍රී දූෂණ ක්‍රියා ද පහරදීම් ද වාර්තා වනු ඇත. මිනිසුන් බුද්ධියෙන් තොරව කටයුතු කරන කාලසීමාවක් වන අතර රහසිගත යම් යම් කුමන්ත්‍රණ ක්‍රියා කරළියට එන කාලයක් වේ. රටේ දික්කසාද වීම් වැඩි කාලයකි.

විදේශීය වශයෙන් නව නීති සම්පාදනය වන කාලයක් වේ. විශේෂයෙන් කාන්තාවන් සම්බන්ධ නීති ඇතිවනු ඇත. මන්ත්‍රීවරැන් සම්බන්ධ විවිධ වූ අයහපත් පුවත් ප්‍රචලිත වනු ඇත. පාලකයන්ගේ රහසිගත ක්‍රියා හෙළිවන කාලයක් ද වේ.

මේෂ - සමගියට බාධා

සමාජ සේවා කටයුතු, දේශපාලන කටයුතුවල නිරත අයට අයහපත් වන කාලයක් වේ. තම මිතුරන්ගෙන් ද ප්‍රශ්න ඇතිවන කාලයක් වන අතර පවුල් දිවියේද සමගියට බාධා මතුවනු ඇත.

වෘෂභ - කරදරවලට විසඳුම්

සේවා ස්ථානය ආශ්‍රිත පැවති කරදරවලට යම්තාක් දුරට විසඳුම් ලැබෙන කාලයක් වේ. අලුතින් දේපලක් මිලදී ගැනීම යහපත් වනු ඇත. පවුල් දිවියේ සමගිය වර්ධනය වන කාලයක් ද වේ.

මිථුන - මිතුරන් අමනාප වීම්

වැඩිපුර තමා ගැන සිතා කටයුතු කිරීමට යාම නිසා තම හිතුමිතුරන් තමා සමඟ අමනාප වීම් ඇතිවන කාලයක් වේ. ලේඛන කටයුතුවල නිරත වී සිටින අයට සාර්ථක නිර්මාණ බිහිකිරීමට අදහස් මතුවන කාලයකි.

කටක - ආර්ථික අපහසුතා

ඔබට එතරම් යහපත් නොවන කාලයකි. ඔබගේ කටයුතුවලට විවිධ පාර්ශවවලින් බාධා ඇතිවනු ඇත. ආර්ථික අපහසුතා ඇතිවීමෙන් පවුල් දිවියේ ද ප්‍රශ්න මතුවන වකවානුවක් වේ.

සිංහ - නීති ගැටලු

යම්කිසි ආකාරයක නීතිමය ප්‍රශ්නයකට මැදිවිය හැකි බැවින් ප්‍රවේසම් වන්න. ව්‍යාපාරික කටයුතුවල නිරත වී සිටින අයට යහපත් වේ. අවිවාහක අයට මංගල යෝජනාවක් ස්ථිර කරගත හැකිවනු ඇත.

කන්‍යා - ස්ථාන මාරු ඉටුවේ

ඔබ කරන කටයුතුවලට විවිධ වූ අයගෙන් බාධා එල්ල වන්නාවූත් කාලයක් වේ. සේවා ස්ථානය ආශ්‍රිතවද ගැටලු ඇතිවන අතර ස්ථාන මාරුවක් අපේක්ෂා කළ අයගේ බලාපොරොත්තු ඉෂ්ඨ වනු ඇත.

තුලා - ලිංගික ආකර්ශනය

ඔබගේ කටයුතුවලට පැවති බාධා දුරුවී යන කාලයක් වේ. විරුද්ධ ලිංගික ආකර්ශනයට ලක්වනු ඇත. හවුල් කටයුතුවලින් ඵල අත්වන අතර හිතමිතුරන්ගෙන් ද උදව් උපකාර ලැබෙන කාලයකි.

වෘශ්චික - නිවෙස අලුත්වැඩියා

උරුම හිමිකම් අත්කරගත හැකි කාලයක් වන අතර නිවෙසේ අලුත්වැඩියාවක් කරන්නාවූත් සමයකි. සේවා ස්ථානයේ සේවකයන් සමඟ හිතවත්කම් වර්ධනය වන කාලයකි. තමාගේ යම් යම් කටයුතුවලට විවිධ පාර්ශවවලින් බාධා ඇතිකරනු ඇත.

ධනු - ලේඛනයට හොඳයි

ලේඛන කටයුතුවල නිරතවී සිටින අයට යහපත් ඵල අත්වන අතර සිතේ සතුට ඇතිවනු ඇත. බාහිර කටයුතු, ක්‍රීඩා හා කලා කටයුතුවල නිරතවී සිටින අයට තම විශේෂ හැකියාවන් දැක්විය හැකි කාලයක් වේ.

මකර - ආදරය ලැබේ

ඔබගේ යම් යම් කටයුතුවලට විවිධ බාධා ඇතිවන අතර අන් අයගේ ආදරයට ලක්වන කාලයක් වේ. පවුල් දිවියේද සමගිය වර්ධනය වන අතර ආර්ථික වාසි අත්වන කාලයක් වේ.

කුම්භ - ව්‍යාපාර ලාභ

අන් අය අතර කැපීපෙනෙන තත්ත්වයට පත්වන අතර ව්‍යාපාරික කටයුතුවල නිරතවී සිටින අයට ශුභ ඵල අත්වනු ඇත. විරුද්ධ ලිංගික ආකර්ශනයට ලක්වන කාලයක් වන අතර අවිවාහක අයට මංගල යෝජනා ස්ථිර වනු ඇත.

මීන - දුර ගමන්

ඔබට එතරම් යහපත් නොවනු ඇත. ඔබගේ කටයුතුවලට විවිධ බාධා මතුවනු ඇත. දුර ගමන් යෙදෙන අතර පවුල් දිවියේ සමගිය වර්ධනය වන කාලයකි. සතුන්ගෙන් ශරීරයට පීඩාවක් ඇතිවිය හැකි බැවින් පරිස්සම් වන්න.

ජ්‍යොතිෂ නන්දන
ප්‍රවීණ ජ්‍යොතිෂවේදි ජ්‍යොතිෂාචාර්ය
රේණුක වික්‍රමසිංහ
සුවණැන ජ්‍යොතිෂ පර්යේෂණායතනය
ඔලබොඩුව, ගෝනපල