බිඳුණුවැව අද්දර පාරාදීසය High Cairn Boutique හෝටලය
බණ්ඩාරවෙල අපූරු දේශගුණයක් විඳින ගමන් සුවපහසු නිවාඩුවක් ගතකරන්න සුදුසුම සංචාරක ගමනාන්තයක් විදිහට තමයි ප්‍රසිද්ධ. ඒත් මෑතකාලීනව ත්‍රාසජනක අත්දැකීම් විඳින ගමන් විනෝදාස්වාදය සපිරි සුවපහසු නිවාඩුවක් ගත කරන්නත් බණ්ඩාරවෙල අපූරු ස්ථානයක්.
High Cairn Boutique හෝටලය බණ්ඩාරවෙල තියෙන ජනප්‍රිය සුවපහසු සංචාරක ගමනාන්තයක්. රථගාල් පහසුකම්, පැය 24ම ක්‍රියාත්මක කාමර සේවාවන්, නොමිලේ සැපයෙන Wi-Fi පහසුකම් වගේ පහසුකම් රැසක් මෙහි අන්තර්ගතයි. මුහුදු මට්ටමෙන් අඩි 3800ක් උසින් පිහිටි බණ්ඩාරවෙල සංචාරක පාරාදීසය කඳු පංති, වනාන්තර, දර්ශනීය දියඇලි, පුරාවිද්‍යාත්මක ස්ථාන, ගොවිපොළවල්, තේ වතු ආදියෙන් පොහොසත්.
High Cairn Boutique හෝටලය පිහිටලා තියෙන්නේ බණ්ඩාරවෙල බිඳුණුවැව අසල. ඇල්ලට නම් මිනිත්තු 15ක දුරින්. බණ්ඩාරවෙල නගරයට මිනිත්තු 10ක් පමණ ඈතින්. මේ හෝටලය ප්‍රදේශයේ තිබෙන ඉහළ පෙළේ නිවාඩු නිකේතන අතරින් එකක්. ඊට වැඩිහිටියන් 25 දෙනකු පහසුකම් සැපයෙන සුවපහසු කාමර නවයක් ඇතුළත්. 2018 මාර්තු මාසේ මෙහි කටයුතු ඇරඹුණත් මෙය 1862 දී ස්කොට්ලන්ත වගාකරුවකු විසින් ඉදිකරන ලද විශ්මිත බංගලාවක්. මේ නිවාඩු නිකේතනය මහල් දෙකකින් සමන්විතයි. කඳුකර දර්ශන සහිත පවුල් දෙකට සුඛෝපභෝගී පහසුකම් සපයන කාමර දෙකක් High Cairn Boutique හෝටලයේ පිහිටලා තිබෙනවා.
ආහාරපාන ගැන කතාකරද්දී සම්ප්‍රදායික ආහාර වර්ග මෙන්ම නවතාවයෙන් යුතු ආහාරත් අමුත්තන්ට රස බලන්න පුළුවන්. La Carte ක්‍රමයට ආහාර පිළිගැනුණත් හෝටලයේ සිටින පළපුරුදු සූපවේදීන් ඕනෑම කෑමක් සකසන්න සූදානමින් ඉන්නවා. කොහොම වුණත් ජාත්‍යන්තර ප්‍රමිතියේ ආහාර අත්දැකීමක් විඳගන්න මෙහි එන කාටත් අවකාශ තිබෙනවා.
කඳුකර උද්‍යාන දර්ශනයක් එක්ක සීත කඳුකරයේ අපූරු අත්දැකීමක් ලබාගන්න ගමන් මෙහි එන සංචාරකයන්ට දුන්හිඳ, දියලුම, රාවණා ඇල්ල ආදී දියඇලි නරඹන්න යන්නත් පුළුවන්. ඊට අවශ්‍ය මඟපෙන්වීම හෝටලයෙන්ම ලබාගත හැකියි.
සනත් වීරසූරිය
සේයාරූ - ශාන් බන්දු වීරසිංහ