අනංගයාට වැඩ වැඩිවේ
ග්‍රහලොව මනාලිය වූ සිකුරු ග්‍රහයා තමාට සතුරු රාශි භවනක් වූ රවිට අයත් සිංහ රාශියට 2019 අගෝස්තු 16 වැනි කිවි දින රාත්‍රී 8 පසුවී විනාඩි 39ට පිවිසේ. එහිදී කේතුට අයත් මා නැකතේ සම්පූර්ණවත් කිවිට අයත් පුවපල් නැකතේ සම්පූර්ණවත් රවිට අයත් උත්‍රපල් නැකතේ ප්‍රථම පාදයෙන් 2019 සැප්තැම්බර් මස 10 වැනි කුජ දින පාන්දර 1 පසුවී විනාඩි 42 දක්වාම රජුගේ නිවසේ ගමන් කරනු ඇත.
සිකුරැ සිංහ රාශිගත වීම නිසා අප රටට ඇති කරන්නා වූ බලපෑම පිළිබඳව විමසා බලමු.
වැඩ කරන ජනතාව වෙනුවෙන් යම් යම් වරප්‍රසාද රජය විසින් ලබාදෙන අතර විදේශීය සම්බන්ධතා ගොඩනැගෙනු ඇත. රට තුළ විවාහ ගිවිස ගැනීම් බහුල වන කාලයකි. මහජනයා අතර අසත්‍ය පුවත් පැතිර යාමෙන් සිත් කැළඹීම් ඇතිවනු ඇත. ස්ත්‍රීන්ට හා ළමයින්ට විවිධ වූ කරදර ඇතිවන කාලයක් බැවින් පරිස්සම් වීම වැදගත් වේ. මහජන නියෝජිතවරැන් මන්ත්‍රීවරැන් තම පක්ෂය අතහැර වෙනත් පක්ෂ කරා මාරැවන කාලයක් ද වේ.
විදේශීය වශයෙන් විමසා බැලීමේදී අරාබියාව, රැසියාව, පෝලන්තය, ස්විඩනය ආශ්‍රිතව උසස් ප්‍රභූ විවාහ මංගල සිදුවනු ඇත. පාර්ලිමේන්තු තුළ සිදුවන කටයුතු පිළිබඳව මහජන විරෝධය එල්ල වෙයි. ස්ත්‍රීන් හා ළමයින් සම්බන්ධ නව නීති පනත් ඇතිවනු ඇත. ඔස්ට්‍රේලියාව, හංගේරියාව, ස්පාඤ්ඤ, ප්‍රංශය, මැඩගස්කරය යන රටවල යම් යම් නීති විරෝධී ක්‍රියා වර්ධනය වීමක් ද අපරාධ ක්‍රියා සම්බන්ධ නඩු බහුල වීමට ද ඉඩ ඇත.
ඉතාලිය, සිසිලිය, රුමෙනියාව, අමෙරිකානු රටවල්වල විනෝද ස්ථාන, සමාජ ශාලා ආශ්‍රිතව හදිසි ගැටුම් ද, ත්‍රස්ත ප්‍රහාර ඇතිවීම් ද, කාන්තාවන්ට කුඩා ළමයින්ට පහරදීම් ද, ඝාතනය කිරීම් ද වාර්තා වනු ඇත.
මේෂ - හවුලට ශුභයි
විරුද්ධ ලිංගික බැඳීම් ඇතිවන කාලයක් වන අතර හවුල් කටයුතු, සමාජ සේවා කටයුතුවල නිරත වී සිටින අයට ශුභ ඵල ඇතිවන කාලයක් ද වේ.
වෘෂභ - විසිතුරු දේ මිලට
උරුම හිමිකම් ලබාගත හැකි කාලයකි. විසිතුරු අලංකාර දේවල් මිලදී ගන්නා වූත් කාලයකි. තම කටයුතුවලට විවිධ පාර්ශවවලින් බාධා ඇති කරන්නා වූත් කාලයක් ද වේ.
මිථුන - නව නිර්මාණ
මාධ්‍ය ක්ෂේත්‍රයේ කටයුතු කරන අයට ඉතා යහපත් ඵල අත්වන කාලයක් වේ. වැඩිපුර තමා ගැන පමණක් සිතා කටයුතු කිරීමට යාමෙන් තම හිතවතුන් තමා සමඟ සිත් අමනාපකම් ඇති කරගනු ඇත. නව නිර්මාණයක් බිහි කිරීමට යහපත් වන කාලයක් ද වේ.
කටක - සිත් බැඳීම් වැඩි වේ
පවුල් දිවියේ සමගිය වර්ධනය වන වකවානුවකි. ඔබගේ යම් යම් කටයුතුවලට විවිධ පාර්ශවවලින් බාධා ඇති කරන්නා වූත් වකවානුවක් වනු ඇත. සේවා ස්ථානය ආශ්‍රිතව අන් අය සමඟ සිත් බැඳීම් වර්ධනය වනු ඇත. උගුරේ පීඩාවක් මතුවිය හැක.
සිංහ - මංගල යෝජනා
අන් අය අතර කැපීපෙනෙන තත්ත්වයට පත්වනු ඇත. අවිවාහක අයට මංගල යෝජනා ඉදිරිපත් වනු ඇත. ආගමික කටයුතු වෙනුවෙන් සහභාගි වීමට අවකාශ ලැබේ. නව ව්‍යාපාරයක් ආරම්භ කිරීමකට ද යහපත් වන්නා වූත් කාලයක් වනු ඇත.
කන්‍යා - දේපල හිමිකම්
ඔබගේ යම් යම් කටයුතුවලට විවිධ වූ බාධා මතුවනු ඇත. පවුල් දිවියේ සමගියට බාධා ඇතිවන අතර ඉවසීමෙන් කටයුතු කළ යුතු කාලයක් වනු ඇත. ඉඩමක් හෝ වාහනයක් ලබාගැනීමට උත්සාහ දරන්නා වූත් කාලසීමාවක් වේ.
තුලා - උදව් උපකාර
සමාජ සේවා කටයුතුවල නිරත වී සිටින අයට යහපත් වන අතර හිතමිතුරන්ගෙන් ද උදව් උපකාර අත්වන්නා වූත් කාල වකවානුවක් ද වේ. හවුල් කටයුතුවලින් ද ඵල අත්වනු ඇත. ලේඛන කටයුතුවල නිරත අයට නව නිර්මාණ බිහි කිරීමට යහපත් වන කාලයකි.
වෘශ්චික - මැණික් මතු වේ
පතල් ආශ්‍රිතව කටයුතු කරන අයට ඉතා යහපත් වන කාලයකි. අවිවාහක අයට මංගල යෝජනා ඉදිරිපත් වෙයි. ඇසුරු කිරීමේදී නොගැලපෙන අය හමුවිය හැක. සේවා ස්ථානය ආශ්‍රිතව පැවති ප්‍රශ්න ද මගහැරී යනු ඇත.
ධනු - කෙටි ගමන්
සන්නිවේදන කටයුතු, මාධ්‍ය කටයුතුවල නිරත වී සිටින අයට යහපත් ඵල අත්වන අතර කෙටි ගමන්වලින් ඵල අත්වනු ඇත. ආගමික කටයුතු වෙනුවෙන් වැඩිපුර කාලය ගත කරනු ඇත.
මකර - සේවා වෙනසකට
ඔබගේ කටයුතුවලට විවි බාධා මතුවන කාලයකි. සේවා ස්ථානය වෙනස් කිරීමට සිත් ඇතිවනු ඇත. දරුවන් ලැබෙන්නට සිටින අයකු නම් පරිස්සම් විය යුතු කාලසීමාවක් වනු ඇත.
කුම්භ - කීර්තිය අත්වේ
ඔබට යහපත් ඵල ඇතිවනු ඇත. ව්‍යාපාරික කටයුතුවල නිරත වී සිටින අයට ලාභ අත්වනු ඇත. පවුල් දිවියේ ද සමගිය වර්ධනය වන අතර කීර්තිය අත්වන කාලයක් ද වනු ඇත.
මීන - සතුරු පීඩා එළියට
ඔබගේ කටයුතුවලට විවිධ බාධා ඇතිවන කාලයක් වනු ඇත. සැඟවුණු සතුරු පීඩා ක්‍රියාත්මක වන කාලයක් ද වේ. ගංඟා, මුහුදු ආශ්‍රිතව කටයුතු කිරීමේදී පරිස්සම් විය යුතු සමයකි.
ජ්‍යොතිෂ නන්දන
ප්‍රවීණ ජ්‍යොතිෂවේදි ජ්‍යොතිෂාචාර්ය
රේණුක වික්‍රමසිංහ
සුවණැන ජ්‍යොතිෂ පර්යේෂණායතනය
ඔලබොඩුව, ගෝනපල