කොරෝනා ජංජාලය
නිදහසේ හුස්මක් කටක් ගන්නට පටන් ගත්තා විතරයි. ආයෙත් මේ මළඉළව් කොරෝනාව මතු වුණා. දැන් ඉතින් ආපහු, නහය කට වහගෙන ඉන්න තමයි වෙන්නේ.
මෙය, මේ දිනවල නිතර ඇසෙන මැසිවිල්ලකි. නැත්තටම නැතිවුණා යැයි කියූ හෝ සිතූ කොවිඩ්-19 වයිරසය, මුහුණු ආවරණ නොහොත් ෆේක් මාස්ක් මසමින් තිබූ ඇඟලුම් කම්හලකින්ම යළි %හිස^ එසැවීම එක් අතකින්, සමාජයට කළ සරදමක් බඳුය.
දැන් ඉතින් කරන්නට දෙයක් නැත. මාස්ක් එකට මුහුණ දිය යුතුය. රුකියාව, පාසල ඔන් ලයින් කළ යුතුය.
මුහුණු ආවරණ නොපළඳින අයට විරුද්ධව කතා කරන්නැයි, මාධ්‍ය මගින් ද අවවාද කෙරෙනු අසන්නට ලැබුණි. ඊයේ පෙරේදා, මාස්ක් නොපැළඳ බසයකට ගොඩවූවකුට, මුලින්ම විරුද්ධ වූයේ කොන්දොස්තරය. මගියා, හැඩි දැඩි පුද්ගලයෙකි. ඔහු, කෙසඟ කොන්දොස්තර දෙස රවා බැලුවේය.
ඇයි, මේක මිනුවන්ගොඩ බස් එකද?
ඔහු සරදම් සිනාවක් මුවට නංවාගෙන ඇසුවේය.
ඉන්පසු වටපිට බැලුවේ, මගීන්ගෙන් සිනාවක් බලාපොරොත්තුවෙනි. එහෙත්, එය එසේ නොවීය. මාස්ක් එකක් නැත්තං, බස් එකෙන් බහිනවා. යැයි, මගීහු කෑගසන්නට ගත්හ. අවසානයේ ප්‍රශ්නය විසඳුණේ, කාගෙන් හෝ ලැබුණු මුව ආවරණයක පිහිටෙනි.
මෑතකදී, පාසලක් ඇරී, පිටතට එන ගුරුවරියන් පිරිසක්, තම තමන්ගේ සාරිවලට ගැලපෙන වර්ණයෙන් මාස්ක් පැළඳ සිටිනු දුටුවෙමි. දැන් එය විලාසිතාවක් බවට පත්ව ඇති සේය. විවිධ මිල ගණන්වලට, විවිධ වර්ණ, විවිධ මෝස්තර හා පණිවිඩ සහිත මාස්ක් වෙළෙඳපොළට එමින් පවතී. විදේශයක නිපදවුණු එබඳු වැස්මක, READ MY EYES යනුවෙන් ඉල්ලීමක් සඳහන්ව තිබුණි. පැළඳ ගත් විට, සිනා මුවක් පෙන්වන මුහුණු වැසුම් සේම, විවිධ සතුන්ගේ මුහුණු මවන නිර්මාණයන් ද වෙළෙඳපොළට එමින් පවතී.
අමෙරිකාවේ, ෆ්ලොරිඩාවේ වෙසෙන, විකට ගීත ගායනයෙහි ප්‍රකට, ටොම් මැක්ගවර්ස්ගේ අලුත්ම ගීතය Put on your Mask ය. තවම නිපදවී නැත්තේ, මාස්ක් හැඩයෙන් යුත් කෑම වර්ග පමණි.
නිව් නෝමල් නමැති කොරෝනා උප සංස්කෘතියට මිනිසුන් කැමැත්තෙන් හෝ අකැමැත්තෙන් හුරුපුරුදු වනු ඇත. ^නිව් හරමානිස් ස්ටෝර්ස්, නිව් ජයමංගල හෝටලය, නිව් සිරිපාල හාර්ඩ්වෙයාර් වැනි නම් සේය.
සිරි ලංකාව, ඉන්දියාව වැනි රටවල, රෙදි වැලට අලුතින් එක්වී ඇත්තේ ද, සෝදන ලද මුහුණු වැසුම්ය. පළඳින වතාවක් පාසා, ඒවා විසිකර දැමීමට තරම් ආර්ථික ශක්තියක් අපේ මිනිසුනට නැත. ඒ නිසා, සෝද සෝදා ඇඳිය හැකි, මුව වැසුම්, ගෙදර දී හෝ නිපදවා ගැනීමට ඔවුන්ට සිදු වී තිබේ.
කොරෝනාවට පෙර නම්, ගමනක් යාමට නිවෙසින් පිටවන උදවිය ආපසු හැරුණේ, පසුම්බිය, උපැස් යුවළ, දුරකථනය හෝ කුඩය වැනි දෙයක් අමතක වීමෙනි. දැන් මුහුණු වැස්ම ද ඒ අමතක ලැයිස්තුවට එක්වී තිබේ. කාන්තාවෝ නම්, තම හෑන්ඩ් බෑග් තුළ ඇති අත්‍යවශ්‍ය භාණ්ඩ අතරට, මුහුණු වැසුම් කිහිපයක් ද දමාගැනීමට පුරුදුව සිටිති.
ඔන් ලයින් ක්‍රමයට ද, කොරෝනා උප සංස්කෘතිය තුළ ලැබෙන්නේ වැදගත් තැනකි. ඔන් ලයින් වැඩ වෙලාවට ගෙවල් ඇතුළේ ශබ්ද තහනම්ය. පාරේ යන, පොල්කටු හෝ පරණ බඩු එකතු කරන්නන්, චූං පාං කාරයන්, %ඔන් ලයින්^ ක්‍රමයේ සතුරන්ය. මම ඔන් ලයින්. ශබ්ද කිරීමෙන් වළකින්න. වැනි දැන්වීම් පුවරු, දොරකඩ සවිකෙරෙන කාලය ද, වැඩි ඈතක නොවේ.
මුව සහ නාසය වැසෙන්නට පැළඳ ගත යුතු %මාස්ක්^, ගෙලෙහි පැළඳ සිටීම ද, අලුත්ම සිරිතකි. එසේම, මුහුණට දමාගෙන සිටින මාස්ක්, මාධ්‍යවේදීන්ගේ කැමරා දකින විට පහත හෙළීම දේශපාලනඥයන්ගේ මෝස්තරයකි.
බෙල්ලට දමාගෙන සිටින, මුහුණු වැස්ම, පොලිස් නිලධාරීන් දකින විට, ඉහළට ඔසවා ගැනීම රියැදුරන්ගේ සිරිතය. මෑතක දී, එසේ හදිසියේ මුහුණු වැස්ම දමාගැනීමට ගිය ත්‍රිරෝද රියැදුරකුගේ මුවට නොව දෑසට එය වැටුණෙන්, ඔහු නැවතුණේ පොලිස් නිලධාරියාගේ ඇඟෙහිය!
මෑතක දී නිකුත් වූ නිව් යෝකර් සඟරාවක මුල් පිටුවෙහි දැක්වෙන්නේ ද, මුව වෙනුවට දෑස් වැසෙන සේ මාස්ක් එක පැළඳ සිටි ඩොනල්ඩ් ට්‍රම්ප්ගේ විකට චිත්‍රයකි! එහි යටි අරුත අමුතුවෙන් කිව යුතු නැත.
ට්‍රම්ප්, මුහුණු වැස්ම නැතිව ජනතාව හමුවට ගියේ, ඔහුගේ යැංකි ආඩම්බරය පෙන්වීමටය. එහෙත් අවසානයේ දී, කොරෝනාව ඔහුට ද මට්ටු කළේය. ට්‍රම්ප්ගේ කට තවත් උල් වුණේය. කොරෝනාවේ හැටි එහෙමය. එය ලොකු පොඩිකම්, නිලතල, ධන බල, පැන්සයකට නොසලකයි.
කොරෝනා උප සංස්කෘතියෙන් සමාජ මාධ්‍ය විහිළුකාරයෝ ද වැඩ ගැනීමට පටන්ගෙන සිටිති. මෑතකදී එහි දුටු එක් චිත්‍රයක, තරුණියක් පුවත්පත්වලින් කළ සාරියක් හැඳ සිටී. එහි පහළින් මෙසේ දැක්වේ.
ඔෆීස් ඇන්දා.
ගෙදර ආවා.
පුච්චල දැම්මා.
සාරියත් නෑ - කොරෝනත් නෑ.
සමාජ මාධ්‍ය ජාලයේ තවත් තැනක, මෙබඳු පාඨයක් විය.
දේශපාලනඥයන් මැතිවරණයෙන් පසු, දක්නට නැත්තේ ඇයි? ඔවුන් සමාජ දුරස්ථතාවේ අගය දන්නා නිසාය.
කොරෝනා සමයේ එංගලන්තයේ අවන්හලක් ඉදිරියෙහි, මෙබඳු දැන්වීමක් විය.
ටයිටැනික් නැවේ සිටි බෑන්ඩ් කණ්ඩායම, මෙම අවන්හලේ සේවයෙහි යෙදී සිටිති.
ඒ අසල තිබූ අවන්හල ඉදිරියෙහි මෙබඳු දැන්වීමක් ප්‍රදර්ශනය කෙරුණි
අද විශේෂ: රෝමයේ සිට පැමිණි නීරෝගේ වයලීන් වාදනය.
එක් තරුණයෙක්, කොරෝනා ආතතියෙන් මිදෙනු පිණිස තම පෙම්වතියට, ගමනක් යාමට කතා කළේය.
සොරි අනේ. මම මේ දවස්වල ලොක් ඩවුන්.
ඇය පිළිතුරු දුන්නාය.
I කපිල කුමාර කාලිංග