දේශපාලන හවුල් බිඳ වැටීමක්
- ප්‍රබල මන්ත්‍රීවරයකුට මාරක
මේ වනවිටත් ග්‍රහ මණ්ඩලයේ රජ වූ රවි තමාට මිශ්‍ර රාශියක් වූ වෘශ්චික රාශියෙහි 2022 දෙසැම්බර් 16 වැනිදා දක්වාත් ඉන් අනතුරුව මිශ්‍ර රාශි භවනක් වන ධනු රාශියෙහි 2024 ජනවාරි මස 15 දක්වාත් ගමන් කරයි. අඟහරු තමාට ස්වක්ෂේත්‍ර වූ වෘශ්චික රාශියෙහි 2023 දෙසැම්බර් 28 වන දින දක්වාත් ඉන් අනතුරුව තමාට මිත්‍ර රාශිභවනක් වූ ධනු රාශියෙහි 2024 පෙබරවාරි 5 වන දින දක්වාත් ගමන් කරමින්ද සිටී. බුධ ග්‍රහයාද තමාට සම රාශි භවනක් වූ ධනු රාශියේත් බ්‍රහස්පති තමාට මිත්‍ර රාශියක් වූ මේෂ රාශියෙහි වක්‍රව ගමන් කරමින්ද සිකුරු තමාට ස්වක්ෂේත්‍ර වූ රාශි භවනක් වූ තුලා රාශියෙහි 2023 නොවැම්බර් 20 වැනි දින සිට 2023 දෙසැම්බර් 23 වන දින දක්වාත් ගමන් කරමින්ද සිටී. ඒ අතර සෙනසුරු තමාට ස්වක්ෂේත්‍ර රාශියක් වූ කුම්භ රාශියෙහි රාහුට අයත් සියාවස නැකතේ ගමන් කරමින්ද රාහුද මීන රාශි ගතවෙමින්ද යුරේනස් හා නැප්චූන්ද වක්‍ර ගමන්වල යෙදෙමින්ද ඇත. 2023 වසරේ අවසන් යුද සංග්‍රාමය දෙසැම්බර් මස 28 වන ගුරු දින යෙදේ. මුල නැකතේදී බුධ හා අඟහරු යුද වැදීමක් සිදුවනු ඇත.
ඉහත ග්‍රහ තත්ත්වයන් සලකා බැලීමේදී මෙම ඉදිරි වකවානුවද අප රටට යහපත් වූ ඵල අත් නොවන බව කිවයුතුය. රට තුළ සිදුවන අනතුරු මෙන්ම ස්වභාවික විපත්ද බහුලව සිදුවන කාලයක් වේ. තැපැල් කටයුතු ආශ්‍රිත ගැටලුවක් මතුවන අතර දරුවන්ට මෙන්ම වැඩිහිටි අය අතරත් වසංගත රෝග පැතිර යාමක්ද වනු ඇත. රජය කෙරෙහි මහජනයාගේ කලකිරුණු ස්වභාවය තව තවත් වර්ධනය වන කාලයක් වන අතර දුම්රිය අනතුරුද වාර්තා වනු ඇත. හවුල් දේශපාලන පක්ෂ කඩා වැටීමත් පාර්ලිමේන්තුව තුළ කැළඹිලි තත්ත්වයක් ඇතිවීමත් ආණ්ඩුව පවත්වාගෙන යාමට අපහසු තත්ත්වයක් පැන නගින්නාවූත් කාලයක් වන අතර ප්‍රබල මන්ත්‍රීවරයෙකුට මෙන්ම ප්‍රභූ කාන්තාවකට, ප්‍රසිද්ධ උසස් කාන්තාවකටද මාරක ගෙන දෙන කාලයක් වේ.
ලග්න අනුව ඔබට බලපාන අයුරු මෙසේ වෙයි.
► මේෂ - විදේශ ගතවීම්
මෙම වකවානුව ඔබට මිශ්‍ර ඵල ගෙනදෙනු ඇත. නිතර සතුටින් කාලය ගත කිරීමට උත්සාහ දරන කාලයක් වන අතර ඔබට නොගැලපෙන අය සමඟ හිතවත්කම් ඇතිකර ගනු ඇති බැවින් කල්පනාකාරීව කටයුතු කරන්න. යම් යම් හේතු මත නීතිමය ගැටලුවලට මැදිවිය හැකි බැවින් ඒ පිළිබඳව අවධානයෙන් කටයුතු කරන්න. ව්‍යාපාරික කටයුතුවල නිරත වන අයට යහපත් ඵල උදාවන අතර තම එම කටයුතු දියුණුවට පත්වනු ඇත. අවිවාහක අයට මංගල යෝජනා ස්ථීර වන අතර පවුල් දිවියද සමගියද වර්ධනය වනු ඇත. විදේශ ගතවීමේ අපේක්ෂාවෙන් සිටි අයටද යහපත් වකවානුවකි.
► වෘෂභ - දෙවරක් සිතා බලන්න
ඔබගේ උත්සාහය මත දියුණුව අත්කර ගත හැකි කාලයක් වේ. විශාල මුදල් පාඩු ඇතිවනු ඇත. ආගමික කටයුතුවලට වැඩිපුර සිත් යොදවන කාලයක් වේ. ඔබ විසින්ම සිදුකරනු ලබන ක්‍රියාවක් හේතුවෙන් ඔබට අයහපතක් විය හැකි බැවින් දෙවරක් සිතා බලා කටයුතු කළයුතු කාලයකි. විවාහ දිවියේ ගැටලු ආරවුල් ඇතිවිය හැක. එම ප්‍රශ්න දුරදිග නොයවා මැඩ පවත්වා ගත යුතුවේ. නීතිමය ගැටලුවකටද මැදිවිය හැක. දරුවන් ලැබීමට සිටින මව්වරුන් මෙන්ම තම දරුවන්ද ආරක්ෂා කරගැනීම වැදගත් වන කාලයකි. මෙම කාල වකවානුව තුළ ජලය පිරි ස්ථානවල ගැවසීම අහිතකර බැවින් ඒ ආශ්‍රිත දියනෑම් සඳහා යොමු නොවන්න. හෘදය රෝගවලින් පීඩා විඳින අය තම රෝගී තත්ත්වයන් ගැන දැඩි විමසිල්ලෙන් සිටිය යුතු කාලයක්ද වේ.
► මිථුන - සතුරන්ගෙන් පරෙස්සම්වන්න
ඔබට මිශ්‍ර ඵල දෙන කාලයක් වේ. ආගමික කටයුතු සඳහා වැඩිපුර කාලය ගතකරනු ඇත. යම් යම් විසිතුරු දේවල් මිලදී ගැනීම්ද නිවසේ අලංකාර කටයුතු සඳහාද කාලය යොමුකෙරේ. ඔබ පිටස්තර අය වෙනුවෙන් යම්කිසි ආකාරයක ලියවිල්ලකට හෝ ඇපයකට අත්සන් කිරීමක් මෙම කාලය තුළ සිදු කරන්නේ නම් ඒ පිළිබඳව හොඳින් විමසා බලා කටයුතු කරන්න. ඔබ ප්‍රේම සම්බන්ධයකට පැටලී සිටී නම් එම සම්බන්ධය කැඩී යන කාලයක්ද වේ. දුර ගමන් විදේශ ගමන් යාමට සිතා සිටින්නේ නම් එම කටයුතු සාර්ථක බවට පත්වන අතර යම් යම් විරුද්ධවාදීන් සතුරු උපද්‍රව පරාජය කරගෙන ඉදිරියට යාමටද හැකියාව ලැබෙන කාලයක් වේ.
► කටක - අලුත් නිවසක්
ඔබගේ යම් යම් කටයුතුවලට බාධා ඇතිවුවද අන් අය අතර කැපී පෙනෙන තත්ත්වයට ඔබව පත්වනු ඇත. හදිසි කේන්ති ගති ඇති වන කාලයක්ද වේ. තමාගේ යම්කිසි දෙයක් ලබාගැනීමට නොහැකි වුණා නම් එම දේ කෙසේ හෝ නැවත ලබාගන්නට හැකි වේ. අලුතින් නිවසක් ඉදිකිරීමක් හෝ ව්‍යාපාරයක් ඇරඹීමට සිතා සිටින්නේ නම් එම බලාපොරොත්තුද ඉෂ්ඨ කර ගත හැකිවනු ඇත. ඔබගේ කාලත්‍රයාට හදිසි විපත් ගෙන දෙන වකවානුවක්ද වනු ඇත. මුත්‍රා ආශ්‍රිත රෝග තත්ත්වයක් ඇතිවනු ඇත. විශේෂයෙන් වකගුඩු ආශ්‍රිතව රෝගී තත්ත්වයන්ගෙන් පෙලෙන අය අවධානයෙන් සිටිය යුතු කාලයක්ද වේ.
► සිංහ - කැපී පෙනේ
ඔබට යහපත් ඵල උදාවනු ඇත. සහෝදර බැඳීම් ශක්තිමත් වන කාලයක්ද වේ. තමන් අන් අය අතර කැපී පෙනෙන තත්ත්වයට පත්වන අතර ආගමික කටයුතුවලට නැඹුරුව වැඩිවෙයි. ඉඩකඩම් රථවාහන මිලදී ගැනීමටද යහපත් වන කාලයක් වේ. යම් යම් වැඩකටයුතුවලදී ප්‍රමාද ගතිද ඇතිවන අතර මුදල් යොදවා කටයුතු කිරීම්වලදී කල්පනාකාරීද විය යුතු වේ. ඔබගේ දරුවකුගේ ජයග්‍රහණයක් පිළිබඳව අසන්නට ලැබෙන කාලයක්ද වේ. සාර්ථක කෙටිගමන් යෙදෙනු ඇත. ඔබගේ උත්සාහය මත ඔබ කරන කටයුතු රුසක් සාර්ථක වන බව කිවයුතුය.
► කන්‍යා - විදේශ ගමන්
මෙම වකවානුව එතරම් යහපත් නොවනු ඇත. හදිසි කේන්ති ගති පාලනය කරගත යුතුයි. සිතේ සහනය අඩුවන අතර සිතට නිරන්තර දුක් ඇතිවනු ඇත. ඔබට එරෙහි යම් යම් සතුරු උපද්‍රව කල් තියා හඳුනාගත හැකිවනු ඇත. ඔබගේ කලත්‍රයාට හදිසි මාරක විපත් ගෙන දෙන කාලයක් වේ. පිටස්තර ප්‍රශ්නයක් නිසා විපතට පත්වන කාලයක් බැවින් අවධානයෙන් කටයුතු කරන්න. කාර්මික ක්ෂේත්‍රයේ නියුතු අයට තම කටයුතු බාධාවකින් තොරව කරගෙන යාමට හැකි කාලයක් වේ. විදේශ ගමන් අපේක්ෂා කළ අයගේ බලාපොරොත්තු ඉෂ්ඨ වන අතර උගුර ආශ්‍රිත පීඩාවක් මතුවනු ඇත.
► තුලා - වැඩ ප්‍රමාදයි
මිශ්‍ර ඵල අත්වන කාලයක් වේ. අන් අය අතර කැපී පෙනෙන තත්ත්වයට පත්වන අතර තම දේ රුකගෙන කටයුතු කිරීමට උත්සාහ දරුවද විශාල පාඩුද ඇතිවනු ඇත. එම නිසා ගනුදෙනුවලදී කල්පනාකාරී වන්න. අන් අය වෙනුවෙන් ඇපවීමක් සිදු කිරීමටද සිදුවන කාලයක්ද වේ. අධ්‍යාපන කටයුතුවල නිරත දූ දරුවන් අලස ගති පෙන්නුම් කරනු ලබනවා ඇත. යම් යම් වැඩවල ප්‍රමාද ගතිද ඇතිවන අතර විදේශ ගතවීමේ බලාපොරොත්තු ඉෂ්ඨ වන හඬත් උදරය ආශ්‍රිත රෝගාබාධයන් වැඩිවන කාලයක්ද වේ.
► වෘශ්චික - ඉඩකඩම් මිලට ගනී
ඔබට යහපත් වූ ඵල අත්වනු ඇත. ඔබ කරන කටයුතු සාර්ථක බවට පත්වන අතර ඔබට ලබාගත නොහැකිව තිබූ දේවල් ලබාගත හැකිවන කාලයක්ද වේ. හදිසි කේන්ති ගති පාලනය කරගත යුතුයි. ඉඩකඩම් රථවාහන මිලදී ගැනීම්වලටද යහපත් කාලයක් වේ. දේශපාලන කටයුතුවල නිරත අයටද ශුභ ඵල අත්වන අතර දුර ගමන් විදේශ ගමන් බලාපොරොත්තුද ඉෂ්ට කරගත හැකිවනු ඇත. යම් යම් කටයුතුවලදී උත්සාහයේ තරමට ඵල අඩුවීම්ද වන අතර ශරීරයේ ලේ ආශ්‍රිත පීඩාවක් මතුවනු ඇත.
► ධනු - බියට පත්වීම්
ඔබගේ උත්සාහය මත කටයුතු සාර්ථක බවට පත්කර ගත හැකිවෙයි. යම් යම් ආරංචි හේතුවෙන් බියට පත්වීම්ද වනු ඇත. එම නිසා ආරංචි පැතිරීමේදී ඒ පිළිබඳව හොඳින් සොයා බලා තීරණ ගන්න. හිස පහත් නොකරන ගති ඉස්මතු වන කාලයක් වන අතර ආගමික කටයුතුවලටද වැඩියෙන් දායක වනු ඇත. යම් යම් කටයුතුවලදී ඔබ අන් අයට උදව් කිරීම් කළද ඔවුන්ගෙන් ඔබට යහපත් ප්‍රතිඵල අත් නොවනු ඇත. හෘදය ආශ්‍රිත රෝගාබාධවලින් ප්‍රතිකාර ලබාගන්නා අය පරිස්සම් විය යුතු කාලයක් වේ.
► මකර - තැන්පත් ධනය විනාශ වෙයි
ඔබ කරන කටයුතුවලින් සාර්ථක ඵල ඔබට අත්වන කාලයක් වේ. මෙම වකවානුව තුළ ජලය පිරි ස්ථානවල ගැවසීම නොකළ යුතුයි. ආගමික ගමන්ද යෙදෙන අතර විදේශ ගමන් යාමට බලාපොරොත්තුවෙන් සිටි අයගේ බලාපොරොත්තු ඉෂ්ඨ වනු ඇත. යම්කිසි පිටස්තර ආරංචියක් නිසා තමාගේ තැන්පත් ධනය විනාශ වන කාලයක්ද වේ. නව නිවසක පදිංචියට යාමට අපේක්ෂා කළේ නම් එම බලාපොරොත්තුව ඉෂ්ට කරගත හැකි වෙයි. දත් ආශ්‍රිත පීඩාවක් මතුවනු ඇත.
► කුම්භ - අන් අය අතර ජනප්‍රිය වේ
මිශ්‍ර ඵල ගෙන දෙනු ඇත. ඔබ කරන කටයුතුවල සාර්ථක බවක් ගෙන දෙන අතර අන් අය අතර ජනප්‍රිය වන කාලයක්ද වේ. ආගමික කටයුතුවලටද සහභාගි වන අතර සහෝදර බැඳීම් වර්ධනය වනු ඇත. නව රුකියාවක් අපේක්ෂාවෙන් සිටි අයගේ බලාපොරොත්තු ඉෂ්ඨ කරගත හැකිවන නමුත් යම් යම් කටයුතුවලදී ඉතා කල්පනාකාරී විය යුතු අතර නීතිමය ගැටලුවකට මැදිවිය හැක. ඔබගේ කාලත්‍රයාට හදිසි ශරීර පීඩා ගෙන දෙන කාලයක් වනු ඇත. ඔබගේ දියුණුවට එරෙහිව සතුරු උපද්‍රවද ඇතිවෙයි. ඇස් ආශ්‍රිත පීඩා මතුවනු ඇත.
► මීන - නොගැලපෙන මිතුරන්
ඔබට යහපත් නොවන කාලයක් වේ. හදිසි කේන්ති ගති පාලනය කරගත යුතු කාලයකි. අනවශ්‍ය තමාට නොගැලපෙන අය මිතුරන් වන කාලයක් වේ. දුර ගමන් විදේශ ගමන් අපේක්ෂා කළ අයගේ බලාපොරොත්තු ඉෂ්ට වන අතර යම්කිසි නීතිමය ගැටලුවකටද මැදිවිය හැකි බැවින් පරිස්සම් විය යුතු කාලයකි. යම් යම් කටයුතුවලින් ප්‍රයෝජන ලබාගැනීමට යාමේදී ඒවායින් ඔබට ලැබෙන ප්‍රයෝජනද අඩු වන කාලයක් වේ. පවුල් දිවියේ සමගියට බාධා ඇතිවන අතර අවිවාහක අයට නොගැලපෙන සම්බන්ධතා ඇතිවනු ඇත. මුත්‍රා ආශ්‍රිත රෝගාබාධයන් ඇතිවන සමයකි.
දේශාභිමානී, කීර්ති ශ්‍රී ප්‍රවීණ ජ්‍යොතිෂවේදී ජ්‍යොතිෂාචාර්ය
රේණුක වික්‍රමසිංහ
සුවණැන ජ්‍යොතිෂ පර්යේෂණායතනය,
28, ඔලබොඩුව, ගෝනපල.
