දරුඵල අහිමි වීමටත් ඉඩ තිබෙන කාන්තාවන් නොකියන ලෙඩේ
බොහෝ කාන්තාවන් තුළ ඇතිවිය හැකි නමුත් බොහෝ කාන්තාවන් ඒ පිළිබඳව සැලකිලිමත් නොවන එමෙන්ම වෛද්‍යවරයෙකු වෙතට නොයා ප්‍රතිකාර ගැනීමට මැලිවන තත්ත්වයක් ලෙසින් ඇඟ සුදකර යාම හැඳින්විය හැක.
මේ පිළිබඳව සැලකිලිමත් විය යුතු අවස්ථා කීපයකි.
යෝනි මාර්ගයේන් සුදු පැහැති කැටි සහිත ස්‍රාවයක් පිටවීම, ඒ ආශ්‍රිතව දුගඳක් හැමීම, යෝනි මාර්ගය ඇතුළත සහ පිටත කැසීම, යට ඇඳුම් තෙත් වීම, ලා දුඹුරු පැහැති වර්ණයක් යෝනි මාර්ගයේන් ස්‍රාවය වීම.
සුදයාම ඇතිවීමට හේතූන් -
විවිධ දිලීර හේතුවෙන්, විවිධ බැක්ටීරියා හේතුවෙන්, ආහාර පාන, වැරදි පුරුදු, මානසික පීඩනය, අනියම් සබන්ධතා.
මෙවැනි හේතූන් මත දිගින් දිගටම සුදයාම සිදුවෙයි නම් ඉක්මනින් සුදුසුකම් ලත් වෛද්‍යවරයකු මුණගැසී අවශ්‍ය ප්‍රතිකාර හා උපදෙස් ලබාගැනීම අවශ්‍යයි. මේ පිළිබඳව නොසලකා හැරීමෙන් දිලීර තත්ත්වයක් ආසාත්මික වී පසුකාලීනව ගර්භාෂයේ ඇති බිත්ති විනාශ වී යාමට ද පුළුවනි. එමෙන්ම ලිංගික සංසර්ගයේදී විවිධ රෝග ඇතිවීමේ හැකියාවද තිබේ. විෂබීජ පැලෝපීය නාලවලට ද හානි සිදුකර එහි ඇති ව්‍යුහයට හානි සිදුවීමටත් පුළුවනි. සුද යාමට නිසි ප්‍රතිකාර නොගැනීම මව් පදවිය අහිමිවීමටද හේතුවක් විය හැක.
එබැවින් සුදයාම පිළිබඳව ඔබේ අවධානය යොමු කරන්න.
යට ඇඳුම් සම්බන්ධව ඉතා සැලකිලිමත්වන්න. නිතරම පිරිසිදු යට ඇඳුම් අඳින්න. හොඳ කපු ඇඳුම් තෝරාගන්න.
• පොදු වැසිකිළි භාවිතා කිරීමේදී සැලකිලිමත් වන්න.
• නිරෝගී ආහාර ඔබේ ආහාර වේලට එක්කරගන්න.
• යෝනි මාර්ගය අවට ඉතා පිරිසිදුව තබා ගන්න.
• අච්චාරු, බලමාළු, අන්නාසි, තක්කාලි, කකුළුවන්, ඉස්සන් වැනි අධික උෂ්ණ ආහාර වැඩිපුර ගැනීමෙන් වළකින්න. එමෙන්ම ක්ෂණික ආහාරවලින් ඈත්වන්න.
• ඔබේ මානසික පීඩනය පාලනය කරගන්න. නිතරම සිත සතුටින් පවත්වා ගන්න.
• බොහෝ විට කාන්තාවෝ මේ රෝගයට අත්බෙහෙත් කිරීමට පෙළෙඹෙති. නමුත් කිසිවිටකත් රෝගය පිළිබඳව වෛද්‍යවරයකු තීරණයක් ගන්නට පෙර සුදුසුකම් නොලත් අයකු කිව් පමණින් මේ සඳහා අත්බෙහෙත් සිදුකිරීමෙන් වළකින්න. ඇතැම්විට වෙනත් රෝග තත්ත්වයක මූලික රෝග ලක්ෂණ ලෙසින් යෝනි මාර්ගයෙන් සුදයාම හැඳින්විය හැක. මේ නිසා මෙවැනි රෝග ලක්ෂණ මතුවේනම් ඉක්මනින් සුදුසුකම් ලත් වෛද්‍යවරයකු මුණගැසී අවශ්‍ය ප්‍රතිකාර හා අවශ්‍ය උපදෙස් ලබාගැනීම අවශ්‍යය.