ලංකාවට ගැලපෙන ෆ්‍රෙන්ච් ෆ්‍රයිස් එකතුව The Lankan Fry
ආහාරපාන කලාවට බොහොම රුචිකත්වයක් තියෙන මිතුරියන් දෙදෙනෙක් තමයි ලහාරි සහ අනිඛා කියන්නේ. ඉතින් මේ දෙන්නට එයාලගේ යාළුකමත් එක්කම ආහාරපානවලට තියෙන ලැදියාව නිසා එකතු වෙලා දෙයක් කරන්න හිතිලා, ඒකෙ අවසාන ප්‍රතිඵලය තමා, The Lankan Fry. එයාලගේ අරමුණ වෙලා තියෙන්නේ ලංකාවට ආගන්තුක ආහාරයක් වන ෆ්‍රෙන්ච් ෆ්‍රයිස්වලට දේශීය ලක්ෂණ ඉදිරිපත් කරමින් අලුත්ම තාලෙකට වෙළෙඳපොළට හඳුන්වා දීමයි.
මෙතැනදී ඔවුන් ඉදිරිපත් කරලා තියෙන වෙනස තමා ලාංකික අපට හුරුපුරුදු ආහාර දීසි එක්ක ෆ්‍රයිස් පිළිගැන්වීම. එතැනදී ගෙදරදීම පිළියෙල කරන විවිධ මස් වර්ගත් නිර්මාංශ දීසිත් භාවිත කෙරෙනවා. අපිත් ඒ දීසි කිහිපයක්ම රස බැලුවා.
මුලින්ම අපි French Fries සහ Pulled Roast Beef කියන ආහාර දීසියේ රස බැලුවා. ගෙදරදීම හදාගත් කරපිංචා මායෝ උඩින් දාලා තිබුණු මේ ආහාර දීසියේ මස් හරිම මෙළෙක්ව මෘදුව තිබුණා. ඒ වගේම කරපිංචා මායෝ එකෙනුත් වෙනස්ම රසයක් ලැබුණා. මේකෙදි රෝස්ට් බීෆ් සඳහා අනිඛා යොදාගන්නේ තමන්ගේ පවුලටම ආවේණික වූ ආහාර වට්ටෝරැවක් වීමත් විශේෂත්වයක්.
Shredded Chicken සමඟ පිරිනැමෙන ෆ්‍රයිස් දීසියත් ගොඩක් රසයි. ඒකෙත් රස දෙගුණ තෙගුණ වෙන්නේ උඩින් දාලා තියෙන නයි මිරිස් ජෑම් එක නිසායි. ඊට අමතරව කරි මායෝත් එහි අඩංගුයි. French Fries (Rs 350) with Sautéed Mushrooms තමයි මෙතැනදී අපට රසබලන්න ලැබුණු නිර්මාංශ ආහාර දීසිය. Truffle Oil Drizzle සහ චීස් කැබලි යොදලා තියෙන නිසා මේකෙ රසයේ අඩුවක් නම් නැහැ. අනෙක් අතට බිම්මල් සහ Truffle Oil කියන්නේ හොඳට පෑහෙන එකමුතුවක් නිසා නිර්මාංශ ආහාරයක් කියලා දැනෙන්නෙවත් නැති තරම්.
- නටාෂා ප්‍රනාන්දුපුල්ලේ
- සේයාරූ - කණිෂ්ක ගනේවත්ත