නුවරඑළියෙ එකම තරුපහේ හෝටලය Araliya Green City
නුවරඑළිය කියන්නේ අපේ රටේ තියන ජනප්‍රියම සංචාරක කේන්ද්‍රස්ථානයක් බව අමුතුවෙන් කිවයුතු නැහැ. එහි තිබුණු පැරුණි යටත් විජිත සංස්කෘතිය කෙමෙන් කෙමෙන් ගිලිහෙමින් තිබුණත් නුවරඑළියේ සුන්දරත්වය විඳගන්න එහි ඇදෙන දෙස් විදෙස් සංචාරකයන්ගේ නම් කිසිම අඩුවක් නැහැ. අරලිය ග්‍රීන් සිටි කියන්නේ 2017 අවුරුද්දේ නුවරඑළියේ විවෘත වුණු අලුත්ම සුඛෝපභෝගී හෝටලයයි.
නුවරඑළියේ පිහිටා ඇති එකම තරු පහේ හෝටලය වන අරලිය ග්‍රීන් හෝටලය පේදුරු කන්දත් වික්ටෝරියා උද්‍යානයත් අතර මනරම් භූමියක පිහිටා තිබෙනවා. හෝටලය සතුව ඇති මුළු කාමර සංඛ්‍යාව 192ක් තරම්. ඒ අතර ජැකූසි තටාකයක් සහිත Royal Suite එකක්, Junior Suite එකක් සහ Executive Suite එකක් අන්තර්ගතයි.
මෙහි කාමරවල දකින්න ලැබෙන තවත් විශේෂත්වයක් වන්නේ නිවාස සංකීර්ණ මාදිලියේ වගේම සාමාන්‍ය කාමර මාදිලියේ නවාතැන් පහසුකම් යන දෙයාකාරයම දක්නට ලැබීමයි. උපරිම සුඛෝපභෝගීත්වයක් පිරිනමන මෙහි කාමරවල තේ සහ කෝපි සෑදීමේ පහසුකම්, හීටර්, සේප්පු, සංගීතය ඇතුළු බොහෝ අඩංගුයි.
අරලිය ග්‍රීන් සිටි හෝටලයේ ආහාරපාන පවා ලොකු වෙනසක් ගෙන දෙන අත්දැකීමක්. දේශීය සහ ජාත්‍යන්තර මට්ටමේ ආහාර වර්ග රැසක් එහිදී සැපයෙනවා. ‘Fresh N Warm ලෙස නම් කර ඇති එහි අවන්හලේදී දිනයේ ඕනෑම වේලාවකදී ආහාර ලබාගැනීමේ හැකියාව පවතිනවා. එතැන දේශීය වගේම ඉන්දියානු, අරාබි, බටහිර ආහාරපාන තිබෙනවා. ඊට අමතරව ‘Deli Cafe නමින් නිර්මාංශ අවන්හලකුත් ‘Fox and Hounds නමින් පබ් අවන්හලකුත් පවතිනවා’
හෝටලය සතු තවත් අපූරු පහසුකමක් තමයි ගෘහස්ථව ඉදිකර තිබෙන උණුසුම් ජලයෙන් යුතු පිහිනුම් තටාකය. එතැනට නුවරඑළිය නගරයේ හාත්පස අපූරු දර්ශනයකුත් හිමියි. ඒ වගේම අති නවීන ව්‍යායාම මධ්‍යස්ථානයකුත්, උත්සව ශාලා සහ සම්මන්ත්‍රණ ශාලා පහසුකම් පවා එහි අන්තර්ගතයි. The Pearl යනුවෙන් නම් කර ඇති සම්බාහන මධ්‍යස්ථානයත් සාම්ප්‍රදායික සත්කාරයක් සංචාරකයන්ට පිරිනමනවා.
ඒ වගේම රාත්‍රී සමාජ ශාලාවකින් යුත් නුවරඑළියේ පිහිටි එකම හෝටලයත් අරලිය ග්‍රීන් සිටි හෝටලයයි. කොහොම නමුත් ඊට පිවිසීමේ අවස්ථාව ලැබෙන්නේ හෝටලයේ නවාතැන් ගන්නා අයට පමණයි.
- සනත් වීරසූරිය
- සේයාරූ - ශාන් බන්දු වීරසිංහ