හදිසි ජලගැලීමක්: දේශපාලන මත ගැටුම්

2019 මාර්තු මස 22 වන කිවි දින සවස 3 පසුවී විනාඩි 5ට අඟහරු ග්‍රහයා තමාට සම රාශි භවනක් වූ වෘෂභ රාශියට පිවිසෙනු ඇත. මෙහිදී අඟහරුගේ පූර්ණ දෘෂ්ඨිය බ්‍රහස්පතිට අයත් ධනු රාශියෙහි කිවිට අයත් පුවසල නැකතේ ගමන් කරමින් සිටින සෙනසුරැ වෙත එල්ල වෙයි. වෘෂභ රාශියේ සිටිමින් 2019 මැයි 7 වන කුජ දින පාන්දර 6 පසුවී විනාඩි 53 දක්වාම සෙනසුරැ වෙත අඟහරැගේ පූර්ණ දෘෂ්ඨිය එල්ල වෙයි. 

අප රට කෙරෙහි අවධානය යොමු කිරීමේදී මෙම කාල වකවානුව තුළ පහත් බිම්, මුහුදුබඩ ප්‍රදේශවල මෙන්ම ගංගා ආශ්‍රිතව ජීවත්වන්නවුන් ඉතා කල්පනාවෙන් යුක්තව සිටිය යුතුය. එයට හේතුව හදිසි ජල ගැලීම් නිසා දේපල සහ ජීවිතවලට හානි වීම් ඇතිවිය හැකි බැවිනි. කෘෂිකාර්මික කටයුතුවලටද ජලයෙන් හානිවීමට ඉඩ වැඩිය. මහජනයා රැස්වන ස්ථාන හදිසි කඩාවැටීමකට හෝ ගිනි ගැනීමකට ලක්විය හැක. විදේශීය රටකින් මෙරටට නීති විරෝධී ද්‍රව්‍ය රැගෙන ඒමක් සිදුවන නමුත් ඒවා නීතියේ රැහැනට හසුකර ගැනීමටද හැකියාව ලැබෙන කාලයකි. දේශපාලන වාද විවාද වැඩිවන කාලයකි. ධීවර හා නාවික කටයුතු වෙනුවෙන්ද නාවික හමුදාවේ සුබ සිද්ධිය වෙනුවෙන්ද රජය විසින් යම් යම් තීරණ ගනු ලබන කාලසීමාවක්ද වනු ඇත.

මේෂ - ලේ රෝග

ඔබට යහපත් ඵල අත්වනු ඇත. තම තැන්පත් ධනය රුකගෙන කටයුතු කිරීමට වෙරදරන කාලයක් වේ. තම මිතුරන්ගෙන් තමාහට යම් යම් ප්‍රශ්න ඇතිවිය හැකි බැවින් අවධානයෙන් කටයුතු කරන්න. ශරීරයේ ලේ ආශ්‍රිත පීඩාවක් මතුවනු ඇත.

වෘෂභ - අවේගශීලී වේ

උත්සාහය යොදවමින් කටයුතු සාර්ථක කර ගැනීමට වෙරදරන කාලයක් වන අතර නීතිමය ප්‍රශ්නයකට මැදිවිය හැකි බැවින් කල්පනාකාරීව කටයුතු කරන්න. නිතරම ආවේගශීලී ගතියෙන්ද කටයුතු කරන කාලයක් වේ.

මිථුන - නරක ආරංචියක්

පවුල් දිවියේ සමගියට බාධා ඇතිවන්නා වූ කාලයකි. ව්‍යාපාරික කටයුතුවල නිරත වී සිටින අයටද ලාබ අඩු කාලසීමාවක් වේ. යම්කිසි ආරංචියක් නිසා භීතියට පත්වීමක්ද වනු ඇත.

කටක - ජනප්‍රිය වේ

ඔබගේ නම ජනප්‍රිය බවට පත්වන කාලයකි. පිටස්තර අයගේ යම්කිසි වචනයක් හේතුවෙන් තම ධනය නිකරැණේ වියදම් වී යන බැවින් කල්පනාකාරී වන්න. විනෝද චාරිකාවකට සහභාගී වන වකවානුවක්ද වේ.

සිංහ - උසස්වීම් ලැබේ

සේවා ස්ථානය ආශ්‍රිතව පැවති ප්‍රශ්න මගහැරී යන කාලයක් වේ. උසස්වීම් බලාපොරොත්තු වූ අයට යහපත් ඵල අත්වනු ඇත. උරුම හිමිකම් ලබාගැනීමටද ශුභ කාලයක් වේ.

කන්‍යා - නව දේපල

තාක්ෂණික කටයුතුවල නිරත වී සිටින අයට යහපත් ඵල අත්වන අතර නව දේපලක් මිලදී ගැනීමටද යහපත් කාලයක් වේ. වැඩිපුර තමා ගැන සිතා කටයුතු කිරීමට පෙළඹෙන කාලයක්ද වේ.

තුලා - මිතුරන්ගෙන් ප්‍රශ්න

ඔබට එතරම් යහපත් නොවන කාලයකි. තමන් කිරීමට යන කටයුතු සඳහා විවිධ බාධා ඇතිවනු ඇත. මිතුරන්ගෙන්ද ඔබට ගැටලු කරදර ඇති වන්නා වූ කාලයක් වන අතර හදිසි ශරීර පීඩාද ඇතිවනු ඇත.

වෘශ්චික - සමගියට බාධා

විශාල අන්දමෙන් මුදල් යොදවා කටයුතු කිරීමෙන් වැළකී සිටිය යුතු කාලයකි. ව්‍යාපාරික කටයුතුවල නිරත අයටද ලාබ අත් නොවන කාලයක් වේ. පවුල් දිවියේ සමගියට බාධා ඇතිවන්නා වූත් කාලයක් වේ.

ධනු - සතුරන් මර්දනය වේ

යහපත් ඵල අත්වන අතර ඔබට එරෙහි සතුරැ බලවේග වර්ධනය කරගත හැකි කාලයක් වේ. හදිසි කේන්ති ගති ඇතිවන කාලයක් බැවින් සිත පාලනය කරගත යුතුයි. ලේ දෝෂ ඇතිවේ.

මකර - අතමිට සරුවේ

විරුද්ධ ලිංගික ආකර්ෂණයට ඔබව ලක්වන අතර රථවාහන පිළිබඳ කටයුතු කරන අයට අතමිට සරැවන කාලයක්ද වේ. මිතුරන්ගෙන් තමා හට යම් යම් ප්‍රශ්න ඇතිවිය හැකි බැවින් අවධානයෙන් කටයුතු කරන්න.

කුම්භ - නව දේපල ලැබීම්

නව දේපලක් මිලදී ගැනීමට හෝ පවතින දේපලක උද්ගත වූ ප්‍රශ්නයක් නිරවුල් කර ගැනීමට හෝ හැකිවන කාලයක් වේ. හදිසි කේන්ති ගතිද ඇතිවන්නා වූ කාලයක් වේ. පවුල් දිවියේද සමගියට බාධා මතුවනු ඇත.

මීන - ගැටලු මගහැරේ

තාක්ෂණික කටයුතුවල නියැලී සිටින අයට යහපත් වන අතර ඔබට එරෙහිව පැවති සතුරැ බලවේග මර්දනය කරගැනීමට අවකාශ අත්වනු ඇත. සේවා ස්ථානයේද පැවති ප්‍රශ්න මගහැරී යන කාලයකි.

ජ්‍යොතිෂ නන්දන
ප්‍රවීණ ජ්‍යොතිෂවේදි ජ්‍යොතිෂාචාර්ය
රේණුක වික්‍රමසිංහ
සුවණැන ජ්‍යොතිෂ පර්යේෂණායතනය
ඔලබොඩුව, ගෝනපල