ලොකු ගුවන් අනතුරක්

2019 මාර්තු මස 29 වන කිවිදින බ්‍රහස්පති ග්‍රහයා තමන්ට ස්වක්ෂේත්‍ර රාශී භවනක් වූ ධනු රාශියෙහි ගමන් කරමින් සිටින සෙනසුරැ සමඟ මෙන්ම කේතු සමඟ ද යෝගවේ. 2019 අප්‍රේල් 23 වන කුජ දින හා නැවත 2019 නොවැම්බර් 5 වන කුජ දින සිට 2020 මාර්තු 30 වන දින දක්වාම බ්‍රහස්පති මෙලෙස ධනු රාශිගතව ගමන් කරනු ඇත.

මේ තත්ත්වය අප රට කෙරෙහි අවධානය යොමු කිරීමේදී මුද්‍රිත මාධ්‍යවේදීන්ට ජනමාධ්‍යවේදීන්ට යහපත් කාලයක් වන අතර දුම්රිය දෙපාර්තමේන්තුවේ කටයුතු වෙනුවෙන් රජය විසින් වැඩි අවධානයක් යොමු කරනු ලබන වකවානුවක් වේ. රටෙහි ආගමික හා අධ්‍යාපන කටයුතු ළදරු නිෂ්පාදන ආහාර පාන වර්ග පිළිබඳව ඇතැම් නීති පැනවීම් සහ වාද - විවාද ඇතිවන කාලයක් වේ. මෙම වකවානුව තුළ විවාහ වීම් ඉහළ නගින බව කිව යුතුය. රටේ ආර්ථික වර්ධනයක් ඇති කිරීම සඳහා යම් යම් ක්‍රියාමාර්ග රජය විසින් ගනු ලබන කාල සීමාවක් වේ.

විදේශීය වශයෙන් විමසා බැලීමේදී මගීන් 200කට අධික පිරිසක් රැගත් යාත්‍රාවක් අනතුරට පත්වන කාලයක් වේ. සන්නිවේදන කටයුතු කෙරෙන ස්ථානයකට හෝ මාධ්‍ය ආයතනයකට ත්‍රස්ත ප්‍රහාරයකට ලක්වීමක් සිදුවීමට ඉඩ ඇත. යම් යම් ආණ්ඩුවල ක්‍රියාවන්ට එරෙහිව මහජනයා උද්ඝෝෂණ වැඩවර්ජන ගැටුම්වලට යොමුවන කාලයක් ද වේ.

මීළඟට ඔබට

මේෂ - කටයුතු සාර්ථකයි

යහපත් ඵල අත්වන අතර ඔබ කරන කටයුතු සාර්ථක බවට පත්වනු ඇත. ආගමික කාර්යවල වැඩි වශයෙන් නිරත වනු ඇත. වැඩිපුර තමා ගැන සිතා කටයුතු කිරීම හේතුවෙන් හිත මිතුරන් තමා සමඟ සිත් අමනාපකම් ඇති කරගනී.

වෘෂභ - මුදල් නාස්තිය

ව්‍යාපාරික කටයුතුවල නිරත වී සිටින අයට යහපත් ඵල අත්වන අතර තම ඇසුරට අනවශ්‍ය අය ළංවන කාලයක් වේ. ආර්ථික අපහසුතා ඇති වන අතර අනවශ්‍ය ලෙස මුදල් වියදම් වී යන කාලයක් ද වේ.

මිථුන - ශරීර පීඩා

ඔබගේ කලාත්‍රයාට හදිසි ශරීර පීඩා ඇති වන්නාවූත් වකවානුවක් වන අතර ඔබට එරෙහි සතුරු කරදර හෙළිකර ගැනීමටද හැකියාව අත්වනු ඇත. විශාල අන්දමේ මුදල් යොදවා කටයුතු කිරීමේදී පාඩු ලැබිය හැකි බැවින් ප්‍රවේසම් වන්න. 

කටක - අධ්‍යාපනයට හොඳයි

ඔබට යහපත් වන අතර ආගමික කටයුතුවලට සහභාගී වනු ඇත. අධ්‍යාපන කටයුතුවල නිරත වී සිටින අයට යහපත් වනු ඇත. ආර්ථික වාසි ද අත්වන කාලයක් වන අතර හිත මිතුරන්ගෙන් උදව් උපකාර ද ලැබෙනු ඇත.

සිංහ - නිවසේ අලුත්වැඩියාවට

යහපත් කාලයක් වන අතර තම නිවසේ අලුත්වැඩියාවක් ද කරන්නා වූ සමයකි. දුරගමන් යෙදෙන කාලයක් ද වන අතර සේවා ස්ථානය ආශ්‍රිතව පැවති ගැටලු නිරාකරණය කරගත හැකිවනු ඇත. විශාල අන්දමෙන් මුදල් යොදවා කටයුතු කිරීමේදී පරිස්සම්වන්න.

කන්‍යා - උදව් උපකාර

ලේඛන කටයුතුවල නිරත වී සිටින අයට යහපත් කාලයක් වේ. තම සහොදර සහෝදරියන්ගෙන් තමා හට උදව් උපකාර අත්වන කාලයක් ද වේ. සමාජ සේවා සහ දේශපාලන කටයුතුවල නිරත වී සිටින අයට ශුභ ඵල වර්ධනය වේ.

තුලා - පවුලේ සමගිය

තම වචනයට අන් අයට නම්මවා ගතහැකි කාලයක් වන අතර තැන්පත් ධනය අනවශ්‍ය ලෙස වියදම් වී යන කාලයක් ද වේ. පවුල් දිවියේ සමගිය වර්ධනය වනු ඇත.

වෘශ්චික - බලාපොරොත්තු ඉටුවේ

හදිසි ආර්ථික ලාබ අත්වන කාලයක් වේ. අධ්‍යාපන කටයුතුවල නිරත වී සිටින අයට ශුභ ඵල අත්වනු ඇත. ආගමික කටයුත්තක් වෙනුවෙන් කාලය ගතකිරීමට සිදුවන අතර ඔබගේ බලාපොරොත්තුවක් ඉෂ්ඨ වන කාලයක් ද වේ.

ධනු - මුදල් හානි

විශාල අන්දමෙන් මුදල් යොදවා ගනුදෙනු කිරීමේදී පරිස්සම් විය යුතු අතර මුදල් පාඩුවක් ඇතිවන කාලයක් වේ. තමන්ගේ කටයුතුවලට විරුද්ධවාදීන් ඇතිවේ. සිතට කරදර දෙන ප්‍රශ්න පැනනගින කාලයක් ද වේ.

මකර - මිතුරන්ගේ උදව්

භූමිය ආශ්‍රිතව කටයුතු කරන අයට යහපත් ඵල අත්වන අතර හිත මිතුරන්ගෙන් උදව් උපකාර ලැබෙන කාලයකි. සමාජ සේවා කටයුතුවල නිරත වී සිටින අයට යහපත් ඵල අත්වන මුදල් යොදවා ව්‍යාපාර ආරම්භයට ශුභ කාලයක් වේ.

කුම්භ - නව රැකියා

නව රැකියාවක් අපේක්ෂා කළ අයට තම බලාපොරොත්තු ඉෂ්ඨ කරගත හැකි වන කාලයක් වේ. සේවා ස්ථානය ආශ්‍රිතව පැවති ප්‍රශ්න රැසක් මගහැරී යන අතර ආර්ථික වාසි ද හිමිවන කාලයක් වේ.

මීන - වන්දනා ගමන්

අධ්‍යාපන කටයුතුවල නිරත වී සිටින අයට ශුභඵල අත්වන අතර ලේඛන කටයුතුවලින් ද ඵල අත්වන කාලයක් වේ. වන්දනා ගමනකට සහභාගී වීමට අවකාශ ලැබෙනු ඇත.

ජ්‍යොතිෂ නන්දන
ප්‍රවීණ ජ්‍යොතිෂවේදි ජ්‍යොතිෂාචාර්ය
රේණුක වික්‍රමසිංහ
සුවණැන ජ්‍යොතිෂ පර්යේෂණාගාරය
ඔලබොඩුව, ගෝනපල