රජයේ ගැටලු උග්‍ර වේ
ග්‍රහලොව රජු වූ රවි තමාට සතුරු රාශි භවනක් වූ වෘෂභ රාශියට 2019 මැයි මස 15 වැනි බුධ දින උදේ 11.01ට සංක්‍රමණය වෙයි. රවිටම අයත් කැති නැකතේ දෙවැනි තුන්වැනි හතරවැනි පාදවලත් සඳුට අයත් රෙහෙණ නැකතේ සම්පූර්ණවත් අඟහරුට අයත් මුවසිරස නැකතේ ප්‍රථම හා දෙවැනි පාදවලත් 2019 ජූනි මස 15 වැනි ශනි දින දක්වාම රවි ගමන් කරනු ඇත.
මේ ග්‍රහ ගමන අප රට කෙරෙහි සලකා බලන විට මහජනයාගේ සෞඛ්‍යයට බාධා ඇතිවන්නා වූ වකවානුවක් වන බව කිව යුතුය. විවිධ වූ ප්‍රශ්න වැඩිවීම හේතුවෙන් රජයට ගැටලු සහගත තත්ත්වයක් උදාවනු ඇත. රජයේ ප්‍රධානියකුට හෝ නිලධාරියකුට ඉතා අශුභ සිදුවීම් ද මාරක ද ඇතිවනු ඇත. ප්‍රාදේශීය වශයෙන් පාලනය කරන්නන් හට ද ඉතා අශුභ කාලයක් වේ.
ලෞකික ආශාවන්ගෙන් මිනිස් සිත් පිරී යාම හේතුවෙන් නීති විරෝධී වැඩවලට පෙළඹීමටත්, පවට බිය නැතිවීමත්, කුඩා දරුවන්ට අමානුෂික වධ දීම් ද, ඝාතනය කිරීම් ද වාර්තා වෙයි. එනිසා දරු දැරියන්ගේ ආරක්ෂාව වෙනුවෙන් වැඩිහිටියන් අවධානයෙන් සිටිය යුතුයි. මහජන නියෝජිතයන් වූ මන්ත්‍රීවරැන් අතර වාද විවාද උග්‍ර වේ. ගංඟා, මුහුදු ආශ්‍රිතව ජීවත් වන ජනතාව ඉදිරි වකවානුව තුළ කල්පනාකාරීව ජීවත් විය යුතු අතර නොසිතූ ලෙස හදිසි ජල ගැලීම් ද, භූමියේ හදිසි විපර්යාස ද ඇතිවනු ඇත.
විදේශීය වශයෙන් විමසා බැලීමේදී සටන්කාමී ත්‍රස්ත ක්‍රියා සිදුකරන පුද්ගලයන්ට අශුභ සිදුවීම්වලට මුහුණදීමට සිදුවන අතර ත්‍රස්ත ක්‍රියා මෙහෙයවන නායකයකුට බරපතළ තුවාල වීමකට හෝ මාරක ඇතිවීමක් හෝ වනු ඇත. අවි ආයුධ, පුපුරණ ද්‍රව්‍ය ගබඩා කළ ස්ථානයක් හදිසි පිපිරීමකට ලක්වනු ඇත. වෙළෙඳ මධ්‍යස්ථාන, වරාය, ගුවන් තොටුපොළ ආශ්‍රිතව ද හදිසි උපද්‍රව ඇතිවනු ඇත.
මීළඟට ඔබට
මේෂ - මුදල් පාඩු
පවුල් ජීවිතයේ සමගියට බාධා මතුවන බැවින් ඉවසීමෙන් කටයුතු කළ යුතු වේ. අනවශ්‍ය වියදම් පාලනය කරගත යුතු අතර හදිසි මූල්‍ය පාඩුවක් ඇතිවනු ඇත. ඔබගේ උත්සාහයේ තරමට ඵලයක් ගත නොහැකි වන කාලයකි.
වෘෂභ - බලාපොරොත්තු ඉටුවේ
උසස්වීම් අපේක්ෂාවෙන් සිටි අයගේ බලාපොරොත්තු ඉෂ්ඨ කරගත හැකිවන අතර අන් අයගේ ගෞරවයට පත්වන කාලයක් වේ. ඔබ බලාපොරොත්තු වන කාර්යයන් ඒ අයුරින්ම ඉෂ්ඨ කරගත හැකිවන්නා වූ කාලයක් ද වේ.
මිථුන - විදේශගතවීම්
සිතේ සහනය අඩු වන්නා වූ කාලයක් වන අතර විදේශගතවීමේ අපේක්ෂාවෙන් සිටි අයගේ බලාපොරොත්තු ඉෂ්ඨ කරගත හැකිවන්නා වූ කාලයකි. ගමන්වලින් හදිසි ශරීර පීඩා ඇතිවිය හැකි බැවින් ප්‍රවේසම් වන්න.
කටක - මිතුරු උදව්
ඔබට ද යහපත් ඵල අත්වනු ඇත. හිතමිතුරන්ගෙන් උදව් ලැබෙනු ඇත. දේශපාලන කටයුතුවල නිරත වී සිටින අයට ද යහපත් වේ. ඔබගේ කටයුතු සාර්ථක කරගත හැකිවන්නා වූ කාලයකි.
සිංහ - ප්‍රශ්න මඟහැරේ
සේවා ස්ථානය ආශ්‍රිතව පැවති ප්‍රශ්න රැසක් මඟහැරී යනු ඇත. උසස්වීම් අපේක්ෂා කළ අයගේ බලාපොරොත්තු ද ඉෂ්ඨ වනු ඇත. තම මතයට අනුව ක්‍රියා කරන්නා වූ කාලසීමාවක් වේ.
කන්‍යා - අලුත් අලුත් දේ
ඔබගේ මතක බුද්ධියට අලුත් අලුත් දේ එක්කර ගැනීමට හැකියාව ලැබෙනු ඇත. විදේශගතවීමේ අපේක්ෂා ඉටුකරගත හැකිවන අතර අධ්‍යාපන කටයුතු වෙනුවෙන් හෝ විදේශගත වීමට අපේක්ෂා කළ අයගේ ද බලාපොරොත්තු ඉෂ්ඨ කරගත හැකිවනු ඇත.
තුලා - උත්සාහයට ප්‍රතිඵල නැහැ
යම්කිසි හිමිකමක් ලැබිය යුතු නම් එම හිමිකම ලබාගැනීමට යහපත් කාලයකි. ආර්ථිකය ශක්තිමත් නොවන කාලයක් වන අතර ඔබගේ උත්සාහයේ තරමට ඵල නෙලා ගැනීමට අපහසු කාලයක් ද වේ.
වෘශ්චික - දුර ගමන්
ඔබ කරන්නට යන කටයුතු සඳහා බාධා මතුවන කාලයකි. දුර ගමන් යෙදීම ද සිදුවේ. සිතේ සහනය අඩුවන අතර පවුල් දිවියේ ද මතභේද වාදවීම් ඇතිවනු ඇත.
ධනු - සතුරු උපද්‍රව දුරුවේ
ඔබට එරෙහිව පැවතියා වූ සතුරු උපද්‍රව දුරැකරගත හැකිවනු ඇත. දුර ගමන්, විදේශගතවීමේ අපේක්ෂාවෙන් සිටි අයගේ බලාපොරොත්තු ඉෂ්ඨ වනු ඇත. මහ මඟ ගමන් කිරීමේදී පරිස්සම් වීම වැදගත් වන අතර හදිසි ශරීර පීඩා මතුවනු ඇත.
මකර - වියදම පාලනය
දේශපාලන කටයුතුවල නිරත වී සිටින අයට යහපත් වන අතර හිතමිතුරන්ගෙන් ද උදව් උපකාර අත්වන කාලයක් වේ. යම් යම් වැඩවල අතපසුවීම් ද, ප්‍රමාද වීම් ද ඇතිවන අතර වියදම් පාලනය කරගත යුතු කාලසීමාවක් ද වේ.
කුම්භ - සිතේ සහනය අඩුයි
පිටස්තර අයගේ ප්‍රශ්නවලට මැදිනොවී සිටීමට වගබලාගත යුතු වකවානුවක් වේ. සිතේ සහනය අඩු කාලයක් වන අතර ඔබට එරෙහිව පැවති සතුරු බලවේග පරාජය කිරීමට හැකි කාලයකි.
මීන - බලාපොරොත්තු ඉටුවේ
සන්නිවේදන හා ලේඛන කටයුතුවල නිරත අයට යහපත් ශුභ ඵල අත්වන අතර අධ්‍යාපන කටයුතු වෙනුවෙන් විදේශගතවීමේ අපේක්ෂාවෙන් සිටි අයගේ බලාපොරොත්තු ඉෂ්ඨ කරගත හැකිවන්නා වූ කාලයක් ද වේ.
ජ්‍යොතිෂ නන්දන
ප්‍රවීණ ජ්‍යොතිෂවේදි ජ්‍යොතිෂාචාර්ය
රේණුක වික්‍රමසිංහ
සුවණැන ජ්‍යොතිෂ පර්යේෂණායතනය
ඔලබොඩුව, ගෝනපල