වැඩිය අහලා නැති නුවරඑළියේ ගැල්වේස් ලෑන්ඩ් ජාතික වනෝද්‍යානය
මේ වනෝද්‍යානය ගැන නම් ගොඩක් දෙනෙක් අහලා නැතුව ඇති. ගැල්වේස් ලෑන්ඩ් (Galway’s Land) ජාතික වනෝද්‍යානය කියන්නේ ලංකාවේ කුඩාම වනෝද්‍යානය. ග්‍රෙගරි වැව ඉස්මත්තේ ටිකක් උතුරු පැත්තට වෙන්න තමයි මේ පුංචි වනාන්තරය පිහිටලා තියෙන්නෙ. අක්කර 22ක විතර ප්‍රමාණයක් පුරා පැතිරුණු මේ වන උයන හරිම නිස්කලංක තැනක්.
නුවරඑළිය නගරයේ ඉඳලා විනාඩි දහයක විතර දුරක් තමයි මේ ස්ථානයට තියෙන්නේ.
කිසිම බාහිර සද්දයක් නැති නිස්කලංක පරිසරයක පිහිටි මේ වන අරණේ මැදින් ඇවිද යන්න කුඩා අඩි පාරක් තිබෙනවා. ඒ අඩිපාරේ ඇවිදින එක ස්වභාව ධර්මයට ප්‍රිය කරන ඕනම කෙනෙකුට මිහිරි අත්දැකීමක්.
වළි කුකුල්ලු, කටුසු කුලයේ සතුන් මෙහි නිතර දකින්න පුළුවන්. ඉඳහිට ගෝන්නු, මුවෝ, මී හරක් වගේ විශාල සතුන් එහෙමත් දකින්න හැකියාවක් තිබෙනවා. ඊට අමතරව හාවෝ, ඉත්තෑවෝ වගේ ප්‍රමාණයෙන් පොඩි සතුනුත් මෙහි ඉන්නවා. කොහොම වුණත් නිතරම තිබෙන වැහි අඳුර නිසා වනය ඇතුළේදී සතුන් දකින්න ටිකක් විතර අපහසුයි.
සීතල නුවරඑළියේ සංචාරයකදී සම්ප්‍රදායික ගමනාන්තවලට අමතර සංචාරය කරන්න හොඳ තැනක් මෙතැන. ඒ නිසා තවත් විස්තර හොයලා බලලා නුවරඑළිය ගමනකදී අලුත් අත්දැකීමක් එකතු කරගන්න මේ ගැල්වේස් ලෑන්ඩ් ජාතික වනෝද්‍යානයත් ගොඩවෙන්න.
සේයා රූ : අන්තර්ජාලයෙන්
