කට දන මිරිස් කාපු මාළු කඩේ මාළු විකිණූ සංචාරකයෝ

පාස්කු ඉරිදා ප්‍රහාරයෙන් පසු සාර්ථක වුණු විදේශීය සංචාරකයන් වෙනුවෙන් සංවිධානය කළ එකම වැඩසටහන තමයි Lanka Challenge 2019 කියන්නෙ. අප්‍රේල් 27 තමයි ඔවුන් 1000kmක ත්‍රීරෝද රථ සංචාරය ඉවර කළේ. ඒ වෛක්කාල් සූරිය ගිමන්හලෙන්. පාස්කු ඉරිදා ප්‍රහාරය වෙද්දී ඔවුන් මන්නාරම කැලෑවක කඳවුරු බැඳගෙන හිටියත් එවැනි අවස්ථාවකත් මේ වැඩසටහනට නොබියව සහභාගී වූ සංචාරකයන්ට ස්තූතිවන්ත විය යුතුයි.

සංචාරක අමාත්‍යාංශය ඇතුළු තවත් ආයතන ගණනාවක සහාය සහිතව ක්‍රියාත්මක වුණු මේ සංචාරය මිනුවන්ගොඩ, කල්පිටිය, විල්පත්තුව, මන්නාරම, යාපනය, ත්‍රිකුණාමලය, සීගිරිය, රිවර්ස්ටන්, මහනුවර, වෛක්කාල් කියන ප්‍රදේශවල තමයි සිද්ධ වුණේ. ඔවුන් මේ දින 9 පුරාවට දිනකට 150km ආසන්න ප්‍රමාණයක් සංචාරය කරමින් 1000km සේ අභියෝගය අවසන් කළා.

විශේෂයෙන්ම මේ සංචාරය අතරතුර විදේශිකයන්ට තවත් අපූරු අභියෝගයන්ට මුහුණ දෙන්න සිදුවුණා. සැරම සැර මිරිස් ආහාරයට ගැනීම, දේශීය ගැනුම්කරුවන් බොහොමයක් සිටින මාළු වෙළඳසලක වෙළඳාම් කිරීම, වෙළඳසල්වලින් බඩු මිලදී ගැනීම හා ගැමි නිවසක ආහාර පිසීම, ගාථා පාඩම් කිරීම වැනි අභියෝග විදේශිකයන්ට අලුත්ම අත්දැකීමක් වුණා.

ඒ වගේම මෙම කටයුත්ත හරහා සමාජ සත්කාර රාශියකුත් සිදුවෙනවා. පාසල් දරුවන්ට පොත් බෙදාදීම එවැනි එක් කටයුත්තක්. කෙසේ වෙතත් මේ කටයුත්තට සහභාගී වුණු නිර්භීත සංචාකයන්ටත් ආරක්ෂක අංශවලටත් සංචාරක අමාත්‍යාංශයටත් අවසානයේ විශේෂ ස්තූතියක් ලැබිය යුතුයි.

 සනත් වීරසූරිය