ළමා අපයෝජන ඉහළට

ග්‍රහලොව මනාලිය වූ සිකුරු ග්‍රහයා තමාට සම රාශි භවනක් වූ මිථුන රාශියට 2019 ජුනි මස 29 වැනි ශනි දින පාන්දර 01 පසුවී විනාඩි 34ට පිවිසේ. එසේ පිවිසෙන සිකුරු අඟහරුට අයත් මුවසිරස නැකතේ තුන්වැනි හා හතරවැනි පාදවලත් රාහුට අයත් අද නැකතේ සම්පූර්ණවත් ගුරුට අයත් පුනාවස නැකතේ ප්‍රථම, දෙවැනි තුන්වැනි පාදවලත් ගමනින් 2019 ජූලි මස 23 වැනි කුජ දින දහවල් දොළහයි හතළිස් පහ දක්වාම මිථුන රාශියෙහි ගමන් කරනු ඇත. සිකුරු මිථුන රාශිගත වී සෙනසුරැගේ පූර්ණ දෘෂ්ටියටත් රාහු සමඟ යෝගවත් ගමන් කිරීම තුළින් සිකුරු පීඩාවකට ලක්වීමක් සිදු වනු ඇත.

මෙම තත්ත්වය පිළිබඳ අප රට කෙරෙහි අවධානය යොමු කිරීමේදී අදාළ කාල වකවානුව තුළදී කුඩා දරුවන්ටත් අධ්‍යාපන කටයුතුවල නිරත වී සිටින දූ දරුවන්ටත් අයහපත් කාලයක් උරුම වන අතර විශේෂයෙන් මහමඟ ගමන් කිරීමේදී තම දූ දරුවන් ඉතා පරිස්සම් කරගත යුතු වේ. මෙය කාලයේ බාල අපරාධ ක්‍රියාවන් ද වාර්තා වන අතර කුඩා දරැවන් අපයෝජනය කර ඝාතනය කිරීමක් ද දරුවකු අතුරුදහන් වීමක් ද වාර්තා වන කාලයකි. ඒ නිසා දෙමාපියන් තම දරුවන් පිළිබඳ දැඩි අවධානයෙන් පසුවිය යුතු බව පවසමි.

පාර්ලිමේන්තුව නියෝජනය කරන කාන්තාවකගේ කීර්ති නාමයට හානි වීමක් සිදුවන අතර හදිසි විපතකට මුහුණ දීමටත් සිදුවනු ඇත. මන්ත්‍රීවරියකට, නායක නායිකාවකට, නිළියකට හෝ නළුවකුට ඉතා අශුභ ගෙන දෙන මාරක යෙදෙන කාලයකි. පාසල් සිසුන් අතර ගැටුම් ඇතිවීමක් ද ආදර බැඳීම් පළුදුවීම් හේතුවෙන් සියදිවි නගා ගැනීමේ ඉහළ යාම හා ශෝකජනක පුවතක් ද වාර්තා වන කාලයකි.

විදේශීය වශයෙන් සාහිත්‍යවේදියකු හෝ මාධ්‍ය සන්නිවේදන ආශ්‍රිතව කටයුතු කළ ප්‍රවීණයකුට මෙන්ම නීති විශාරදයකුට මාරක ඇති වන අතර බස් රථ මෙන්ම ජෙට් යානාවක් හෝ මගීන් රුගත් කුඩා ගුවන් යානයක් විනාශයට පත්වීමක් ද සිදුවන බව කිව යුතුය.

මේෂ - ඉක්මන කොටයි

ලේඛන කටයුතුවල නිරත වූ අයට යහපත් වුවද ඉක්මන්කාරීව කටයුතු කිරීමේදී පරිස්සම් විය යුතු වේ. සිතෙත් සහනය අඩු වන අතර තම කටයුතුවලට විවිධ පාර්ශවවලින් බාධා කිරීම් ද ඇතිවන කාලයක් වේ.

වෘෂභ - ලිංගික බැඳීම්

පවුල් දිවියේ සමගිය මර්දනය වන අතර විරුද්ධ ලිංගික බැඳීම් ඇතිවන කාලයක් වේ. සේවා ස්ථානය ආශ්‍රිත පැවති ප්‍රශ්න මගහැර ගතහැකි නමුත් ආර්ථික ගැටලු මතුවන කාලයක් ද වේ.

මිථුන - කේන්ති ගති

අන් අය අතර කැපී පෙනෙන ලක්ෂණ ඇති වුවද හදිසි කේන්ති ගති පාලනය කරගත යුතු වේ. නීතිමය ප්‍රශ්නයකට මැදිවිය හැකි බැවින් කල්පනාකාරීව කටයුතු කරන්න. ආගමික කටයුතු සඳහා සහභාගී වන කාලයකි.

කටක - ප්‍රශ්න මග හැරේ

ඔබගේ කටයුතුවලට විවිධ වූ පාර්ශවවලින් බාධා ඇතිවන අතර නොයෙක් චරිත ඇති පුද්ගලයන් හමුවන කාලයකි. තම නිවසේ අලුත්වැඩියාවක් වෙනුවෙන් වැඩි කාලයක් ගත කරනු ඇත. පවුල් දිවියේ පැවති ප්‍රශ්න මගහැරී යන කාලයකි.

සිංහ - හවුලට හොඳයි

ඔබට හවුල් කටයුතුවලින් ඵල අත්කර ගත හැකි වන කාලයක් වේ. විනෝද වීම් සඳහා වැඩි වශයෙන් කාලය යොදවනු ඇත. විරුද්ධ ලිංගික බැඳීම් ද ඇතිවනු ඇත. තම නිවසට විසිතුරු භාණ්ඩ මිලදී ගැනීමක් ද සිදු වේ.

කන්‍යා - නව දේපළක්

තම මතයට ගන්නා වූ තීරණවලින් යහපත අත්කරගන්නා වූ කාලයක් වේ. තම සේවා ස්ථානයේ අන් අය අතර සුහදශීලීව කටයුතු කළ හැකි වන අතර නව දේපළක් මිලදී ගැනීමට ද යහපත් වන කාලයක් වේ.

තුලා - නිර්මාණශීලී අදහස්

ඔබට යහපත් වන අතර කෙටි ගමන් අධිකව යෙදෙනු ඇත. මාධ්‍ය කටයුතුවල නිරත වී සිටින අයට ඉතා ශූභ වන අතර නිර්මාණශීලී අදහස් ජනිත වන කාලයක් ද වනු ඇත.

වෘශ්චික - විවිධ බාධා

ඔබගේ කාලාත්‍රයාට හදිසි ශරීර පීඩා ඇතිවන කාලයක් වේ. මිතුරන්ගෙන් යම් යම් ගැටලු ඔබට ඇතිවනු ඇත. ඔබගේ කටයුතුවලට විවිධ පාර්ශවවලින් බාධා ඇති වනු ඇත.

ධනු - පවුලේ සමගිය

ව්‍යාපාර කටයුතුවල නිරත වී සිටින අයට යහපත ඵල ද ලාභ ද අත්වන කාලයක් වේ. විශාල අන්දමෙන් මුදල් යොදා කටයුතු කිරීමේදී පරිස්සම් වන්න. පවුල් දිවියේ සමගිය වර්ධනය වේ.

මකර - මාරුවීම් ලැබේ.

ඔබගේ කටයුතුවලට විවිධ පාර්ශවවලින් බාධා ඇතිවන අතර සැඟවුණු සතුරු කරදර උද්ගත වනු ඇත. සේවා ස්ථානයෙන් මාරැවක් අපේක්ෂා කළ අයකු නම් එම බලාපොරොත්තුව ඉෂ්ඨ වනු ඇත.

කුම්භ - සමාජ සේවයට

විරුද්ධ ලිංගික ආකර්ෂණයට ඔබව ලක්වන අතර ඔබගේ කටයුතු සාර්ථක ලෙස ඉටුකර ගැනීමට හැකිවන කාලයක් ද වේ. හිතමිතුරන්ගෙන් උදව් අත්වන අතර සමාජ සේවා කටයුතුවලින් ද යහපත් ඵල අත්වේ.

මීන - අලුත් දේපල

අලුත් දේපලක් මිලදී ගැනීමට හෝ නිවසේ අලුත්වැඩියාවක් කිරීමට සුබ කාලයක් වේ. ඔබගේ කටයුතුවල සාර්ථක බවක් ඇති කරන අතර පවුල් දිවියේ ද සමගිය වර්ධනය වන කාලයකි.

ජ්‍යොතිර්වේදි 
පානදුරේ රෝහන් වීරරත්න
දුම්රියපළ පාර, සිතුමිණ