කලබල කළත් කසාදෙ පරක්කුයි
මෙලොව උපත ලබන ස්ත්‍රී පුරුෂ දෙපක්ෂයම සුදුසු වයසට එළඹීමත් සමඟම විවාහයට පා ඔසැවීමට සිහින මවයි. සමහරු විවාහ අපේක්ෂාවෙන් ප්‍රේම සබන්ධතා ගොඩනගා ගනිති. තවත් සමහරුන්ගේ දෙමව්පියෝ, සහෝදර සහෝදරියෝ ඊට මැදිහත් වෙති. විටෙක මඟුල් කපුවන්ගේ සහයෝගය අපෙක්ෂා කරයි. සියලු උත්සහ ව්‍යර්ථ වීමෙන් පසුව පුවත්පත්වල හෝ වෙබ් අඩවිවල පිහිට පතති. මේ කුමන ක්‍රමයකින් හෝ තමන්ගේ මංගල සිහිනය සැබෑ කර ගැනීමට අවස්ථාව උදාවුවද සමහරුන්ගේ එම අදහස ඉටුකර ගැනීමට අවස්ථාවක් නොලැබේ.
විවාහය පමණක් නොව ඕනෑම කාරණයක් සිදුවන්නේ කර්ම බලය අනුවය යයි සමහරැ කල්පනා කරති. එහෙත් සියල්ල සිදුවන්නේ කර්ම බලය අනුව නොවේ. කර්මබලය, ඉරණම අනුව යම් යම් දේවල් සිදුවන අතර තවත් දේවල් තම දෛවය අනුව සිදුවේ. මෙම කරුණු කුමන ආකාරයෙන් බලපැවැත්වුවද කෙනකු මෙලොව ජනිත වන අවස්ථාවේදී ග්‍රහ තත්ත්වය ඒ කෙරේ යම් බලපෑමක් ඇතිකරන බව විවිධ පුද්ගලයන්ගේ කේන්දර විමර්ශනය කිරීම තුළින් සනාථ වී ඇත. විවාහය ඉක්මන් කරන හා ප්‍රමාද වන ග්‍රහයෝග එකක් දෙකක් නොව රාශියක්ම පවති. සමහර පුද්ගලයන් තරුණ වයසට අවතීරණය වීමත් සමඟම විවාහය සිදුවේ. තවත් සමහරුන්ගේ විවාහය සිදුවන්නේ තරුණ වයස ඉක්මවීමෙන් හෝ මැදි වයස පසුවීමෙන් අනතුරැවය. විවාහය සම්බන්ධයෙන් සියලු සුදුසුකම් සපුරා තිබියදී කුමන හෝ කාරණයක් මුල්වී විවාහය ප්‍රමාද වන හෝ සිදුනොවන අවස්ථා ඇති කෙරේ.
මෙසේ විවාහය ඉක්මනින් හෝ කාලයක් ගතවීමෙන් සිදුවූ පුද්ගලයන්ගේ කේන්දර පරීක්ෂා කිරීමේදී ඔවුන්ගේ කේන්දරවල විවාහය ඉක්මන් කරන හා ප්‍රමාද කරන ග්‍රහබලයන් පැවැති බැව් ඒ සම්බන්ධයෙන් කරනු ලැබ පර්යේෂණවලදී අනාවරණය වී ඇත. එබැවින් එවැනි තත්ත්වයන් ඇති වීමට හේතු සාධක වූ ග්‍රහ තත්ත්වයන් කවරේදැයි විමසා බැලීම විවාහය සම්බන්ධයෙන් උනන්දුවන හා විවාහය ප්‍රමාද වූවන්ට යම් ප්‍රයෝජනයක් වනු ඇත. විවාහයත් සිදුවීම කෙරේ වැඩි වශයෙන්ම බල පවත්වන්නේ චන්ද්‍රයා, අඟහරැ, සිකුරැ යන ග්‍රහයින්ය. මෙම ග්‍රහයින්ගේ සංයෝගය හෝ ඔවුන්ගේ දෘෂ්ටි බලයක් නිසා ලිංගික ආශාවන් හා ඒ කෙරේ පවත්නා උනන්දුව වැඩි කෙරේ. ලිංගික ආශාවන් හරවත් ආකාරයෙන් මුදුන් පමුණුවා ගැනීමේ නිරවුල් භාවය හා සදාචාර සම්පන්න තත්ත්වය විවාහයයි. ලිංගික සේවනය කෙරේ ඇල්මක් හා උනන්දුවත් දක්වන පුද්ගලයන්ගේ විවාහය ඉක්මන් වේ. ඒ සම්බන්ධයෙන් ඉහත ග්‍රහ තත්ත්වය වැඩි වශයෙන් බල පැවැත්වේ. මෙම යෝගයට බ්‍රහස්පති සම්බන්ධ වූ විට විවාහය ඉක්මන් වීම මෙන්ම විවාහයේ සාර්ථක භාවය වැඩි කෙරේ. බලවත් ආකාරයේ සහකරැවකු හෝ සහකාරියක් ලබා ගැනීමේ ප්‍රවණතාවය වැඩි කෙරේ.
විවාහය ඉක්මන් කරනු ලබන යෝගයන් එකක් දෙකක් නොව රාශියක් ජ්‍යොතිෂ ග්‍රන්ථවල දක්වා ඇත. එබැවින් ඒ අතරින් වඩාත් බලවත් යෝග කීපයත් විමර්ශනය කර බලමු.
අඟහරැට හෝ සිකුරුට අයත් රාශියක් තුළ අඟහරු සිකුරු යන ග්‍රහයින් සංයෝගව සිටීම විවාහය ඉක්මන් කරන යෝගයකි. මෙම යෝගයේ අදාල ග්‍රහයින් සමාන තම හෝ සමීප අංශකවල තැන්පත්වීම වඩාත් බලවත් වේ. ඔවුන්ගේ විවාහය තරුණ වයස තුළදී සිදුවේ. මෙය ප්‍රේම සම්බන්ධයක් අනුව ඉටුවීමේ ප්‍රවණතාව වැඩි කරයි.
හත්වැන්න අධිපතියා ස්වකේෂත්‍ර හෝ උච්ච බලයෙන් යුක්තව දහය, එකොළහ යන ස්ථානයක නම් විවාහය සම්බන්ධයෙන් පවත්නා බාධා අඩු කෙරේ. ලාබාල වයසේදීම විවාහයට ප්‍රවිශ්ඨ වීමට පිළිවන.
අයස්ථානය හා මධ්‍යස්ථානය විවාහය සම්බන්ධයෙන් යම් බලයක් ක්‍රියාත්මක කරන ස්ථානයන්ය. මෙම ස්ථාන අධිපතියන් සිය ස්ථාන මාරැ කරගෙන පරිවර්තන යෝගයක් යෙදුණු විට විවාහයට පවත්නා බාධා ඉවත් වේ. මෙය බලවත් ධන යෝගයක් වන අතර විවාහයෙන් පසු ධන තත්ත්වයේ යම් වර්ධනයක් ඇති කෙරේ.
රවි වෘෂභ රාශියේ තැන්පත්ව සිටියදී අඟහරැ ස්වකේෂත්‍ර තත්ත්වයෙන් නම් විවාහයට බාධා නොමැත. මෙම පිහිටීම වෘශ්චික ලග්න හිමියන්ට වැඩි වාසි ඇති කෙරෙන පිහිටීමකි. සිකුරැගේ දෘෂ්ටියට ලක්වූ විට ප්‍රේමය මුල් වී විවාහය සිදුවේ. සිකුරු කේන්ද්‍රස්ථානයක බල තත්ත්වයෙන් යුක්තව සිටියදී සෙනසුරැ තමාගේ රාශී වන මකර, කුම්භවල තැන්පත්ව සිටීමෙන් විවාහය ඉක්මන් වේ.
දෙවැන්න අධිපතියා ශුභ ග්‍රහයකු වී එකළොස් වැන්න තුළද ලග්නාධිපතියා දහ වැන්න තුළද තැන්පත් වීම විවාහය ඉක්මන් කරනු ලබන තවත් යෝගයකි
එකොළොස් වැන්නේ සිකුරැ ස්වකේෂත්‍ර, උච්ච, මූල ත්‍රිකෝණ බල තත්ත්වයෙන් පසුවන විට විවාහයට බාධා හෝ අවහිරතා ඇති නොකරයි. බලවත් ග්‍රහයකුගේ දශාවන් පවතින විට තරුණ අවධියේදම විවාහය සිදුවන්නේ ප්‍රේම සම්බන්ධයක් අනුවය.
ලග්නය, දෙවැන්න, එකළොස් වැන්න අධිපතියන් දහ වැන්න තුළ බලවත් ආකාරයෙන් පිහිටා තිබියදී පාපයක් නොදකී නම් විවාහය ඉතාම ලාබාල වයසේදී සිදුවීමට නියමිතය
සිකුරැ ලග්නය, පහ, දහය, එකොළහ යන ස්ථානයක බල තත්ත්වයෙන් පසුවන විට අඟහරැගේ දෘෂ්ටියට ලක්වීමද විවාහය ඉක්මන් කරන ග්‍රහ බලයකි.
මෙවැනි ග්‍රහ යෝග බල තත්ත්වයක් නිසා විවාහය ඉක්මන් වුවද විවාහය ප්‍රමාද කෙරෙන යෝගයන් කීපයක්ම පවතී. එවැනි යෝග පවත්නා විට විවාහය සිදුවන්නේ තරැණ වයස ඉක්ම වීමෙන් මැදි වයසින් පසුවය. එබැවින් එවැනි යෝග බලයක් ක්‍රියාත්මක වන ආකාරය විමසා බලමු.
චන්ද්‍රයා, සිකුරැ, අඟහරැ යන ග්‍රහයින්ගේ බල තත්ත්වය නිසා විවාහය ඉක්මන් වේ. එහෙත් මෙම ග්‍රහයින් දුර්වලත්වයට පත්වීමෙන් විවාහය පමා වෙනවා පමණක් නොව විවාහයේ අසාර්ථක භාවයට ද බලපානු ඇත. මෙම ග්‍රහයින් සමඟ සෙනසුරැ කුමන ආකාරයෙන් හෝ සම්බන්ධ වූ විට විවාහයේ ප්‍රමාදයක් ඇති කරයි. මෙසේ සෙනසුරැගෙත් ඉහත ග්‍රහයින් දුර්වලව සිටින විට අශුභදායක ග්‍රහයකුගේ මහ දශා හා අන්තර් දශාවන් පවත්නා කාලයේදී විවාහය සම්බන්ධයෙන් ඔබ කොපමණ උනන්දු වුවද විවාහය සිදුකර ගැනීමට අපහසුය.
සෙනසුරැ වෙන් වශයෙන් චන්ද්‍රයා, අඟහරැ, සිකුරැ සමඟ සංයෝගව සිටීම හා ඔවුන් සිය දෘෂ්ටියට ලක්වීම නිසා මංගල යෝජනාවලදී කුමන හෝ හේතුවක් ඉස්මතු වී යටපත් වේ. නැතහොත් කාරණාත්මක අවස්ථාවකදී ප්‍රතික්ෂේප වේ. මෙම යෝගය හෝ දෘෂ්ටිය විවාහය සම්බන්ධයෙන් වැඩි බලයක් ක්‍රියාත්මක වන ස්ථානයක යෙදුණු විට වඩාත් අශුභදායකය. මෙම ග්‍රහ තත්ත්වය විවාහ ප්‍රමාදය මෙන්ම විවාහයේ අසාර්ථක භාවය සම්බන්ධයෙන් ද යම් යම් බලපෑම් ඇති කරයි.
සිකුරැ මකර, කුම්භ යන සෙනසුරැට අයත් රාශිවල තැන්පත්ව සිටීම නිසා සිකුරැගේ බල තත්ත්වය දුර්වල කෙරේ. එවිට විවාහය පිළිබඳ අදහස් යටපත් වීමෙන් විවාහ ප්‍රමාදයන් ඇති කරයි.
බ්‍රහස්පති කේන්ද්‍රස්ථානවල තැන්පත් සිටින විශේෂිත බලයක් ඇති කරනු ලැබූවද විවාහය සම්බන්ධයෙන් හත් වැන්න තුළ සිටින විට යහපත් භාවයක් ඇති නොකරයි. මෙවැනි පුද්ගලයන්ට විවාහයක් කර ගැනීමේදී වෙනත් පාර්ශවකරැවන්ගේ ආධාර උපකාර අවශ්‍ය වනවා පමණක් නොව විවාහයේ ප්‍රමාදයක් ද ඇති කරයි. හත් වැන්න තුළ බ්‍රහස්පති තැන්පත් පුද්ගලයන්ගේ විවාහය දීර්ඝ කාලයක් පවත්වා ගෙනයාමට අපහසුය.
හත් වැන්න අධිපතියා සෙනසුරැ සමඟ සංයෝග වූ විට විවාහ ප්‍රමාදය සිදුවේ. බලවත් දශාවන් පැවැතිය හොත් ඔවුන් වයස අවුරුදු තිහ ඉක්මවීමෙන් පසුව යුග දිවියට අවතීරණය වේ.
සිකුරැ සහ චන්ද්‍රයා නීච රාශියක තැන්පත් වූ විට විවාහයේ ප්‍රමාදයක් ඇති කරයි. මෙම පිහිටීම් කාන්තා කේන්දරයක නම් වඩාත් අශුභදායකය. විවාහයේ ප්‍රීතීමත් භාවයට හානි පමුණුවයි.
සෙනසුරැ සිකුරුගේ රාශිවල තැන්පත්වීම හෝ සෙනසුරැගෙන් දෙවැන්න හා දොළොස් වැන්න තුළ සිකුරු තැන්පත්ව සිටින විට විවාහ සැපතට බාධා ඇති කරන අතර විවාහය බලවත් හේතුවක් නොමැතිව ප්‍රමාද කෙරේ.
ප්‍රේමදාස කළුතන්තිරි
බරණ ජ්‍යොතිෂ පර්යේෂනායතනය
සර්වෝදය මාවත
කැස්බෑව.
