වටිනා මැණික් මතුවෙන කාලයක්

ග්‍රහ මණ්ඩලයේ සියුම් බුද්ධිමතා වූ බුධ ග්‍රහයා සිකුරුට අයත් තුලා රාශියට අද දින එනම් 2019 සැප්තැම්බර් 29 වැනි ඉරැ දින දහවල් 12 පසුවී විනාඩි 36ට පිවිසෙයි. අඟහරුට අයත් සිත නැකතේ තුන්වැනි හා හතරවැනි පාදවලත් රාහුට අයත් සා නැකතේ සම්පූර්ණවත් බ්‍රහස්පතිට අයත් විසා නැකතේ ප්‍රථම දෙවැනි තුන්වැනි පාදවලත් ගමන් කරන බුධ 2019 ඔක්තෝබර් 23 වැනි බුධ දින රාත්‍රී 11 පසුවී විනාඩි 24 දක්වාම තුලා රාශියෙහි ගමන් කරනවා ඇත.

බුධ තුලා රාශිගත වීම අප රටට බලපෑම කෙසේද කියා සොයා බලමු.

වෙළෙඳ ව්‍යාපාරික කටයුතු සම්බන්ධව පවතින නීති කඩකිරීම් පිළිබඳව සොයා බැලීමට නිලධාරීන් වැඩි වශයෙන් ක්‍රියා කරනු ලබන කාලයක් වේ. භූමියෙන් වටිනා මැණික් හමුවන කාලයක් වනු ඇත. තැපැල් සේවක අර්බුදයක් පැන නගිනු ඇත. අලුත් දේ සොයා ගැනීමක් ද වාර්තා වන අතර නීතියට පටහැනිව ව්‍යාජව සකස් කළ ලේඛන පිළිබඳව අනාවරණය වීමක් ද වනු ඇත. ලේඛන හා මාධ්‍ය ක්ෂේත්‍රයේ හෝ නිරතව සිටි ප්‍රවීණයකුට මාරකයක් ද යෙදෙනු ඇත.

මේෂ - මුදල් පාඩු

මෙම වකවානුව තුළ විශාල අන්දමෙන් මුදල් යොදවා කටයුතු කිරීම අයහපත් වන අතර මුදල් පාඩු අත්වන කාලයකි. ලියවිලිවලට අත්සන් තැබීමේදී ද කල්පනාකාරී විය යුතු අතර නීතිමය ප්‍රශ්නයකට මැදිවිය හැකිය.

වෘෂභ - පොතපතින් බැහැරට

ඔබගේ කටයුතුවලට විවිධ වූ පාර්ශවවලින් බාධා ඇතිවන කාලයක් වන අතර තමාට ලබාගත නොහැකි වූ යම්කිසි දෙයක් තිබුණේ නම් එම දේ ලබාගත හැකිවන කාලයක් ද වේ. අධ්‍යාපන කටයුතුවල නිරත වී සිටින අය පොතපතින් බැහැරව කටයුතු කරන කාලයක් වේ.

මිථුන - අධ්‍යාපනයට හොඳයි

ඔබගේ කටයුතුවලට බාධාවක් නොවන අතර අධ්‍යාපන කටයුතුවල නිරත වී සිටින අයට යහපත් ඵල අත්වන කාලයකි. හිතමිතුරන්ගෙන් ද උදව් උපකාර අත්වන අතර දේශපාලන කටයුතුවල නියැලි අයට ද ශුභ ඵල අත්වනු ඇත.

කටක - අලුතින් රැකියා

ඉඩකඩම් ආශ්‍රිතව පැවති ප්‍රශ්න මඟහැරී යන අතර නව රුකියා අපේක්ෂා ද ඉෂ්ඨ කරගත හැකිවනු ඇත. සමාජ සේවා කටයුතුවල නිරත වී සිටින අයට ශුභ ඵල අත්වන අතර සිතේ සහනය අත්වන කාලයකි.

සිංහ - ක්‍රීඩා දක්ෂතා

ලේඛන කටයුතුවල නිරත වී සිටින අයට යහපත් ඵල අත්වන අතර සේවා ස්ථානයේ අන් අය අතර සමගිය වර්ධනය වනු ඇත. ක්‍රීඩා කටයුතුවල නිරත අයට තම දක්ෂතා දැක්විය හැකිවන කාලයක් ද වේ.

කන්‍යා - පවුලේ සමගිය

සේවා ස්ථානයේ වෙනස් වීමක් බලාපොරොත්තු වූ අයට යහපත් වන අතර පවුල් දිවියේ සමගිය ද වර්ධනය වන කාලයකි. අනවශ්‍ය වියදම් ඇතිවන බැවින් වියදම් පාලනය කළ යුතු කාලයකි.

තුලා - උරුම හිමිකම් ලැබේ.

නීතිමය ප්‍රශ්නයකට මැදිවිය හැකි බැවින් කල්පනාකාරී වන්න. පැවතියා වූ ශරීර පීඩාවලින් මිදීමට හැකියාව ලැබෙන වකවානුවකි. උරැම හිමිකම් පිළිබඳ පැවති ප්‍රශ්න මඟහැරී යනු ඇත. යම් යම් කටයුතුවලට විවිධ අයගෙන් බාධා ඇතිවනු ඇත.

වෘශ්චික - සතුන්ගෙන් පීඩා

විවිධ තරාතිරම්වල අය ඇසුරු කිරීමට අවකාශ අත්වන කාලයකි. සතුන්ගෙන් යම්කිසි ශරීර පීඩාවක් ඇතිවිය හැකි බැවින් කල්පනාකාරී වන්න. ඔබගේ කටයුතු සඳහා පිටස්තර පුද්ගලයන්ගෙන් ප්‍රශ්න බාධා ඇතිවන කාලයකි.

ධනු - මංගල යෝජනා

නිවසේ අලංකාරය වෙනුවෙන් විසිතුරු දේවල් මිලදී ගැනීමක් සිදු කරනු ලබන කාලයක් වේ. අවිවාහක අයට ගැලපෙන මංගල යෝජනා ඉදිරිපත් වන කාලයක් ද වේ. හිතමිතුරන්ගෙන් උදව් උපකාර අත්වන අතර දේශපාලන කටයුතුවල නිරත අයට ද ශුභ ඵල අත්වේ.

මකර - වාහන ලාභ

ඔබට යහපත් ඵල අත්වන අතර සේවා කටයුතුවල නිරත අයට යහපත් ඵල ද අත්වෙයි.  තම දරුවකුගේ ජයග්‍රහණයක් ද හිමිකර ගන්නා කාලයක් වේ. නව ඉඩමක් හෝ වාහනයක් මිලදී ගැනීමට සිත් යොමුවන කාලයකි.

කුම්භ - නව නිර්මාණ

ඔබට යහපත් ඵල අත්වන අතර අධ්‍යාපන කටයුතුවල නිරත වී සිටින අයට යහපත් ඵල ද, තරග ජයග්‍රහණ ලැබීම් ද සිදුවන කාලයක් වේ. නව නිර්මාණ බිහි කිරීමට යහපත් වන කාලසීමාවක් ද වේ.

මීන - ආර්ථික ගැටලු

ඔබට අයහපත් වන මුත් යම් යම් රෝග පීඩාවලින් මිදීමට හැකියාව ලැබෙනු ඇත. යම් යම් කටයුතුවලට විවිධ වූ පාර්ශවවලින් බාධා ඇතිකරන අතර ආර්ථික ප්‍රශ්න ද මතුවන කාලයක් වේ.

ජ්‍යොතිෂ නන්දන
ප්‍රවීණ ජ්‍යොතිෂවේදි ජ්‍යොතිෂාචාර්ය
රේණුක වික්‍රමසිංහ
සුවණැන ජ්‍යොතිෂ පර්යේෂණායතනය
ඔලබොඩුව, ගෝනපල