මේෂ, කටක, තුලා, මකර ලග්නවලට මාලවී යෝග බලය

ග්‍රහ මණ්ඩලයේ මනාලිය වූ සිකුරු තමාට ස්වක්ෂෙත්‍ර රාශි භවනක් වූ තුලා රාශියට 2019 ඔක්තෝබර් මස 4 වැනි කිවි දින පාන්දර 5 පසුවී විනාඩි 16ට පිවිසේ. එසේ පැමිණ අඟහරැට අයත් සිත නැකතේ තුන්වැනි හතරවැනි පාදවලත් රාහුට අයත් සා නැකතේ සම්පූර්ණවත් බ්‍රහස්පතිට අයත් විසා නැකතේ ප්‍රථම දෙවැනි තුන්වැනි පාදවලත් ගමන් කරන අතර 2019 ඔක්තෝබර් 28 වැනි සඳු දින උදේ 8 පසුවී විනාඩි 33 දක්වාම තුලා රාශියෙහි බලවත්ව ගමනේ යෙදේ. සිකුරු තුලා රාශියෙහි තැන්පත්ව ගමන් කරන මෙම වකවානුව තුළ මේෂ, කටක, තුලා, මකර ලග්න හිමියන්ටත් ඉහත ලග්නවලින් උත්පත්තිය ලබන දූ දරුවන්ටත් පංච මහා පුරුෂ යෝග බලයක් වන මාලවී යෝග බලයේ ඵල අත්වනු ඇත.

සිකුරැ තුලා රාශිගතවීම අප රටට ඇතිවන බලපෑම සලකා බලන විට සීඝ්‍ර දියුණුවකට වැඩපිළිවෙළක් දියත් කරන්නා වූ වකවානුවක් වුවද රට තුළ අවාසනාවන්ත සිදුවීම් වාර්තා වන කාලයකි. විශේෂයෙන් තරුණයන්ට හා කාන්තාවන්ට අශුභ ඵල ඇතිවන අතර පහරදීම්, ඝාතනය කිරීමේ සිදුවීම් වාර්තා වනු ඇත. අධිකරණවල දූෂිත ක්‍රියා සම්බන්ධ අපරාධ නඩු වැඩි වශයෙන් විභාගයට ගන්නා වකවානුවක් ද වන අතර ආගමික කටයුතු, ආගමික ස්ථාන ආශ්‍රිත ප්‍රශ්නයක් ද පැන නගිනු ඇත.

මේෂ - කටයුතු සාර්ථකයි

ඔබට යහපත් ඵල අත්වන අතර කරන කටයුතුවල සාර්ථක බවක් ද ඇතිවනු ඇත. විශේෂයෙන් ව්‍යාපාරික කටයුතුවල නිරත වී සිටින අයට ශුභ ඵල අත්වන අතර පවුල් දිවියේ ද සමගිය වර්ධනය වෙයි. අවිවාහක අයට මංගල යෝජනා ස්ථිර වනු ඇත.

වෘෂභ - සාර්ථක ගමන්

ඔබට එරෙහිව පැවති සතුරු උපද්‍රව කලින් හඳුනාගත හැකිවනු ඇත. සේවා ස්ථානය ආශ්‍රිතව පැවති ප්‍රශ්න මගහැරී යන අතර සාර්ථක කෙටි ගමන් යෙදෙනු ඇත. පවුල් දිවියේ සමගිය වර්ධනය වනු ඇත. තැන්පත් ධනය වියදම් වන කාලයක් ද වේ.

මිථුන - මාධ්‍ය කටයුතුවලට හොඳයි

විරුද්ධ ලිංගික ආකර්ශනයට ලක්වනු ඇත. හවුල් කටයුතුවලින් ඵල අත්වනු ඇත. මාධ්‍ය කටයුතුවල, කලා කටයුතුවල නියැලි අයට ශුභ ඵල අත්වන්නා වූත් වකවානුවක් වනු ඇත. ප්‍රේම සම්බන්ධයකට යම් යම් ප්‍රශ්න ද මතුවන්නා වූත් සමයකි. 

කටක - සිතේ සතුට

ඔබට යහපත් ඵල අත්වන අතර කරන කටයුතු සාර්ථක බවට පත්වනු ඇත. හදිසි ලැබීම් ද උරුම හිමිකම් ලැබීම් ද හිමිවන අතර සිතේ සතුට ඇතිවන්නා වූත් වකවානුවක් වේ.

සිංහ - අලුත් ව්‍යාපාර

මාධ්‍ය කටයුතුවල නිරත අයට ශුඵ ඵල අත්වන අතර හදිසි ලැබීම් ද හිමිවන කාලයකි. පවුල් දිවියේ සමගිය වර්ධනය වනු ඇත. අලුතින් ව්‍යාපාර කටයුතු ආරම්භයට ද ශුභ වන්නා වූත් වකවානුවකි.

කන්‍යා - වචනයට වශී වේ

පවුල් දිවියේ සමගිය ඇතිවන අතර තැන්පත් ධනය වියදම් වී යන කාලයක් ද වේ. තමාගේ වචනයට අන් අය වශීවන කාලයක් වේ. උගුර ආශ්‍රිත පීඩා ද සෙම් පීඩා ද ඇතිවනු ඇත.

තුලා - කැපී පෙනේ

ඔබට යහපත් ඵල අත්වන අතර කරන කටයුතු සාර්ථක බවට පත්වනු ඇත. ඔබ අන් අය අතර කැපීපෙනෙන තත්ත්වයට පත්වන අතර සියලු කටයුතු සාර්ථක වේ. අන් අයගේ ප්‍රශංසාවට පත් වීමටත් ඉඩ තිබේ.

වෘශ්චික - වැඩවලට බාධා

පවුල් දිවියේ ප්‍රශ්න ඇතිවන කාලයක් බැවින් කල්පනාකාරීව කටයුතු කරන්න. ඔබගේ කටයුතුවලට විවිධ පාර්ශවවලින් බාධා ඇතිවන අතර දුර ගමන් යෙදෙන කාලයක් ද වනු ඇත.

ධනු - ලිංගික බැඳීම්

ඔබට හිතමිතුරන්ගෙන් උදව් උපකාර ලැබෙනු ඇත. සමාජ සේවා කටයුතුවල නිරත වී සිටින අයට ශුභ ඵල අත්වන අතර විරුද්ධ ලිංගික බැඳීම් ද වර්ධනය වනු ඇත. තම ධනය වර්ධනය වන කාලයක් ද වේ.

මකර - හිමිකම් ලැබේ

ඔබට ඉතා යහපත් වන අතර කරන කටයුතු සාර්ථක වෙයි. හදිසි ලැබීම් ද ඇතිවන කාලයකි. නව රැකියාවක් බලාපොරොත්තු වූ අයගේ බලාපොරොත්තු ද ඉෂ්ඨ කරගත හැකි අතර උරුම හිමිකම් ලබාගත හැකි වෙයි.

කුම්භ - පින්වලට කැමැත්ත

කෙටි සාර්ථක ගමන් යෙදෙන කාලයකි. නව නිර්මාණශීලී අදහස් ජනිත වන්නා වූත් කාලයකි. අන් අයට අතර කැපී පෙනීමට අවකාශ අත්වන අතර පුණ්‍ය කටයුතුවල වැඩිපුර නිරත වීමට ද හැකියාව අත්වනු ඇත. 

මීන - නොගැලපෙන ඇසුර

ඔබගේ කටයුතුවලට විවිධ බාධා එල්ල වන්නා වූත් වකවානුවක් වේ. ඔබට එරෙහි සතුරු පීඩා ද වැඩිවන කාලයකි. නොගැලපෙන හිතමිතුරන් තමා සමඟ එක්ව කටයුතු කිරීම නිසා යම් යම් අපහසුතාවලට මැදිවන සමයකි.

ජ්‍යොතිෂ නන්දන
ප්‍රවීණ ජ්‍යොතිෂවේදි ජ්‍යොතිෂාචාර්ය
රේණුක වික්‍රමසිංහ
සුවණැන ජ්‍යොතිෂ පර්යේෂණායතනය
ඔලබොඩුව, ගෝනපල