ඡන්දපොළවල අර්බුද?

ග්‍රහ මණ්ඩලයේ සියුම් බුද්ධිමතා වූ බුධ සහ ග්‍රහ මණ්ඩලයේ මනාලිය වූ සිකුරු යන ග්‍රහයන් අතර යුද සංග්‍රාමයක් 2019 ඔක්තෝබර් 31 වැනි ගුරැ දින පාන්දර 3 පසුවී විනාඩි 36ට අඟහරුට අයත් වෘශ්චික රාශියෙහි සෙනසුරුට අයත් අනුර නැකතේ ප්‍රථම පාදයෙහි සිදුවනු ඇත. එහිදී බුධ සහ සිකුරු එකම අංශකයක ගමන් කිරීම නිසා ග්‍රහයන් එකිනෙකා අභිබවා යාමට උත්සාහ දැරීම මත බුධගෙත් සිකුරුගෙත් අයහපත් ග්‍රහ කිරණ පෘථිවිය වෙතට එල්ල වීමක් සිදුවෙයි. මෙහි බලපෑම ඉදිරි දින 40ක් පමණ පවතිනු ඇත.

බුධ සිකුරු යුද සංග්‍රාමයෙන් අප රටට ඇතිවන බලපෑම සලකා බැලූවිට මෙය මහජනයාට හිතකර නොවන කාලයක් බව කිව යුතුය. වෙළෙඳ කටයුතුවලට, බැංකු කටයුතුවලට අයහපත් වූ බලපෑම් එල්ල වන කාලයක් වේ. පතල් කර්මාන්තයේ අනතුරැ වාර්තා වනු ඇත. කෘෂිභෝගවලට හානි වීම්ද අසන්නට ලැබේ. පාසල් හා අධ්‍යාපන ආයතන ආශ්‍රිතව පවත්වන මැතිවරණ මධ්‍යස්ථානවල අයහපත් සිදුවීම්, පහරදීම් ආදිය වාර්තා වනු ඇත. මහජනයා අතර වෛරස් රෝග පීඩා ප්‍රචලිත වන්නාවූත් කාලයක් ද වේ. උසස් ප්‍රසිද්ධ කාන්තාවකට අයහපත් වන අතර හදිසි රෝග පීඩාවකට පත්වීමක් හෝ මාරකයක් ඇතිවීමක් වාර්තා වන්නාවූත් කාලයකි. රාජ්‍ය ආයතනයක් විසින් සිදු කරන ලද අක්‍රමිකතාවක් මහජනයාට අනාවරණය වන අතර විපක්ෂයට වැඩි වාසි ගෙන දෙමින් මැතිවරණ ජය හිමිවන කාලයක් ද වනු ඇත.

මේෂ - විවිධ බාධා

ඔබට එතරම් යහපත් ඵල උදාවන කාල වකවානුවක් නොවනු ඇත. ඔබගේ කටයුතුවලට විවිධ වූ බාධා එල්ල වේ. තමාගේ කාලත්‍රයාට හදිසි ශරීර පීඩා ගෙන දෙන කාලයක් ද වනු ඇත.

වෘෂභ - සතුට සමගිය

විශාල වශයෙන් මුදල් යොදවමින් කටයුතු කිරීමෙන් වැළකී සිටිය යුතු කාලයක් වේ. පවුල් දිවියේ පැවතියාවූ ප්‍රශ්න මඟහැරී සතුට සමගිය ඇතිවන්නාවූත් කාලසීමාවකි. උදරයේ පීඩාවක් මතුවනු ඇත.

මිථුන - සතුරු පීඩා

අධ්‍යාපන කටයුතුවල නිරත වී සිටින අයගේ අධ්‍යාපන කටයුතු අඩාල වන්නා වූ කාලයක් වේ. යම් යම් කටයුතුවලට විවිධ පාර්ශවවලින් බාධා ඇතිකරන වකවානුවක් වන අතර සතුරැ පීඩා ද ඇතිවන කාලයකි.

කටක - කලාකරුවන්ට හොඳයි

විරැද්ධ ලිංගික බැඳීම් ඇතිවන කාලයකි. හවුල් කටයුතුවලින් ඵල අත්වන අතර සමාජ සේවා කටයුතුවල නිරතව සිටින අයට ද සුබ ඵල අත්වේ. කලා කටයුතුවල නිරත වී සිටින අයට ද සුබ ඵල අත්වේ.

සිංහ - සේවා ගැටලු මඟහැරේ

උරැම හිමිකම් ලබාගැනීමට සුබ වන කාලයක් වන අතර නිවසට අලුතෙන් විසිතුරු භාණ්ඩ මිලදී ගන්නාවූත් කාලයක් වේ. සේවා ස්ථානයේ පැවතියා වූ ගැටලු මඟහැරී යනු ඇත.

කන්‍යා - ආගමික කටයුතු

නිර්මාණශීලී අදහස් ජනිත වන්නාවූ කාලසීමාවක් වේ. නව රැකියාවක් අපේක්ෂා කළ අයකු නම් තම අපේක්ෂාව ඉෂ්ඨ කරගත හැකි කාලයක් වේ. ආගමික කටයුතුවලට වැඩි වශයෙන් සහභාගී වන කාලයකි.

තුලා - තැන්පත් ධනය ඉහළට

පවුල් දිවියේ පැවතියා වූ ප්‍රශ්න මඟහැරී සමගිය වර්ධනය වන වකවානුවක් වේ. තැන්පත් ධනය වර්ධනය කරගත හැකි වනු ඇත. ඔබගේ කටයුතුවලට විවිධ පාර්ශවවලින් බාධා ඇති කරනු ඇත. උගුරේ පීඩා මතු වේ

වෘශ්චික - නීතිමය ප්‍රශ්න

ඔබගේ උත්සාහය මත කටයුතු රැසක් සාර්ථක බවට පත්කරගත හැකි වනු ඇත. මෙම වකවානුව තුළ තමා විසින් සිදු කරනු ලබන සියලු දේ හොඳින් සිතා බලා කළ යුතුය. නීතිමය ප්‍රශ්නයකට මැදිවිය හැකි බැවින් කල්පනාකාරී වන්න. 

ධනු - පවුලේ සමගිය

ඔබගේ කටයුතුවලට විවිධ බාධා ඇතිවන්නා වූ කාලයක් වේ. අලුත් අලුත් අය තමා සමඟ මිත්‍රකම් ඇතිකර ගන්නා වකවානුවක් වන අතර පවුල් දිවියේ සමගිය වර්ධනය වන කාලයක් ද වේ.

මකර - කැපී පෙනේ

විසිතුරු දේවල් මිලදී ගැනීමට උත්සාහ දරණ වකවානුවක් වන අතර හිතමිතුරන්ගෙන් උදව් උපකාර ද ලැබෙන කාලයක් වේ. සමාජ සේවා කටයුතු වෙනුවෙන් වැඩි වශයෙන් කාලය යොදවනු ඇත. අන් අය අතර කැපීපෙනෙන තත්ත්වයට ඔබ පත්වනු ඇත.

කුම්භ - හොඳ හිත වැඩේ

සේවා ස්ථානයේ අනෙකුත් සේවකයන් සමඟ හොඳ හිත වර්ධනය වන්නාවූත් කාලයක් වනු ඇත. අලුතින් ඉඩමක් මිලදී ගැනීමට අපේක්ෂා කරන්නේ නම් එම අපේක්ෂාව ඉෂ්ඨ කරගත හැකි වනු ඇත. නෑදෑයන් සමඟ මතභේද ඇතිවිය හැකි කාලයක් ද වේ.

මීන - උදව් උපකාර

ඔබගේ කටයුතුවල ප්‍රමාද ගති ඇතිවන කාලයක් වේ. ආගමික කටයුතු වෙනුවෙන් කාලය යොදවන වකවානුවක් වන අතර අන් අයගේ උදව් උපකාර හිමිවන වකවානුවක් ද වනු ඇත.

ජ්‍යොතිෂ නන්දන
ප්‍රවීණ ජ්‍යොතිෂවේදි ජ්‍යොතිෂාචාර්ය
රේණුක වික්‍රමසිංහ
සුවණැන ජ්‍යොතිෂ පර්යේෂණායතනය
ඔලබොඩුව, ගෝනපල