දරුවන්ට අපලයි
ග්‍රහමණ්ඩලයේ මනාලිය වූ සිකුරු ග්‍රහයා සමඟ සෙනසුරු යුද සංග්‍රාමයක නිතර වීමක් 2019 දෙසැම්බර් 11 වන බුධ දින සවස තුන පසුවී විනාඩි 36ට ගුරුට හිමිවූ ධනු රාශියෙදී හා කිවිට අයත් පුවසල නැකතේ 4 වන පාදයේදී සිදුවනු ඇත. එහිදී සිකුරු හා සෙනසුරුගෙත් අයහපත් වූ ග්‍රහකිරණ පෘථිවිය වෙත එල්ල වෙයි. මෙහි බලපෑම ඉදිරි මාස දෙකක් යනතුරු බලපානු ඇත.
මෙම සිකුරැ සෙනසුරු ග්‍රහයන්ගේ සංග්‍රාමය හේතුවෙන් අප රටට ඇති වන්නාවූත් බලපෑම විමසා බැලීමේදී මහජනයා අතර වැරදි සහගත පුවත් ප්‍රචලිත වන කාලයක් බව කිවයුතුය. ස්ත්‍රීන් සම්බන්ධ අපරාධ ක්‍රියා බහුලවන කාලයක් වනු ඇත. මන්ත්‍රිවරයකුට තදබල ශරීර පීඩාවක් හෝ රෝගාබාධයක් ඇතිවීමක් හෝ මාරකයක් යෙදීමක් ද ප්‍රසිද්ධ කලාකරුවකුට මාරක ඇතිවීමක් ද දක්නට ලැබෙනු ඇත. පාර්ලිමේන්තු මහජන නියෝජිතයින් අතර මතභේද ආරවුල්කාරී තත්ත්වයක් ඇති වන කාලයක් වේ. කුඩා දරුවන්ට වෛරස් රෝග හා හදිසි ශරීර පීඩා මත සිදුවන මාරක වැඩි වන කාලයක් වේ. ළමා හිංසාද ඉහළ යන කාලයකි. දුම්රිය තැපැල් ආශ්‍රිතව සිදුකළ වංචනික ක්‍රියා හෙලිවන කාලයක් ද වේ. රට තුළ වසංගත වෛරස් රෝග ප්‍රචලිත වන වකවානුවකි.
මේෂ - උදව් නොලැබේ
ඔබට එතරම් බලපෑමක් ඇති නොවනු ඇත. නමුත් කෙටි ගමන්වලින් ඵල නොලබන තත්ත්වයක් ඇති වනු ඇත. බාහිර ගැටලුවක් තමා වෙත පැමිණිය හැකි බැවින් කල්පනාකාරී වන්න. උදව් බලාගෙන අන් අයට උපකාර කිරීමට යාමට නිශ්ඵල කාල වකවානුවක්වේ.
වෘෂභ - හදිසි පීඩා
ඔබට එතරම් යහපත් කාල වකවානුවක් නොවේ. ඔබගේ මිතුරන්ගෙන් ඔබට ප්‍රශ්න ඇතිවන කාලයක් වන අතර හදිසි ශරීර පීඩා ද ඇතිවිය හැකි බැවින් අවදානම් ස්ථානවල ගමන් කිරීමේදී පරිස්සම් වීම වැදගත් වේ.
මිථුන - වැයකිරීම පරෙස්සමෙන්
පවුල් දිවියේ යම් යම් ප්‍රශ්න ඇතිවීම නිසා සමගියට බාධා ඇතිවන කාලයකි. ව්‍යාපාරික කටයුතුවල නිරත වී සිටින අයට ද සතුරැ පීඩා මතුවිය හැකි බැවින් අවධානයෙන් සිටින්න. විශාල අන්දමෙන් මුදල් යෙදවීම් නොකළ යුතු කාලයක් වේ.
කටක - සෞඛ්‍ය යහපත්
ඔබගේ කටයුතුවලට විවිධ වූ බාධා මතු වන කාලයක් වේ. ඔබගේ නෑදෑයන්ගෙන් එල්ලවූ යම් යම් ප්‍රශ්න නිරාකරණය වන අතර පැවති ශරීර පීඩාවකින් නිදහස් විය හැකිය. ශරීර සනීපය ඇතිවන කාලයක් ද වේ.
සිංහ - ඉගෙනුමෙන් බැහැරට
ප්‍රේම සම්බන්ධතාවලට බාධා ඇති වන කාලයක් වේ. අධ්‍යාපන කටයුතුවල නිරත වී සිටින අය ඉගෙනීම් කටයුතුවලින් බැහැරව කටයුතු කිරීමට සිදුවේ. දේශපාලනික කටයුතුවල නිරත වී සිටිනවා නම් තමාගේ හිත මිතුරන් තමා සමඟ සිත් අමනාපකම් ඇති කරගන්නාවූ වකවානුවක් වේ.
කන්‍යා - විදේශ ගමන්
භූමිය ආශ්‍රිත ප්‍රශ්න ඇති වන කාලයක් වේ. සිතට දුක් මතුවන වකවානුවකි. දුරගමන් විදේශ ගතවීමේ අපේක්ෂාවෙන් සිටි අයගේ බලාපොරොත්තු ඉෂ්ට වනු ඇත. පපුවේ අමාරැවලින් පෙළෙන අය පරිස්සම් විය යුතුවේ.
තුලා - ආගමික නැඹුරුව
අන් අයට උදව් බලාගෙන උපකාර කිරීමෙන් තමාට සෙතක් අත්නොවන කාලයක් වේ. ආගමික කටයුතුවලට වැඩිපුර සිත් යොදවන කාලයකි. අධ්‍යාපන කටයුතුවල නිරත වී සිටින අය එම කටයුතුවලින් බැහැරව සිටීමට සිදුවේ.
වෘශ්චික - දේශපාලන ගැටලු
ආර්ථික අපහසුතා ඇතිවන්නාවූත් කාල වකවානුවක් වේ. දේශපාලන කටයුතුවල නිරත වී සිටන අයට යම් යම් ගැටලු ඇති වන කාලයකි. හදිසි ශරීර පීඩා ඇති වියහැකි බැවින් පරිස්සම් විය යුතුවේ.
ධනු - නිවෙසෙන් පිට
විදේශ ගතවීමේ අපේක්ෂාවෙන් සිටි අයගේ බලාපොරොත්තු ඉෂ්ට වන්නාවූත් කාලයක් වේ. පවුල් දිවියේ ප්‍රශ්න ඇති වන්නාවූත් සමයකි. නිතර ගෙදරින් පිට සිටීමට සිදුවන්නාවූ දින කිහිපයකි.
මකර - මුදල් වැය වැඩියි
ඔබට එතරම් යහපත් නොවන අතර ඔබගේ කටයුතුවලට විවිධ බාධා ඇතිවන කාලයකි. පවුල් දිවියේ ද ප්‍රශ්න ඇතිවන අතර විශාල ලෙස මුදල් වැය වීම් සිදුවන කාලයක් ද වේ.
කුම්භ - භූමි ලාභ
දේශපාලන කටයුතුවල නිරත අයට තම හිතවතුන්ගේ ගැටලු ඇතිවන කාලයක් වේ. හවුල් කටයුතුවලින් ඵල අත්නොවන අතර භූමිය ආශ්‍රිතව කටයුතු කරන අයට ශුභ ඵල අත්වනු ඇත.
මීන - මැණික් ඉල්ලම්
සේවා ස්ථානයේ අනෙකුත් සේවකයන් සමඟ මතබේද ඇතිවිය හැකි බැවින් ඉවසීමෙන් කටයුතු කරන්න. පතල් ආශ්‍රිතව කටයුතු කරන අයට ලැබීම් සහිත කාලයක් ද වන අතර පදිංචි ස්ථානය පිළිබඳ ප්‍රශ්න ද ඇතිවනු ඇත.
ජ්‍යොතිෂ නන්දන
ප්‍රවීණ ජ්‍යොතිෂවේදි ජ්‍යොතිෂාචාර්ය
රේණුක වික්‍රමසිංහ
සුවණැන ජ්‍යොතිෂ පර්යේෂණායතනය
ඔලබොඩුව, ගෝනපල
