පාලමේ කුඩ්ඩෝ

යුද සමයේ දුම්රියෙන් කොළඹට ගමන් කරන අවස්ථාවල කැලණි පාලම පසුකර යද්දී මසිතට බියක් දැනුණි. ඊට හේතුව වූයේ කොළඹට ඇතුළු වන පාලම්, කොටින් විසින් බෝම්බ අටවා විනාශ කිරීමේ සැලසුමක් ඇතැයි දූෂමාණ ආරංචි පැතිරී තිබීමය.

මෑතකදී යළිත් එවැනි බියක් සිතට ඇතුළුවිණි. ඒ, කුඩුකාරයන් විසින් අලුතින් තැනු කැලණි පාලමේ ඇණ හා කම්බි ගලවා, පරණ යකඩ මුදලාලිට විකුණන බව මාධ්‍ය තුළින් දැන ගැනීමෙනි

යුද සමයේ පාලම් ආරක්ෂා වූයේ හමුදාවට හා පොලිසියට පින් සිද්ධ වෙන්නටය. දැන් නම් පාලම් රකින්නට කොකෙක්වත් නැත. කුඩ්ඩෝ වැඩ පෙන්වන්නේ එහෙයිනි.

මේ විදිහට ගියොත්, කැලණි පාලමට පමණක් නොව, සිරි ලංකාව පුරා තිබෙන සියලු යකඩ පාලම්වලට තිස්තුන් කෝටියක් දෙවි දේවතාවුන්ගේ පිහිටය.

කොටි සංවිධානයත් පරාජය කළ අපට කුඩු සේනාව මහ කජ්ජක්දැයි සමහරු පහුගිය කාලේ පාරම් බෑහ. එහෙත් කොටින්ටත් බැරි වූ ගේම්වලට කුඩ්ඩන් අත ගසා තිබීමෙන් පෙනී යන්නේ ඒ කතා පුස්සක් වී ඇති බවය.

ඉංග්‍රීසියෙන් මත්ද්‍රව්‍ය හඳුන්වන පොදු නාමය Drugs ය. එසේම රෝගීන් සුවපත් කිරීමට දෙන ඖෂධ වර්ගයන්ද 'ඩ්‍රග්ස්' නමින් හැඳින්වෙයි. වාසනාවකට මෙන් මත්පැන්, ඉහත කී මත්ද්‍රව්‍ය ගණයට නොවැටේ. අනෙක් අතට මත්ද්‍රව්‍ය අන්තරාදායකය. (නිදසුන්: අන්තරාදායක (Dangerous) මත්ද්‍රව්‍ය පාලන මණ්ඩලය). මත්පැන් සෞඛ්‍යයට අහිතකරය.

මත්ද්‍රව්‍ය රට තුළ විකිණීම හා භාවිතය තහනම්ය. එහෙත් මත්පැන් විකිණීමට රජයෙන් නීතිමය අවසර ලබාගත හැකිය. මත්පැන් පානයට කිසිදු තහනමක් නැත. මත්පැන් අලෙවියෙන් රජයට විශාල බදු මුදලක්ද ලැබේ. හැම අයවැයකදීම මත්පැන් මිල ඉහළ නංවන්නේ බදු ආදායම වැඩිකර ගැනීමට මිස, බීම නැවැත්වීමට නොවේ.

'අයිස්' යනු දැන් රටේ ප්‍රකට මත්ද්‍රව්‍යයකි. මඳ කලකට ඉහත නම් 'අයිස් ගහනවා' යනුවෙන් අදහස් කළේ, වැඩ නොකර නිකං සිටීමටය. ආණ්ඩුවේ කන්තෝරු බොහොමයක කෙරුණේ අයිස් ගැසීමය. දැන් තත්ත්වය වෙනස්ය. ''අයිස්'' ගැසීම, නීතියෙන් දඬුවම් ලැබිය හැකි වරදකි. එහෙත් තවමත් රජයේ සේවයට එය අදාළ නැති අතර, පරණ අයිස් ගැසීම තවමත් ක්‍රියාත්මක වන තැන් තිබේ. ඊට හේතුව ඉහත කී අයිස් වර්ග දෙකම ඇබ්බැහිවීමට ඉඩ තිබීමය.

එක්තරා වැඩපළක හිමිකරුවෙක් මා සමඟ කියූ පරිදි, බර වැඩ කරන ඇතැම් කම්කරුවන්ට බත් පැකට් එකට වඩා වටින්නේ අයිස් පැකට් එකය. 'අයිස්' දුන් පසු, ඔවුන්ගෙන් යකා බැඳගත් කල සේ වැඩ ගත හැකිය. එහෙත් ඒ ටික කාලයකටය. බලා සිටිද්දි වැහැරෙන ඔවුහු, ඇවිදින ඇටසැකිලි බවට පත්වන අතර, ඉක්මනින් මරණය කරා ගමන් කරති.

මිනිස්සු විවිධ දෙයට ඇබ්බැහි වෙති. මත්ද්‍රව්‍ය හා මත්පැන්වලට ඇබ්බැහිවූවන්ට ඉන් ගැලවීමක් නැත්තේ, එය ශරීරයට අත්‍යවශ්‍ය වන බැවිනි. කුඩුකාරයාට කුඩු නැති කල කුඩුසික් එකය. බේබද්දාට මත්පැන් නැති විට අතපය වෙවුලන්නට ගනී. තැබෑරුම්වල දොර ලෑලි, ගේට්ටු අරින තුරු බලා සිටින්නේ එබඳු අයය. දෙකක් දමාගත් පසු, ඔවුහු සාමාන්‍ය තත්ත්වයට පත් වෙති.

''අබින් කැවිලා වගේ'' යැයි කියුමක් අප අතර ඇත්තේ, ඇබ්බැහිය පිළිබඳවය. කුඩුකාරයාට මෙන්ම අබින් කෑ මිනිසාටද එය අත්හැරීම කළ නොහැකිය.

දුම්වැටියට, බීඩියට, ගංජා සුරුට්ටුවට පමණක් නොව, බුලත් විටටද ඇබ්බැහිවූවෝ වෙති. ජන්මෙට වඩා පුරුද්ද ලොකුය. එහෙත් ඇතැම් අයට පුරුදු නැති කර ගැනීමට වෛද්‍ය ප්‍රතිකාර ලබාගැනීමටද සිදුවෙයි.

එක්තරා පුද්ගලයෙක් තදින්ම මත්පැනට ඇබ්බැහි වී සිටියේය. ඔහුට 'බෙඩ් ටී' එක වෙනුවට අවශ්‍ය වන්නේ ''අයි ඕපනින් ෂොට්'' එකකි. ඔහුගේ පවුලේ උදවිය මේ පුරුද්දට දැඩි ලෙස විරෝධය පෑහ. ඒ නිසා ඔහු උදෑසනම කිරි වීදුරුවක් පානය කිරීමට හිත හදා ගත්තේය. පවුලේ උදවියද බොහෝ සතුටට පත්වූහ. එහෙත්, අර කිරි වීදුරුවේ හරි අඩක් තිබුණේ සුදු අරක්කු බව ඔවුන් දැනගත්තේ පසුවය.

මත්ද්‍රව්‍ය ගැන මෙන්ම මත්පැන් පිළිබඳවද ගෙතී ඇති සිනා කතා ද බොහෝය.

අමෙරිකාවේ එක් නගරයක, වීදියක මත්ද්‍රව්‍ය භාවිත කරන්නෙක්, බිම හිඳ සිටියේය. එය ශීතාධික රාත්‍රියකි. අවට වෙන කිසිවකුද දක්නට නැත. ඒ අසලින් ගමන් කළ පූජකවරයෙක්, මඳකට නැවතී මෙසේ විමසුවේය.

''පුතා... මට ස්ටේෂන් එකට යන පාර කියනවද?''

මත සිඳී අපහසුවෙන් සිටි අර පුද්ගලයා, දුම්රිය ස්ථානය පිහිටි දෙසට අත දිගු කර පෙන්වීය. ඔහුගේ තත්ත්වය ගැන අනුකම්පා කළ පූජකවරයා මෙසේ කීය.

''පුතා.. එන්න මාත් එක්ක. මම ඔබ අපායෙන් ගලවාගෙන දෙව්ලොවට යන පාර පෙන්වන්නම්.''

''විහිළු කරන්න එපා... ස්ටේෂන් එකට යන පාර දන්නෙ නැති ඔහේ කොහොමද, මට දිව්‍ය ලෝකෙට යන පාර පෙන්වන්නෙ.'' 

අවන්හලක තිබූ පෝස්ටරයක, ගැහැනියට වඩා මත්පැන් හොඳ බව පැහැදිලි කරන කරුණු කිහිපයක් දක්වා තිබුණි. ඉන් තුනක් පහත දක්වමි.

1. ඔබ එක් බෝතලයක් බී, තවත් බෝතලයක් ලබාගැනීම ගැන, පළමු බෝතලය විරුද්ධ නොවෙයි.

2. ඔබට, ඔබේ බෝතලය, මිතුරන් සමඟ බෙදාගත හැකිය.

3. ඔබට, ඔබේ බෝතලය, මාසයේ සෑම දිනයකම භාවිත කර විනෝද විය හැකිය.

I කපිල කුමාර කාලිංග