දිලිසෙන හීනයක් ලුහුබැඳි ව්‍යවසායිකාව - දිලිනි ඇළපාත
ස්වකීය හැකියාවන් මත පදනම්ව ව්‍යවසායක් ගොඩනගා ගැනීම සාර්ථකත්වය සඳහා පැහැදිලි මාවතක් විවර කරනවා. ඒ නිසාම ඔබ තුළ තියෙන හැකියාව විශ්වාස කරලා උනන්දුවෙන් උත්සාහයෙන් තමන්ගෙ හීන හඹා යන්න. ඔබේ හීන හැබෑ වේවි.
අපි කතා කරන්නේ එහෙම හීන හඹාගෙන ගිහිල්ලා සාර්ථක වුණු ව්‍යවසායිකාවක් පිළිබඳවයි. ඇය නමින් දිලිනි ඇළපාත. ඇය තරුණියක්. ඇයට තිබුණා අපිත් එක්ක බෙදාගන්න තරම් අපූරු කතාවක්. මේ වෙනකොට දිලිනි කියන්නෙ තමන්ගේම ඇඟලුම් සන්නාම කිහිපයක අයිතිකාරිනියක්. ඇයගේ ආයතනයේ නම Channy Ceylon (Pvt) Ltd. මේ කතාව ඇය සහ ඇගේ ව්‍යාපාර ගැනයි.
“මම උසස් පෙළින් පස්සේ අවුරුදු 19 දි තමයි මේ ව්‍යාපාරයට අත්පොත් තැබුවෙ. පාසල් කාලේදී මට හොඳට චිත්‍ර අඳින්න පුළුවන්. ඉතින් උසස් පෙළින් පස්සේ පැබ්රික් පේන්ටිං වගයක් කළා එක්තරා පාසලක ප්‍රසංගයක් වෙනුවෙන්. එතැනින් පස්සෙ ඒගොල්ලන්ගෙ පෞද්ගලික ඇඳුම් නිර්මාණය කරන්න මට කතා කළා. එතකොට තමා මට හිතුණේ මේ පැත්තෙන් මොනවා හරි දෙයක් පටන් ගත්ත නම් හොඳයි කියලා."
මේ සිදුවීම වෙන්නේ මීට වසර 12 කට විතර කලින්. දිලිනිට පහළ වුණු අදහසත් එක්ක ඇය තමන්ගේ හීනය හඹාගෙන යන්න පටන් ගන්නවා. ඒක හරි අපූරු චාරිකාවක්.
“මම තනි පාට ටී ෂර්ට් අරගෙන පේන්ට් කළා. මුලින්ම අතින් ඇඳලා පැබ්රික් පේන්ට් භාවිතයෙන් තමා ඒවා නිර්මාණය කළේ. පස්සේ සාර්ථකව ඒවා අලෙවි වෙනකොට, පරිගණක මෘදුකාංග භාවිතයෙන් ඩිසයින් කරලා එක තැනකට දීලා ඒ ඩිසයින් ටීෂර්ට්වල මුද්‍රණය කර ගත්තා." මේ විදිහට වැඩේ පටන් අරගෙන ටික කාලයක් ඇතුළත ලංකාවේ ප්‍රසිද්ධම ඇඟලුම් අලෙවිසලකින් දිලිනිට ලැබෙනවා ඇණවුමක්. කොහොම වුණත් ඒ වෙනකොටත් ඇඟලුම් කර්මාන්ත ශාලාවක් හෝ තමන්ගෙම නිෂ්පාදන සිදු කරන ස්ථානයක් ඇයට තිබුණේ නෑ. ඒත් මේ ලැබුණු අවස්ථාව අභියෝගයක් විදිහට ඇය බාර ගත්තා.
“මට හිතුණා මේ ක්ෂේත්‍රය පිළිබඳව වැඩිදුරටත් ඉගෙන ගන්න ඕන කියලා. ඒ නිසා මම විවෘත විශ්වවිද්‍යාලයේ විලාසිතාකරණය පිළිබඳව වැඩිදුරටත් ඉගෙන ගත්තා. ඒ වගේම ශ්‍රී ලංකා පේෂකර්ම සහ ඇඟලුම් ආයතනය වගේ ආයතන හරහාත් වැඩිදුරටත් අධ්‍යයනයන් සිදු කළා." සාර්ථකව ව්‍යවසායකයෙක් වීමේ හීනය ලුහුබඳින ඕනෑම කෙනෙක්ට තමන්ගේ විෂය ක්ෂේත්‍රය පිළිබඳව හොඳ දැනුමක් තියෙන්න ඕනෑ. ඉතින් දිලිනි ඇළපාත තමන්ට අවශ්‍ය දැනුම එකතු කර ගත්තා. ඉගෙන ගන්න අතරතුරේදීත් ඇය තමන් අතගහපු ව්‍යාපාරය අතහැරියෙ නම් නැහැ. විවිධ ප්‍රවර්ධන වැඩසටහන් සහ ආයතන වෙනුවෙන් ඇය නිර්මාණ සිදු කළා.
“ඉගෙන ගන්න අතරතුරේ මට මේ ක්ෂේත්‍රයට සම්බන්ධ තැනක රුකියාවක් ලැබුණා. එතැනදී ඒ ආයතනයේ සියලුම කාන්තා ඇඳුම් සම්බන්ධව බලන්න තිබුණෙ මට. මම මාස හයක් විතර තමයි ඒ ආයතනයේ වැඩ කළේ. එක හොඳ අත්දැකීමක් වුණා. ඇඟලුම් කර්මාන්ත ශාලාවක් පවත්වාගෙන යාම සහ ඊට අවශ්‍ය තාක්ෂණික දැනුම එතැනින් ලබාගත්තා. මට එතැනදි හිතුණා මගේම ඇඟලුම් සන්නාමයක් ගොඩනගන්න ඕනෙ කියලා."
දැනුම වගේම පළපුරුද්ද සහ අත්දැකීම් ව්‍යවසායක හීනය ලුහුබඳින කෙනෙක්ට ගොඩක් වැදගත්. දිලිනි ඇළපාත කළේ ඒක. තනි පුද්ගල ව්‍යාපාරයක් විදිහට කුඩාවට තමන්ගෙ ව්‍යාපාරය පටන්ගෙන තිබුණත් ව්‍යාපාරය, පුළුල් කරන අදහස දිලිනිට ඇතිවුණා.
“මගේ ව්‍යාපාරය කර්මාන්ත ශාලාවක් විදිහට සංවර්ධනය වුණා නම් හොඳයි කියලා මට හිතුණා. ළමයි දෙන්නෙක් විතර අරගෙන, 2016 දී ගෙදරදීම වැඩේ පටන් ගත්තා. මම සාම්පල් මහලා ෆේස්බුක් පිටුවකට දැම්මා. ඒත් ඒක එච්චර සාර්ථක වුණේ නෑ. ඒ වෙනකොට මට ඩිජිටල් මාර්කටිං පිළිබඳව ලොකු දැනුමක් තිබුණෙ නැහැ."
කිසිම වෙලාවක රතු පලසක් මතින් සාර්ථකත්වය කරා ගමන් කරන්න ඔබට බෑ. ඔබ වෙනුවෙන් රතු පලස් නිර්මාණය වෙන්නේ සාර්ථකව අත්පත් කර ගැනීමෙන් පසුවයි. ඉතින් දිලිනි ඒ අභියෝගවලට මුහුණ දුන්නා.
“ඊටපස්සේ මම සාම්පල් හදාගෙන ලංකාවේ ප්‍රසිද්ධ ඇඟලුම් වෙළෙඳ ආයතනවලට ගිහිල්ලා ඒ අය එක්ක සාකච්ඡා ඉල්ලගෙන ඇණවුම් ගන්න උත්සාහ කළා. ඊටපස්සේ තමා මට ඇණවුම් ලැබෙන්න පටන් ගත්තේ. මට ඕනෙ වුණේ අලුත් ඇඟලුම් සන්නාමයක් හදාගෙන ඉදිරියට එන අයට ආයෝජනයක් විතරක් කරලා පැත්තකට වෙලා ඉන්න පුළුවන් අවස්ථාවක් නිර්මාණය කරන එක."
වෙනත් ලේබල සහ සන්නාම සඳහා නිෂ්පාදනාගාරයක් විදිහට කටයුතු කරන එක තමා දිලිනිගෙ අරමුණ වුණේ. ඒ වෙනුවෙන් ඇය බොහෝ වෙහෙස මහන්සි වී වැඩ කළා. මුලදී ගැහැනු ළමයෙක් විදිහට තනිවම එහෙ මෙහෙ ගිහිල්ලා, විශාල මහන්සියක් දරලා කරන මේ වැඩේට ගෙදරිනුත් එච්චර කැමැත්තක් තිබුණෙ නැහැ. කොහොම හරි දිලිනි ඇළපාත ක්ෂේත්‍රයේ විවිධ ආයතන, පුද්ගලයන් සහ කණ්ඩායම් එක්ක සබඳතා ඇතිකර ගත්තා. අවසානෙ දිලිනි සමත් වුණා තමන්ගේම ජාලයක් නිර්මාණය කර ගන්න. මේ වෙනකොට මෙතෙර වගේම එතෙරත් ජයගන්න දිලිනි සමත් වෙලා.
“ඊටපස්සේ මට තේරුණා ගොඩනැගෙන ව්‍යාපාරයට අවශ්‍ය ශ්‍රමය මගේ ළඟ නැහැ කියලා. ඉතින් පිරිසක් එකතු කළා. මේ වෙනකොට මගේ ළඟ විසි දෙනෙක් වැඩ කරනවා. දැන් පිළියන්දල අපේ කර්මාන්ත ශාලාව තියෙන්නේ."
ඇය දැන් මධ්‍ය පරිමාණයේ ව්‍යාපාරිකාවක් බවට පත්වෙමින් ඉන්නවා. මේ උනන්දුව, උත්සාහය තවදුරටත් ඉදිරියට අරගෙන ගියොත් දිලිනි නිසැක වශයෙන්ම දැවැන්ත ව්‍යාපාරිකාවක් බවට පත්වීම නවත්වන්න බෑ.
“ලංකාවේ ප්‍රසිද්ධ ඇඟලුම් ආයතන කිහිපයකට අපි සැපයුම් සිදු කරනවා. ඒ වගේම ප්‍රසිද්ධ වෙළෙඳ නාම කිහිපයකුත් දැන් අපිත් එක්ක වැඩ කරමින් ඉන්නවා. ඒ වගේම ඩුබායිවල සන්නාම දෙකක් එක්ක අපි වැඩ කරනවා."
කොවිඩ් වසංගතය සහ ආර්ථික අර්බුදයට පෙර වෙළෙඳ සන්නාම 35ක් සමඟ දිලිනි ඇළපාත කටයුතු කරලා තියෙනවා. පසුගිය වසර කිහිපයේ විශාල පීඩනයක් එල්ල වුණත් නැවතත් ඇය සාර්ථකව ගමන ආරම්භ කරලා හමාරයි. මේ වෙනකොට සන්නාම 12 ක් දිලිනි සමඟ ඍජු ගනුදෙනු කරමින් සිටිනවා. මේ වෙනකොට දිලිනි ඇළපාත තමන්ගෙ Channy Ceylon ආයතනය යටතේ තමන්ගෙම කියලා ඇඟලුම් සන්නාම කිහිපයක් නිර්මාණය කරලා තියෙනවා. කාන්තා ඇඟලුම් සම්බන්ධව කතා කරද්දී Channy Ceylon නමින් තිබෙන සන්නාම ඇත්තටම තරමක් ප්‍රසිද්ධයි. ඒ වගේම Piccola Ragazza කියන්නෙත් දිලිනිට අයත් සන්නාමයක්.
දිලිනි ඇළපාතගේ කතාව තරුණ ව්‍යවසායකයන්ට පාඩම් ගොඩක් කියා දෙනවා. හීන පසුපස හඹා යාම, දැනුම සහ අධ්‍යයනය, අභියෝගවලට මුහුණ දීම වගේ ගුණාංග ඇගේ කතාවෙන් අපිට විද්‍යමාන වෙනවා. ඉතින් හීන කියලා කියන්නේ නින්දේදී දැකලා ඇහැරුණාම අමතක වෙන දෙයක් නම් නෙවෙයි. පියවි සිහියෙන්ම දැකලා මහ පොළොව මත යථාර්ථයක් කර ගන්න පුළුවන් දෙයක්.
