Two අයිඩියාස්
මොනවම හරි කරන්න ඕනෑ. ඒත් මොකක්ද කරන්නේ. මෙන්න මේ ප්‍රශ්නෙ නිසා ව්‍යාපාර පටන් ගන්න හිතන ගොඩක් දෙනා අතරමඟ නැවතිලා ඉන්නවා. ඉතින් හැම සතියකම පොඩි අදහස් දෙකක් අපි ඔයාලට දෙනවා...
අලුත් පාවහන් නිර්මාණය කරමු
ස්වයං රැකියාවක් විදිහට මේ වෙනකොටත් ගොඩක් දෙනෙක් මේ කර්මාන්තය දැනටත් සිදුකරනවා. මෙතැන දී දැනට වෙළඳපොලේ තියෙන පාවහන් තොග වශයෙන් මිලදී අරගෙන අලුත් අදහස් එක්ක ඒව නවීකරණය කිරීම තමයි සිද්ධවෙන්නේ.
ගොඩක් තරුණ තරුණියන් පුංචි විශේෂත්වයක් තියෙන පාවහන් පළඳින්න කැමතියි. නව අදහස් තියෙනව නම් ලස්සන ලස්සන දේවල් තමා මේ පාවහන්වලට එකතු කරන එක ඔබට එච්චර අමාරු නැහැ. පබුළු කිහිපයකින් ලස්සන නූල් අයිතම් කිහිපයක් භාවිතා කරලා ඉතාම සරලව ඒ වැඩේ කරන්න පුළුවන්.
මෙතනදී සිදුවෙන්නේ අගය වැඩි කිරීමක්. නමුත් ඒ අගය වැඩිකිරීම තුළ ලොකු ලාභයක් උපයන්න ඔබට පුළුවන් වැඩ. සාධාරණ මුදලකට අන්තර්ජාලය සමාජ මාධ්‍ය භාවිතා කරලා තමන්ගෙ නිර්මාණ අලෙවි කරන්න උත්සාහ කරන, ඒ වගේම සාමාන්‍ය ඇඳුම් ආයිත්තම් විකුණන වෙළඳසැල්වලටත් තමන්ගෙ නිර්මාණ ලබාදීලා අලෙවි කරන්නත් පුළුවන්.
හඳුන්කූරු නිෂ්පාදන අරඹමු
මේ දවස්වල ගොඩක්ම ජනප්‍රිය ස්වයං රැකියාවක් තමා හඳුන්කූරු නිෂ්පාදනය. මේ පිළිබඳ පුහුණුව ගොඩක් රාජ්‍ය සහ පෞද්ගලික ආයතනවලින් සපයනවා. ගෘහස්ත ව්‍යාපාරයක් විදිහට මේ ව්‍යාපාරය ආරම්භ කරන්න පුළුවන්.
මේ සඳහා අවශ්‍ය යන්ත්‍ර උපකරණ වෙළෙඳපොළ හොයාගන්න එක එතරම් අපහසු නෑ. යන්ත්‍රෝපකරණ ගොඩක් නැතුව වුණත් හඳුන්කූරු නිෂ්පාදනය සම්බන්ධව ආරම්භයක් ලබාගන්න පුළුවන්. මේ වෙනකොට ගොඩක් දෙනෙක් සාමූහිකව කණ්ඩායම් වශයෙන් තමා මේ නිෂ්පාදනයන් සිදු කරන්නේ.
ගොඩක් වෙලාවට පුහුණු වැඩසටහන් ඇතු‍ළේදීම ගැනුම්කරුවන් හොයාගන්න හැකියාවක් තියෙනවා. ඒ නැතත් උත්සාහ කළොත් සැලකිය යුතු ගැනුම්කරුවන් පිරිසක් හඳුන්කූරු නිෂ්පාදන මිලදී ගන්න වෙළෙඳපොළේ බලාගෙන ඉන්නවා. හුදෙක් නිෂ්පාදකයෙක්ම විතරක් නොවී තමන්ගෙම වෙළෙඳ නාමයක් ප්‍රවර්ධනය කරන්නත් කාලයත් මේ වැඩේදී ඔබට පුළුවන්.