අපේ කාලේ කොෆී කිරුළ දිනූ නලින් ප්‍රියන්ත
අද අපි කියන්න යන්නෙ කෝපි කාලේ කතාවක් නම් නෙවෙයි. මේක අපේ කාලේ කොෆී කතාවක්. ඔහු නමින් නලින් ප්‍රියන්ත. පදිංචිය නුවර කටුගස්තොට. ව්‍යාපාර තියෙන්නෙ මාතලේ. ව්‍යාපාරයේ නම kiyota coffee. ඇතැම්විට ඔබ මේ නම දැනටමත් අහල ඇති.
නලින් අපනයන වෙළෙඳපොළ සහ දේශීය වෙළෙඳපොළ ඉලක්ක කර ගනිමින් විශේෂිත කෝපි නිෂ්පාදන කරනවා. සරලව කිව්වොත් විවිධාංගීකරණය කරන ලද, බදින ලද කොෆී තමා නලින් නිෂ්පාදනය කරන්නෙ.
“මම මේ ව්‍යාපාරය පටන් ගත්තේ තනි පුද්ගල ව්‍යාපාරයක් විදිහට. උකුවෙල ප්‍රාදේශීය ලේකම් කාර්යාලයේ තමා මම ව්‍යාපාරය ලියාපදිංචි කළේ. ඇත්තටම මට මුලින් තිබුණේ කුළුබඩු සම්බන්ධ අදහසක්. මේ අදහස ක්‍රියාත්මක කරන අතරේ ජාතික තරුණසේවා සභාවේ ගමගේ මහත්මයා මගෙන් ඇහුවා, ජපානයට කෝපි වගයක් සප්ලයි කරන්න තියෙනවා ඔයාට ඒක කරන්න පුළුවන්ද කියලා. ඒ අනුව 2012 දී අමු කෝපි මම ජපානයට යැව්වා. ඒ අය ගොඩක් සතුටු වුණා."
මේ අතර රේන් ෆොරෙස්ට් නම් ආයතනයක සම්බන්ධතා මත ජර්මනියට ද කොෆී අපනයනය කිරීමටත් නලීන්ට අවස්ථාව හම්බවෙනවා. කොහොම වුණත් නලින් ප්‍රියන්ත නම් ව්‍යවසායකයාගේ කොෆී කතාව මෙතැන් පටන් ලියැවෙන්නෙ ජපන් සම්බන්ධතා එක්ක. නිසි ප්‍රමිතියට සැපයුම් සිදුකිරීම නිසා ජපන් ගැනුම්කරුවන් නලින් පිළිබඳ පැහැදීමක් ඇති කරගෙන තියෙනවා.
“ජපානයේ මගේ ගැනුම්කරු කසූකි මහත්මයා මට ගොඩක් උදව් කළා. අපිට විශාල වියදම්ක් දැරීමට සිදුවුණු නිසා ලෝක වෙළෙඳපොළට සාපේක්ෂව මිල ඉහළ අගයක තිබුණේ. නමුත් කසූකි මහත්මයා ලාභ නොලබන පරමාර්ථයෙන් අපෙන් මිලදී ගැනීම් සිදු කළා. එයාලා ළඟ 1987 නිෂ්පාදනය කරපු කෝපි බදින යන්ත්‍රයක් තිබුණා භාවිතයෙන් ඉවත් කරපු. එයා ඒක පරිත්‍යාගයක් විදිහට ලංකාවට එව්වා. ඊටපස්සේ මම ඒ යන්ත්‍රය භාවිත කරලා බදින ලද කෝපි නිෂ්පාදනය ආරම්භ කළා."
උත්සාහවන්ත විශ්වාසවන්තයකු වීමට ඔබට හැකි නම් වාසනාව ඔබ කරා එළඹෙනවා. නලින්ගේ කතාවේ ආරම්භයේදී අපට ඉගෙන ගන්න ලැබෙන පාඩම ඒක.
“පළමු වසරේ කිලෝ එකක් දෙකක් තමයි මට විකුණගන්න පුළුවන් වුණේ. කොහොම හරි 2016 දී ලංකාවේ ඉහළම වෙළෙඳපොළක් තියෙන පෙරේරා ඇන්ඩ් සන්ස් ආයතනයේ අයිස් කෝපි සඳහා සැපයුම් සිදු කරන්න මට අවස්ථාවක් ලැබුණා. ඒ වගේම තවත් ලංකාවේ ප්‍රසිද්ධ කොෆී සම්බන්ධ ආයතනයක ප්‍රකට වෙළෙඳ සන්නාමයක් සඳහා සැපයුම් කරන්නත් මට අවස්ථාව ලැබුණා."
නලින් මෙම සියලු අවස්ථාවන් සිය උත්සාහයෙන් දිනාගත් දේවල්. මේ වෙනකොට ලංකාවේ සුපිරි වෙළෙඳසල්, හෝටල්, කොෆී ෂොප් විතරක් නෙවෙයි, කටුනායක ගුවන් තොටුපළේ ජනප්‍රිය කොෆී කැෆේවලටත් නලින් සැපයුම් සිදු කරනවා.
“අපනයන වෙළෙඳපොළේ අපේ නිෂ්පාදනවලට ලොකු ඉල්ලුමක් තියෙනවා. නමුත් ඒ සඳහා නිෂ්පාදන සිදුකරන්න තරම් කෝපි අපි සතුව නෑ. ඒ අනුව නුවරඑළිය, හඟුරන්කෙත, වළපනේ, කොත්මලේ ප්‍රාදේශීය ලේකම් කාර්යාල නිලධාරීන්ගේ මැදිහත්වීමත් එක්ක අපි ව්‍යාපෘතියක් කළා. ගොවීන්ට කෝපි පැළ ලබා දීලා වගාවන් අාරම්භ කළා. ඒ අනුව සැලකිය යුතු අස්වැන්නක් අපි බලාපොරොත්තු වෙනවා."
මේක රටට සහ ගොවීන්ට ද ඉතාම වැදගත් ව්‍යාපෘතියක්. මේ සඳහා රාජ්‍ය ආයතන වෙතින් ලැබුණු සහයෝගය නලින් අගය කරනවා. මීට අමතරව කොෆී සම්බන්ධ වෘත්තීය අධ්‍යාපනය සඳහා මේ වෙනකොට අධ්‍යාපන ආයතනයක් ආරම්භ කරන්නත් නලින් කටයුතු කරලා තියෙනවා.
“විශේෂයෙන්ම ලංකාවේ ශ්‍රමිකයන් විදිහට සහ උසස් අධ්‍යාපනය සඳහා විදෙස්ගත වන අයට කොෆී සකසන්නකු ලෙස වෘත්තීය පිළිගැනීමක් ලබාදීම සඳහා තමා අපි ව්‍යාපෘතිය ආරම්භ කළේ. බැරිස්ටර් කියන වෘත්තිය සඳහා අපි ජාත්‍යන්තරය පිළිගත් සහතිකයක් ලබා දෙන්න කටයුතු කරනවා."
මේ ආයතනය පිහිටලා තියෙන්නෙ කොළඹ කිරුළපන. මේ වගේ ව්‍යාපෘති කිහිපයක් නලින් ප්‍රියන්ත ක්‍රියාත්මක කරමින් ඉන්නවා. ඒ නිසාම ව්‍යාපාරිකයෙක් විදිහට ලංකාවේ පිළිගත් සම්මාන කිහිපයක්ම නලින්ට හිමි වුණා.
ඇත්තටම ඔහුගේ කතාව තවත් සවිස්තරව කියන්න පුළුවන්. අපි ඉතාමත් කෙටියෙන් තමයි මේ පිළිබඳ තොරතුරු ඔබත් එක්ක බෙදාගත්තෙ. kiyota coffee ආයතනයේ සමාජ මාධ්‍ය පිටුවලට ගියොත් මේ පිළිබඳ තවත් තොරතුරු ඔබට දැන කියාගන්න පුළුවන්.
