ව්‍යාපාර ලෝකය ටික්ටොක්කරණය වෙයි
මේ වනවිට ලංකාවේ Tik Tok සමාජ මාධ්‍ය ව්‍යාපාර ලෝකය ක්‍රමයෙන් ආක්‍රමණය කරමින් ඉන්නවා. සුළු හා මධ්‍ය පරිමාණ ව්‍යාපාරිකයෝ මෙම සමාජ මාධ්‍ය වේදිකාව භාවිත කිරීමටත්, සාමාන්‍ය තරුණ තරුණියන් මෙම වේදිකාව හරහා නව ව්‍යාපාර ආරම්භ කිරීමටත් පෙළඹිලා.
මේක ඉතා සාධනීය තත්ත්වයක්. කොහොම නමුත් මේ වේදිකාවේ මෙවන් දෑ කළ හැකි බව තවමත් ගොඩක් දෙනෙක් දන්නේ නැහැ. ඒත් මේ වනවිට ටික් ටොක් හරහා සාර්ථක ව්‍යවසායන් ගොඩනගපු සෑහෙන්න පිරිසක් ඉන්නවා.
ව්‍යාපාර ප්‍රතිරෑප ප්‍රදර්ශනය කිරීම වගේම ව්‍යාපාර සිදු කිරීමත් ටික් ටොක්වල සිදුවෙමින් තිබෙනවා. කොහොම නමුත් නවීන ලෝකය හා මුසුවීමට මෙම නව ප්‍රවණතා හඳුනාගැනීම වැදගත්. එම නිසාම ටික් ටොක් ව්‍යාපාර ගොඩනගපු අය සහ තම ව්‍යාපාර ටික් ටොක් තුළට ගෙන ආපු අය පිළිබඳව අපි අහඹු ලෙස තෝරාගත් නියැදි කිහිපයක් ඔබ හමුවේ තබනවා.
D.K. Rathnayake
ඩී.කේ. ජීවත් වෙන්නේ කොරියාවේ. කරන්නෙ ස්මාර්ට් ජංගම දුරකථන ටැබ්, ලැප් වගේ දේවල් අලෙවි කිරීම. ටික් ටොක් ඇතුළේ එක්ලක්ෂ තිස්දහසක් විතර පිරිසක් ඔහුව අනුගමනය කරනවා. සාමාන්‍ය වීඩියෝවක් සඳහා ලක්ෂයත් ලක්ෂ හතත් අතර නැරඹුම් වාර ප්‍රමාණයක් තියෙනවා.
ඩී.කේ.ට අනන්‍ය වෙච්ච ප්‍රාසාංගිකව ඉදිරිපත් කිරීමේ හැකියාවක් තියෙනවා. ඒ නිසාම තමා ඔහු මෙතරම් ජනප්‍රිය. කොහොම නමුත් ඔහුගේ වෙළෙඳපොළ ඉලක්කය කොරියාවේ වෙසෙන ශ්‍රී ලාංකිකයන්. ඒ නිසාම කොරියාවේ වෙසෙන ශ්‍රී ලාංකිකයන්ගේ ගැටලු ගැනත් ඔහු විටින් විට කතා කරනවා.
fabshopie.lk
මේක කුඩා පරිමාණයේ විසිතුරු අයිතම නිෂ්පාදනය කරලා අලෙවි කරන ටික් ටොක් ව්‍යාපාරයක්. අංජු කියලා තරුණියක් තමා මේ ව්‍යාපාරය කරගෙන යන්නෙ. තරුණියන් හිස පළඳින, ගෙල පළඳින කොණ්ඩා බූල්, බෝ වගේ දේවල් මෙතැන අලෙවි කරනවා.
දහතුන් දහසක විතර පිරිසක් මේ ගිණුම අනුගමනය කරනවා. සමස්ත 'ලයික්' අනූහය දහසක් විතර තියෙනවා. ඒ වගේම එක් වීඩියෝවක් සඳහා දහසත් හැත්තෑ දහසත් අතර නැරඹුම් වාර ප්‍රමාණයක් දැකගන්න පුළුවන්. ඉතා සරල, කුළුපග ඉදිරිපත් කිරීමේ ශෛලියක් ඇය අනුගමනය කරන්නෙ. තමන්ගෙ නිෂ්පාදන පාරිභෝගිකයන්ට යැවීමට ඇසුරුම් කරන අවස්ථාවේ වීඩියො තමා අංජු වැඩි හරියක් ඉදිරිපත් කරන්නෙ. කුඩා ව්‍යාපාර ප්‍රවර්ධනය පිළිබඳවත් ඇය කතා කරනවා.
Nilupul Jayathissa
මේ ගිණුමේ වැඩි බරක් දීලා තියෙන්නෙ මැණික් කර්මාන්තයට. පතල්කරුවෙක් විදිහට පේන නිලුපුල් කර්මාන්ත සම්බන්ධ විවිධ වීඩියෝ ටික් ටොක් වෙත එකතු කරනවා. කොහොම නමුත් මේ ගිණුමේ ව්‍යාපාරික අරමුණක් පේන්න නෑ.
තමන් කරන ව්‍යාපාරය පිළිබඳ සාමාන්‍ය දෑ ටික් ටොක් වෙත එකතු කරන ව්‍යාපාරිකයන්ට මේ තරුණයා උදාහරණයක්. කොහොම නමුත් ඔහුවත් විසිහත් දහසක විතර විරිසක් අනුගමනය කරනවා. එක් වීඩියෝ එකකට විසිදහසක විතර නැරඹුම් වාර සාමාන්‍යයක් දැකගන්න පුළුවන්. කොහොම නමුත් මැණික් වෙළෙඳාමට ටික් ටොක් යොදාගන්න වෙළෙඳුන් ඕනෑ තරම් ඉන්නවා.
KD Mobiles
මේ ව්‍යාපාරය ලංකාවේ කරගෙන යන්නෙ තරුණයෙක්. ඔහුට තියෙනවා ලංකාවේ සාමාන්‍ය දුරකථන අලුත්වැඩියා කරන අලෙවිසලක්. තමන්ට පාරිභෝගිකයෝ ලබා දෙන ජංගම දුරකථනවල පවතින ගැටලු, ඒවා කැඩී බිඳී ගිය විදිහ ඔහු කතා කරනවා. ඒ වගේම කැඩුණු දුරකථන අලුත්වැඩියා කරලත් ඔහු ප්‍රේක්ෂකයන්ට පෙන්නවා.
තිස් දහසක් විතර අනුගමනය කරන මේ ගිණුමට දෙලක්ෂ පනස් දහසකට අධික ලයික් ප්‍රමාණයක් තියෙනවා. ඒ වගේම ලක්ෂයත් ලක්ෂ පහත් අතර නැරඹුම් වාර සාමාන්‍යයක් ඔහුගේ වීඩියෝවක දැකගන්න පුළුවන්. රටේ එක එක ප්‍රදේශවලින් පාර්සල් කරලා පවා අලුත්වැඩියාවට ඔහුට දුරකථන එවන්න ටික් ටොක් පරිශීලකයෝ කටයුතු කරලා තියෙනවා. මේ ගිණුමේ ශීඝ්‍ර වර්ධයක් පෙන්නුම් කරනවා.
PAKR and Go
මේ ටික් ටොක් ගිණුම හරහා සිදුවෙන්නෙ වාහන විකිණීම සහ මිලදී ගැනීමට පහසුකම් සැපයීම. මේ ගිණුම පවත්වාගෙන යන්නෙ ලංකාවේ කාර් සේල් එකක් විසින්. දහනව දහසකට අධික පිරිසක් මෙම ගිණුම අනුගමනය කරලා තියෙනවා. ඒ වගේම සෑම වීඩියෝවකටම දහ දහස්, ලක්ෂ අතර නැරඹුම් වාර ප්‍රමාණයක් තිබෙනවා.
මේ අය වාහනවල තත්ත්වය සහ තවත් තොරතුරු, ඡායාරෑප වීඩියෝ සමඟ ටික් ටොක් වෙත මුදාහරිනවා. කොමෙන්ට් හරහා ගනුදෙනුකරුවන් සම්බන්ධ කර ගන්නවා. මේ ආකෘතිය දැන් බොහෝ රථවාහන ව්‍යාපාරිකයන් භාවිත කරමින් ඉන්නවා.
