අපනයන ආර්ථිකයකට කාර්මික සංවර්ධන මණ්ඩලය ශක්තියක්
- ලංකා කාර්මික සංවර්ධන මණ්ඩලයේ සභාපති වෛද්‍ය සාරංග අලහප්පෙරුම
ශ්‍රී ලංකාවේ කර්මාන්ත ව්‍යවසාය සංවර්ධනය උදෙසා සුවිශාලම දායකත්වයක ලබාදෙන ආයතනය තමා ලංකා කාර්මික සංවර්ධන මණ්ඩලය. මේ ආයතනයේ වර්තමාන ක්‍රියාකාරීත්වය පිළිබඳව වගේම ආයතනය හමුවේ පවතින අභියෝග පිළිබඳවත් සොයා බලන්න අපි තීරණය කළා. ඒ සඳහා අපි එක්ක සම්බන්ධ වුණේ ලංකා කාර්මික සංවර්ධන මණ්ඩලයේ සභාපති වෛද්‍ය සාරංග අලහප්පෙරුම මහතා.
එතුමා අපිත් එක්ක මුලින්ම සඳහන් කළේ, කාර්මික සංවර්ධන මණ්ඩලය හෙට අනිද්දට කරන්න යන දැවැන්ත ඓතිහාසික කටයුත්තක් පිළිබඳව.
''අපේ සමාජයේ නිෂ්පාදකයාට ලොකු තැනක් තිබුණෙ නැහැ. වෙළෙන්ඳන්ට තමයි යම් තත්ත්වයක් තිබුණේ. එය වෙනස් කරන්න අපි විවිධ වැඩසටහන් දියත් කරනවා. මේ දිනවල අපි සූදානම් වෙනවා ''ජාතික කර්මාන්ත විශිෂ්ටතා සම්මාන උළෙල'' සඳහා. නිෂ්පාදකයන් දිරිමත් කිරීමේ අරමුණෙන් ගරු ජනාධිපතිතුමන්ගේ ප්‍රධානත්වයෙන් නොවැම්බර් පළමුවැනිදා මේ සම්මාන උළෙල පැවැත්වෙනවා.''
ක්ෂේත්‍ර විසි එකක් නියෝජනය වෙන පරිදි නිෂ්පාදකයන් තුන්සිය දෙනෙක් මෙම සම්මාන උළෙලේදී අගැයීමකට ලක් කරන්න නියමිතයි. සභාපතිතුමා සඳහන් කරන විදියට ශ්‍රී ලංකාවේ කර්මාන්ත ක්ෂේත්‍රයේ දැවැන්තම ඇගයීම තමා ''ජාතික කර්මාන්ත විශිෂ්ටතා සම්මාන උළෙල''. සැබවින්ම ඇගයුමක් කියන්නෙ දිරියෙන් නැගිටින මිනිසුන්ට ශක්තියක්.
මේ දිනවල ලංකා කාර්මික සංවර්ධන මණ්ඩලය සහ කර්මාන්ත අමාත්‍යංශය තවත් වැදගත් ප්‍රතිපත්තිමය තීරණ කිහිපයක් වෙනුවෙන් වෙහෙස වී කටයුතු කරනවා.
''අපේ කර්මාන්ත ඇමතිතුමා, මුදල් අමාත්‍යංශය සමඟ සාකච්ඡා කරලා සුවිශේෂී එකඟතාවක් ගොඩනගාගෙන තියෙනවා. ලංකාව තුළ නොමැති කර්මාන්තකරුවන්ට නිෂ්පාදන සඳහා අමුද්‍රව්‍ය බදුවලින් තොරව ආනයන කිරීමට. අපනයන කේන්ද්‍රීය ආර්ථිකයක් කරා යන ගමනේදී, අමුද්‍රව්‍ය සඳහා බදු පැනවීම නිෂ්පාදන සඳහා තරගකාරී මිලක් පවත්වාගෙන යෑමට බාධාවක්. ඒ නිසාම මේ තීරණය අපනයන ආර්ථිකයක් කරා යන රටකට අතිශය වැදගත් තීරණයක්.''
අපනයන වෙළෙඳපොළ විශාල කර ගනිමින් මෙරටට සැලකිය යුතු විදේශ විනිමයක් රුගෙන ඒම තමා මෙහි අරමුණ වෙලා තියෙන්නේ. ලෝක සාපේක්ෂව අපේ අපනයන වෙළෙඳපොළ ඉතාම කුඩායි. එය පුළුල් කරගන්න නම් මේ වගේ තීන්දු තීරණ ගතයුතු වෙනවා. ලෝකයට අපනයන වෙළෙඳපොළ විශාල පංගුවක් අත්පත් කරගන්න තමා කර්මාන්ත අමාත්‍යංශය සහ කාර්මික සංවර්ධන මන්ඩලය උත්සාහ කරන්නෙ.
''අපනයනය දිරිමත් කිරීමේ අරමුණින් අපි අමුද්‍රව්‍ය, තාක්ෂණය ආදී සියලු පැතිකඩ ඔස්සේ අපි කටයුතු කරමින් සිටිනවා.''
ශ්‍රී ලංකාව තුළ කර්මාන්ත පිහිටුවීමේ හැකියාව සහ ඒ සඳහා ඇති අභියෝග පිළිබඳවත් වෛද්‍ය සාරංග අලහප්පෙරුම මහතා අපි සමඟ පැහැදිලි කළා.
''අපේ රටේ ජන ඝනත්වය වැඩි නිසා කර්මාන්ත පිහිටුවන්න ඕනෑ කර්මාන්ත කර්මාන්තපුර ඇතුළේ. සාමාන්‍යයෙන් ලෝකයේ රටක් සංවර්ධනය වනවිට සමස්ත භූමියෙන් සියයට තුනක්වත් (3%) කර්මාන්ත කලාප බවට පත්විය යුතුයි කියලා කියනවා. ඒත් අපේ රටේ කර්මාන්තපුර තියෙන්නෙ අක්කර 5000ටත් අඩු භූමි ප්‍රදේශයක. ඒ කියන්නේ සමස්ත භූමි ප්‍රමාණයෙන් සියයට බිංදුවයි දශම බින්දුවයි හතරක් (0.04%) භූමි ප්‍රමාණයක්. 2030 වෙනකොට මෙම තත්ත්වය සියයට එකක් දක්වා (1%) වර්ධනය කරන්න අපි කටයුතු කරමින් ඉන්නවා.''
ඒ සඳහා අවශ්‍ය සැලසුම් සකස් කොට ඉඩම් හඳුනාගැනීමේ ක්‍රියාවලියට ලංකා කාර්මික සංවර්ධන මණ්ඩලය එක්වෙලා ඉන්න බව සභාපතිතුමා අප සමග සඳහන් කළා. කෙසේ නමුත් තවත් ආයතන රුසක සහයෝගය ඊට අවශ්‍ය බව සභාපතිතුමා පැහැදිලි කලා. රටේ සමස්ත ඉඩම් ප්‍රමාණයෙන් සියයට අසූ දෙකක් පමණ රජය සතු වූවත්, අපි දන්න විදිහට ඉඩම් පවරා ගැනීමේ ක්‍රියාවලිය අතිශය දුෂ්කරය එකක්. නීතිය වගේම කාලයක් ආයතනික රාමුත් මේ ක්‍රියාවලියට අභියෝගයක් වෙලා තියෙනවා. සැකයක් නෑ මේ වෙද්දී ලංකා කාර්මික සංවර්ධන මණ්ඩලය මේ අභියෝගයට මුහුණ දෙමින් සිටින්නේ.
කර්මාන්තකරුවන් සහ ව්‍යවසායකයන් ගොඩනැගීම සඳහාද ලංකා කාර්මික සංවර්ධන මණ්ඩලය මේ වනවිටත් සුවිශාල දායකත්වයක් ලබාදෙනවා. අපේ සංවාදය අතරතුර සභාපතිතුමා ඒ පිළිබඳවත් අවධානය යොමුකළා.
''කර්මාන්ත ව්‍යසායකයෙක් හැදෙන්න නම් කාරණා හයක් විතර සම්පූර්ණ වෙන්න ඕනෑ. පළවෙනි කාරණාව තාක්ෂණික පුහුණුව. දෙවැනි කාරණාව තමයි ව්‍යවසායකත්ව පුහුණුව. උදාහරණයක් කිව්වොත් සබන් හදන්න දැනගන්න අවශ්‍යයි. ඒ වගේම සබන් හදන විතරක් බෑ කර්මාන්ත, ව්‍යාපාරයක් විදියට ගොඩනගන්නත් ඕනා. ඒ නිසාම අපි රටපුරා කර්මාන්තකරුවන්ට ව්‍යවසායකත්ව සහ තාක්ෂණික පුහුණුව ලබාදෙන්න කටයුතු කරමින් සිටිනවා.''
සාරංග අලහප්පෙරුම මහතා සඳහන් කරන ආකාරයට ප්‍රධාන කාරණා ද්විත්වයට අමතරව බලපත්‍ර ලබාගැනීම, කර්මාන්ත ගොඩනැගීම සඳහා ඉඩම් ලබාගැනීම, මූල්‍ය පහසුකම් ලබාගැනීම ආදී කටයුතුවලටද ලංකා කාර්මික සංවර්ධන මණ්ඩලය සහයෝගය ලබාදෙනවා. මෙහිදී තවත් පියවරක් ඉදිරියට යමින් ගෝලීය සහ දේශීය වෙළෙඳපොළ සඳහා මෙම නව ව්‍යසායකයන් සම්බන්ධීකරණය කිරීමටත් දැන් ලංකා කාර්මික සංවර්ධන මණ්ඩලය කටයුතු කරනවා.
''පුහුණු කරන පිරිසෙන් ඔක්කොම ව්‍යවසායකයෙකයන් වෙන්නේ නෑ. සියයට දහයක් එක්කොළහක් තමයි ව්‍යවසායකයන් බවට පත්වන්නේ. ඒක ලෝකෙම පිළිගත්ත සම්මතයක්. කොහොම වුණත් මේ වෙද්දී ගොඩක් දෙනෙක් උනන්දු වෙනවා තමන්ගේ දෙයක් පටන් ගන්න. ඒක ගොඩක් හොඳ නැඹුරුවක්.''
කෙසේ නමුත් සභාපතිවරයා පෙන්වා දෙන්නේ සාපේක්ෂව ශ්‍රී ලංකාව තුළ ව්‍යවසායකත්වය තවමත් අඩු අගයක පවතින බව. එහෙත් වැටුම් ලබන රුකියාවකට සීමා නොවී තවත් කෙනෙකුට වැටුප් ලබාදිය හැකි ව්‍යවසායකයන් රට තුළ වැඩි වැඩියෙන් නිර්මාණය කිරීම සිය අභිප්‍රාය බව සාරංග අලහප්පෙරුම මහතා පවසනවා.
