ඩිජිටල් බිස්නස් පටන් ගනිමු
අලෙවිකරණයේ අලුත්ම නැම්ම
ලෝකය අලුත් වෙනකොට අලුත් අලුත් දේවල් අපි ඉදිරියට පැමිණෙනවා. ඒත් ඇතැම්විට ඒ දේවල් වැළඳගන්න අප එකවරම සූදානම් නැහැ. ඒකට හේතුව තමයි අලුත් දෑ පිළිබඳ අප තුළ පැහැදිලි අවබෝධයක් වගේම විශ්වාසයක් නොවීම. එනිසා එවන් අලුත් දෑ අප ඉදිරියට පැමිණෙන්නට පටන්ගත් පසුව ඒවා පිළිබඳ පැහැදිලි සංවාදයක් ඔබ අප හැම දෙනා විසින් ගොඩනැගිය යුතුයි.
එනිසාම අලෙවිකරණය පිළිබඳ සමස්තයක් විදියට ව්‍යාපාර කරන හැමෝටම වැදගත් වෙන සුවිශේෂී සාකච්ඡාවකට ඉඩකඩ වෙන් කරන්න අපි මේ සතියේ තීරණය කළා.
ඔබ දැනටමත් හොඳින්ම දන්නවා, අලෙවිකරණයේ නව ප්‍රවණතා පිළිබඳව කතා කිරීමේදී අන්තර්ජාලය හරහා සිදු කරනු ලබන අලෙවිකරණ ක්‍රියාවලිය තමා මේ වන විට වඩාත්ම ජනප්‍රිය. පසුගිය කොවිඩ් වසංගතයෙන් පස්සේ මාර්ගගත ඩිජිටල් අලෙවිකරණයේ ඉහළ වර්ධනයක් දකින්න ලැබෙනවා. එනිසාම ව්‍යාපාරික ලෝකයට ප්‍රවේශ වී සිටින සහ ප්‍රවේශ වෙන්නට බලා සිටින අය තුළ මේ හා සම්බන්ධයෙන් අවබෝධයක් තිබිය යුතුමයි.
ඩිජිටල් අලෙවිකරණයට මේ සඳහා දීර්ඝ කාලීන ඉතිහාසයක් නැහැ. ඉතාම කෙටි කාලයක් ඇතුළත නිර්මාණය වෙලා ඉක්මනින් වර්ධනය වූ ක්ෂේත්‍රයක් ලෙස මෙම ක්ෂේත්‍රය හඳුන්වා දෙන්න පුළුවන්.
ඇතැම්විට ව්‍යාපාරිකයෙක් නම් ඔබත් මේ වනවිට ඔබේ භාණ්ඩ හා සේවා වෙනුවෙන් අන්තර්ජාලය හරහා ඔන්ලයින් ක්‍රමයට අලෙවි කරනවා වෙන්න පුළුවන්. එහෙම නැත්නම් ඔබට එවන් ව්‍යාපාරයක් කරන්න බලාපොරොත්තුවක් හෝ ඇති. ඇත්තටම අපි හැමෝටම පිළිගන්න වෙනවා වේගයෙන් යාවත්කාලීන වන වර්තමාන ලෝකයට උචිතම අලෙවිකරණ ක්‍රමවේදය තමයි එය.
එහෙත් මෙම ක්‍රමවේදයෙත් අනෙක් සියලු ක්‍රමවේදවල වගේම වාසි සහ අවාසි තියෙනවා. පළමුවෙන්ම ඔබ එම වාසි අවාසි ඔබේ ව්‍යාපාරයත් සමඟ ගලපා සංසන්දනය කර ගැනීම වැදගත්.
මාර්ගගත අලෙවිකරණය කියලා කියන්නේ ව්‍යාපාරික වෙබ් අඩවියක හෝ සමාජ මාධ්‍ය ඔස්සේ හෝ සරලවම කීවොත් අන්තර්ජාලය උපයෝගී කරගනිමින් සිදු කරනු ලබන භාණ්ඩ හා සේවා ආශ්‍රිත අලෙවිකරණ ක්‍රියාවලියක්. මෙහිදී සිදුවන්නේ ඔබේ නිෂ්පාදන හා සේවා එහි ප්‍රවර්ධනය කරමින් වෙළෙඳ නාමය පරිශීලිකයන්ට සමීප කිරීම.
වෙබ් අඩවි, බ්ලොග්, සමාජ මාධ්‍ය ජාලා මේ සඳහා යොදා ගන්න පුළුවන්. මේ වන විට ඒ අතරිනුත් සමාජ මාධ්‍ය ජාලා සහ අලෙවිකරණය සඳහාම නිර්මාණය වූ ඇප් ප්‍රමුඛස්ථානයට පත්වෙලා තියෙනවා. ෆේස්බුක්, ඉන්ස්ටග්‍රෑම්, වට්ස්ඇප් හා යූටියුබ් සෑම සමාජ ජාලයක් තුළම මාර්ගගත අලෙවිකරණය සඳහා අවශ්‍ය පහසුකම් දැන් නිර්මාණය වෙමින් පවතිනවා.
උදාහරණයක් විදිහට ගත්තොත් අපි හැමෝම දන්න ෆේස්බුක් සමාජ මාධ්‍ය අලෙවිකරණය සඳහාම විශේෂ 'මාර්කට් ප්ලේස්' නම් වෙනම අවකාශයක් නිර්මාණය කර තිබෙනවා ඔබ දැක ඇති. ශ්‍රී ලංකාව වැනි රටවල්වල මෙයින් ඵල ප්‍රයෝජන ලබාගන්නේ ඉතාමත් අඩු පිරිසක්. ඒ වගේම අලෙවිකරණයට සමගාමීව ප්‍රවර්ධන කටයුතු සඳහාත් සමාජ මාධ්‍ය තුළ මේ වනවිට ලොකු ඉඩකඩක් වෙන්වෙලා තියෙනවා. ඒ සඳහා විශේෂ පහසුකම් ක්‍රමෝපාය ඔබට භාවිත කරන්න පුළුවන්.
ඇප් හෙවත් ජංගම දුරකථන යෙදවුම් රැසක් තියෙනවා අලෙවිකරණය සඳහාම වෙන්වුණු. ඩරාස්, ඇමර්සොන්, අලි එක්ස්ෆ්‍රස්, ඊ-බේ වගේ වේදිකා දැනටමත් බොහොම ජනප්‍රියයි. සමහරක් ව්‍යාපාරිකයන් මෙම අතථ්‍ය (Virtual) වෙළෙඳපොළවල් වෙත ප්‍රවේශ වෙන්න තාමත් දක්වන්නේ බියක්. ඔවුන්ගේ පැකිලීමට තියෙන සාධාරණ හේතුව තමා අනවබෝධය.
කඩිනමින්ම අප මේ අනවබෝධය දුරු කරගත යුතුයි. එයින් ව්‍යාපාරික ලෝකයේ ඊළඟ අදියරට ගමන් කිරීමේ අවස්ථාව අපට මගහැරෙනවා. අපනයනය සම්බන්ධ අවධානය යොමු කරන ගොඩක් දෙනෙක් අමතක කරන දෙයක්, මේ වගේ වේදිකා ඇතුළේ ව්‍යාපාර පවත්වාගෙන යමින් ඒ වෙත ප්‍රවේශ වීමේ හැකියාව. ආසියාතික රටවල් ගොඩක් මෙම හැකියාව භාවිත කරමින් සුළු පරිමාණ අපනයන ප්‍රවර්ධනය කරන බව මේ වන විටත් ඉතාම පැහැදිලියි. විවිධ සීමා සහ නොදැනුවත්භාවය නිසා අපේ රටේ ගොඩක් දෙනෙක් මේ සඳහා නැඹුරු වන්නේ නැහැ.
අනෙක් දේ ඕනෑම ව්‍යාපාරයකට වැදගත් වන්නේ ගනුදෙනුකරුවන්. ඒ අතරිනුත් ඉලක්කගත ගනුදෙනුකරුවන් සොයා ගැනීමේ හැකියාව සමාජ මාධ්‍ය වේදිකා තුළ ඉහළ අගයකින් පවතිනවා. භාවිතයට පැමිණ ඇති කෘත්‍රිම බුද්ධිය වගේ මෙවලම් හරහා ඔබේ ව්‍යාපාරයට ලබාගත හැකි ජවය අති විශාලයි. ඇත්තම ව්‍යාපාරිකයෙක් විදිහට ඔබ තාක්ෂණයට සහ අලුත් වන ලෝකයට බිය විය යුතු නැහැ. පළමුවෙන්ම මෙවන් ක්ෂේත්‍ර සඳහා ප්‍රවේශය ලබාගන්නා පිරිස් නිසැක ජයග්‍රාහකයන් බවට පත්වෙනවා.
කොහොම නමුත් සෑම අලෙවිකරණ ක්‍රමවේදයක වගේම මේ ක්‍රමවේදයේත් වාසි අවාසි හඳුනා ගන්න පුළුවන්. කාලය සහ පිරිවැය අවම වීම තමා මෙහි ප්‍රධානතම වාසිය. මාර්ගගත ඩිජිටල් අලෙවිකරණය සඳහා විශාල ගොඩනැගිලි හෝ විශාල සේවක පිරිසක් ඔබට අවශ්‍ය වෙන්නෙ නැහැ. ඒ වගේම ස්ථිරවම ඔබට මේ තුළ වැඩි පිරිසක් ආමන්ත්‍රණය කිරීමේ හැකියාව උදා වෙනවා.
තවදුරටත් සඳහන් කරනවා නම් මේ හරහා කාර්යක්ෂම මෙන්ම විශ්වසනීය හා ආකර්ෂණීය ව්‍යාපාරයක් ගොඩනගන්න ඔබට තිබෙන අවස්ථාව බොහොම ඉහළයි. ගෝලීය ආර්ථිකය තුළ එන අභියෝග සහ නව ප්‍රවණතා හමුවේ ඉදිරියටත් මෙම නව ඩිජිටල් අලෙවිකරණයට හුරුවීම් හරහා ලොකු අවස්ථාවක් සැලසෙනවා. ඒ විතරක් නෙවෙයි, පාරිභෝගිකයන් සමඟ සන්නිවේදනය සඳහා තිබෙන ඉඩකඩත් මෙහිදී බොහොම සුවිශේෂී එකක්. ඔබට හොඳ සන්නිවේදන ජාලයක් පවත්වාගෙන යන්න පුළුවන් ඔබේ පාරිභෝගික පිරිසත් සමඟ.
මාර්ගගත ඩිජිටල් අලෙවිකරණය පිළිබඳව මූලික දැනුම ලබාගැනීමට අවශ්‍ය පහසුකම් දැන් මාර්ගගත ක්‍රමයටම ලබාගන්න ඕනෑ තරම් අවස්ථා තියෙනවා. ඔබ ව්‍යාපාරිකයෙක් නම් නොවරදවාම ඒ දැනුම එකතු කරගන්න උත්සාහ කරන්න. අනාගතය රැඳී තිබෙන්නේ ඔබ එකතු කරගන්න ඒ දැනුම මත බව අමතක කරන්න එපා.
මේ වන විටත් අප රටක් විදිහට බොහොම පිටුපසින් සිටින බව වර්තමාන මාර්ගගත ගෝලීය අලෙවිකරණය පිළිබඳ සමීපව නිරීක්ෂණ කිරීමේදී අපට පැහැදිලි වෙනවා. හැමදාම කතා කරන මාතෘකාවලින් එහාට ගිහිල්ලා අද වෙනස් විදියට ඔබ මේ පිළිබඳව දැනුවත් කරන්න හිතුවේ අන්න ඒ නිසා. ඉතින් තවත් ප්‍රමාද වෙන්න එපා. සොබාදහම විසින් වෙනසට අනුගත නොවන සතුන් වඳ වී යාම සඳහා ඉඩකඩ සලසනවා. ඒක තමා යථාර්ථය.
