දක්ෂයන්ගෙනුත් දක්ෂයන් බිහි කරන චාමර යෝගය
කේන්ද්‍රයක ග්‍රහයන්ගේ පිහිටීම අනුව පුද්ගලයාට එක් එක් යෝග ලැබීමට පුළුවන. ඇතැම් යෝග නිසා තමන් ලැබූ සැප සම්පත් පවා අහිමිවී දුක්බර ජීවිත ගතකිරීමට ලැබෙන අතර සමහර යෝගවලින් විශාල වශයෙන් යහපත් ප්‍රතිඵල ලැබේ. එවැනි සුබ යෝගයක් වන්නේ චාමර යෝගයයි. චාමර යන වචනයේ අර්ථය ද සිසිලස හිමිවීමයි.
වසර හැත්තෑවකට ආසන්න වශයෙන් ජීවත් වීමට වරම් ලැබූ අය මේ යෝගයෙන් උත්පත්තිය ලබති. මොවුහු බමුණන් මෙන් වේද ශාස්තෘන්ගේ දස්කම් විස්කම් දක්වති. පාලන තන්ත්‍රය දෙස බලද්දී මේ යෝගයෙන් ජන්ම දායාදය ලැබූවෝ පරිපාලනයෙහි දක්ෂයන් වී ඇති අයුරු පෙනේ.
මේ යෝගය ලැබූවෝ පැහැදිලි කථා විලාසයකින් යුක්ත අය වෙති. මොවුන් පාලකයන්ගේ ගරු බුහුමනට ලක් වේ. සුබවාදී ලෙසින් රජුන්ගේ ගෞරවාදරයට පත්වනවා පමණක් නොව විවිධ තානාන්තර ද ලබති. අධ්‍යාපනයෙන් ඉදිරියට ගොස් ඉතාමත් පැහැදිලි නිපුනත්වයක් ලැබූවෝ වෙති.
කිසියම් ජන්මියකු ජන්ම දායාදය ලැබීමේදී කේන්ද්‍රස්ථානයක ලග්නාධිපතියා එසේත් නැතිනම් උප්පත්තිය ලග්නය හිමි ග්‍රහයා ස්ථානගත වී ඇත්ද එසේත් නැතිනම් ලග්නයට උච්ච ග්‍රහයා ඒ අවස්ථාවේදී උච්චවත් ක්ෂේත්‍ර වූ හෝ ස්වක්ෂේත්‍ර වූ ගුරු හෙවත් සුරුගුරුගේ ක්ෂේත්‍රයට හසුවේද එතැනදී යෙදෙන්නේ චාමර යෝගයයි. එපමණක් නොව ලග්නයේ 4, 7, 10 යන කුමන ස්ථානයට හෝ සුබවාදී ග්‍රහයන් දෙදෙනක් ස්ථානගත වී ඇත්ද එවිට යෙදෙන්නේ ද චාමර යෝගයයි.
මේ අනුව විමසීමේදී චාමර යෝගය දෙයාකාරයට යෙදෙන බව පැහැදිලි වේ. එසේම මෙකී සුබ ග්‍රහයන් දෙදෙනාම අසුබ ග්‍රහයන් නොදැකිය යුතුය. කිසිම දැක්මක් නැතිවම අසුබ ග්‍රහ සංයෝගවලින් තොර විය යුතුය. එමෙන්ම එකී සුබ ග්‍රහයන් උච්චක්ෂේත්‍රව හෝ ස්වක්ෂේත්‍රව සිටියේ නම් මෙම යෝගයෙන් ලබන සුබ ඵල වඩා වැඩිවේ.
යම් කිසි ජන්මියකු උප්පත්තිය ලැබුවේ මීන ලග්නයෙන් ද එම ලග්නයට උච්චක්ෂේත්‍ර ග්‍රහයා සිකුරුය. සිකුරු ග්‍රහයා ලග්නයේ ස්ථානගතව සිටියදී මීන ලග්නයෙන් පස්වැන්න වන කටක රාශියට උච්චක්ෂේත්‍ර වූ ගුරු පස්වැන්නේ ස්ථානගතව සිටිමින් චාමර යෝගය යෙදෙන බව දත යුතුය.
ජ්‍යෙතිෂයේ දැක්වෙන පරිදි කිවි සහ ගුරු සතුරන් ලෙසින් හැඳින්විය හැකිය. මෙහිදී සතුරැ බලය වෙනත් අංශයකට ගෙනයා හැකිය. ගුරු ග්‍රහයා සිකුරැගේ සතුරැ බලය අභිබවා ඉදිරියට යමින් මෙම චාමර යෝගයේ ඇති සුබඵල නිසි අයුරින් උදා කර දේ.
ඒ වගේම තවත් කෙනකුගේ උත්පත්තිය කටක ලග්යෙන් සිදු වී තිබෙන්නට බැරි නැත. එතැනදී ගුරු ලග්නයේ උච්චව සිටීමත් සඳු ස්වක්ෂේත්‍රව එම ස්ථානයේම වැජඹීමත් හේතුවෙන් ද චාමර යෝගය උදා වන්නේය. මෙහිදී සලකා බැලිය යුත්තේ පාප ග්‍රහයන්ගේ අසුබ දැකීම් නොලබා සිටියහොත් බොහෝ විට චාමර යෝගයේ සත්‍යම සුබ ඵලයන් ගෙන දීමද සිදු වන බවය.
මෙම යෝගය තවත් කිහිප විධියකටම යෙදීමට බැරිකමක් ද නැතුවා නොවේ. කෙසේ වෙතත් චාමර දක්ෂ නිපුණ අයට තෝතැන්නකි. වාසනාවන්ත පිහිටීමකි. ජය ලබන මං පෙතකි. ප්‍රසිද්ධියේ උල්පතකි. නිරෝගීව ජීවත් වීමට අත්වැලකි. ශිල්ප ශාස්ත්‍රය හැදෑරීමට මෙවන් යෝගයක් ලැබීම කියලවත් කර ගන්නට බැරි ග්‍රහ පිහිටීමකි. දක්ෂයන්ගෙනුත් දක්ෂයන් බිහි කරන මෙම යෝගය මනාව ඔබටත් තිබේදැයි විමසා බලා ඔබත් ඒ අනුව ඉදිරියට යන්න.
ජාත්‍යන්තර ජ්‍යොතිෂ විද්‍යා
විශාරද, දේශාමාන්‍ය, දේශ බන්ධු,
මහාචාර්ය සිංහ හේමපාල පතිරණ.
