ලොක්කන්ගේ හොරවැඩ හෙළිවෙයි
2018 ජුනි 25 වන සඳු දින සවස 6.12ට බුධ ග්‍රහයා තමාට සතුරු රාශි භවන වූ කටක රාශියට පිවිසේ. ජුලි මස 26 වන ගුරු දින බුධට අයත් අස්ලිස නැකතේ හතර වන පාදයේ දී වක්‍රවෙමින් ද අගෝස්තු 19 වන දින වක්‍රයෙන් මිදී සුපුරුදු ගමනින් ද ගමන් කරන බුධ 2018 සැප්තැම්බර් මස 2 වන ඉරු දින රාත්‍රී 9 පසුවි විනාඩි 3 දක්වා සතුරු රාශියෙහි ගමන් කරනු ඇත. දින 60කට වැඩි දීර්ඝ කාලයක් බුධ ග්‍රහයා සතුරු රාශිගතවේ.
මේ තත්ත්වය අප රට කෙරෙහි අවධානය යොමු කිරීමේදී මහජනයාගෙන් යම් යම් ප්‍රධානින්ට ප්‍රසිද්ධියේම විරෝධය එල්ල කිරීමට ඉඩ ඇති බව පැවසීය හැක. ව්‍යාජ ලියවිලි, රහස් වැඩ ප්‍රබල පුද්ගලයන්ගේ හොර වැඩ හෙළිදරව් වන වකවානුවකි. අධ්‍යාපනික ආයතන, මාධ්‍ය ආයතන, ලේඛනාගාර, පුස්කොල, බැංකු ආශ්‍රිතව අපරාධ ක්‍රියා ද මූල්‍ය සොරකම් ද වාර්තා වනු ඇත. කුඩා දරුවන්ට පීඩා වැඩි වකවානුවක් වන අතර විවිධ වූ අපරාධ ක්‍රියා සහ හදිසි අනතුරුවලින් කුඩා දරුවන් මරණයට පත්වනු ඇත. මහජනයාගේ ශරීර සෞඛ්‍යයට බාධා කරමින් හඳුනානොගත් නව රෝගයක් ප්‍රචලිත වේ. කුඩා දරුවන්ගේ ආරක්ෂාව සම්බන්ධයෙන් වැඩිහිටියන් අවධානය යොමුකළ යුතු අතර දරුවකු අතුරැදන් වීමක් නිසා යම්කිසි ආකාරයක කැළඹීමක් රට තුළ ඇති වනු ඇත. යම් අපරාධ කටයුත්තක් හෝ වංචාවක් සම්බන්ධ වැදගත් ලිපිලේඛන අතුරුදන් වීමක් හෝ ගිනි ගැනීමකට ලක්වීමක් ද ආරංචි වේ.
ප්‍රවීණ මාධ්‍යවේදියකුට ලේඛන කටයුතුවල නිරත අයකුට මාරකයක් ගෙන දෙනු ඇත. විදේශීය වශයෙන් අප්‍රිකානු රටවල්, මුර්සි දූපත්, ටියුනිසියාව, පින්ලන්තය, ස්කොට්ලන්තය ආශ්‍රිතව භූමියට අයහපත් වූ බලපෑම් ඇති වීමෙන් ගොවිතැන්වලටත් දේපලවලටත් හානි සිදුවේ. පතල් ආශ්‍රිත අනතුරු ද භූ චලන ද වාර්තා වෙයි. ඉන්දියාව, පකිස්ථානය, බොස්නියාව, ග්‍රීසිය, මැක්සිකෝව ආශ්‍රිතව ප්‍රධාන රාජ්‍ය ආයතනයකට විරුද්ධව මහජන විරෝධතා එල්ල වේ. රාජ්‍ය නායකයින් වෙනත් රටවල් සමඟ ගිවිසුම් ඇති කරගැනීමක් ද සිදුවේ. අරාබියාව, රුසියාව, පෝලන්තය, ස්විඩන්, ලිතුවේනියාව ආශ්‍රිතව වෙළෙඳ අධ්‍යාපන කටයුතු පිළිබඳව නව නීති ඇතිවන අතර පාර්ලිමේන්තුවේ විවාද ගැටුම් ඇතිවන වකවානුවකි. බුරුමය, චීනය, කැස්පියන්, ආර්ජන්ටිනාව, ඊජිප්තුව, ඕස්ට්‍රියාව ආදි රටවල ජාත්‍යන්තර වෙළෙඳාම පිළිබඳ ගැටලු ඇතිවනු ඇත.
මේෂ - නව දේපල
ඔබගේ කටයුතුවලට අයහපත් වූ බලපෑමක් මේ සතියේ ඇති නොවේ. නිවසේ අලුත්වැඩියාවක් කිරීමට හෝ නව දේපලක් මිලදී ගැනීමට සුදුසු වකවානුවකි. මිතුරන්ගෙන් ඔබට සහය ලැබෙනු ඇත.
වෘෂභ - අවිවේකි සමයක්
සිතේ සහනය තරමක් අඩුවන අතර ලේඛන කටයුතුවල නිරත වී සිටින අයට යහපත් ඵල අත්වනු ඇත. ඔබගේ යම් යම් කටයුතුවලට විවිධ පාර්ශවවලින් බාධා ගෙනදේ. අවිවේකි කාලසීමාවක් වෙයි.
මිථුන - වචනයේ බලය
පවුල් දිවියේ සමගිය වර්ධනය වන මුත් පවුලේ කටයුතු වෙනුවෙන් වියදම් අධික වනු ඇත. ඔබගේ විවිධ කටයුතු වචනයේ බලයෙන් ඉෂ්ඨ කරගත හැකි කාලසීමාවක් වේ.
කටක - මුදල් පාඩු
ශරීර සනීපයට බාධා ගෙනදේ. නීතිමය ප්‍රශ්නයකට මැදිවිය හැකි බැවින් කල්පනාකාරීව කටයුතු කළ යුතුවේ. මුදල් ගනුදෙනුවලදී ද විශාල පාඩු අත්වීමට ඇති බැවින් පරිස්සම් වන්න.
සිංහ - තැන්පත් ධනය වැය
ඔබට එතරම් යහපත් ඵල අත්නොවනු ඇත. ඔබගේ සියලු කටයුතුවලට විවිධ පාර්ශවවලින් බාධා හා විරුද්ධකම් ඇති කරයි. තම තැන්පත් ධනය වියදම් වන අතර වෛරස් රෝගාබාධයක් වැළඳිය හැකි බැවින් ප්‍රවේසම් වන්න.
කන්‍යා - මිතුරු උදව්
විනෝදයට බරව කටයුතු කරන වකවානුවකි. හිත මිතුරන්ගෙන් උදව් උපකාර අත්වනු ඇත. සමාජ සේවා කටයුතුවල නිරත වීමේදී යම් යම් ගැටලුවලට මුහුණ දීමට සිදුවනු ඇත.
තුලා - භූමියට හොඳයි
භූමිය ආශ්‍රිතව කටයුතු කරන අයට ශුභ ඵල ගෙන දෙනු ඇත. අලුත් දේවල් තම මතකයට එක්කර ගැනීමට හැකිවේ. සේවාස්ථානය ආශ්‍රිතව පැවති ප්‍රශ්න මඟහැරී යයි.
වෘෂ්චික - ලේඛනයට හොඳයි
උසස් අධ්‍යාපනයේ යෙදි සිටින අයට අයහපත් බලපෑම් එල්ල වෙන නමුත් ලේඛන කටයුතුවල නිරත වී සිටින අයට යහපත් ඵල අත්වේ.
ධනු - සිතේ අසහනය
ඔබට එතරම් යහපත් ඵල අත්නොවනු ඇත. සිතේ සහනය අඩු වන වකවානුවකි. ඔබගේ කටයුතුවලට විවිධ පාර්ශවවලින් බාධා ඇතිවේ. හිතමිතුරන්ගෙන් ද ප්‍රශ්න ඇතිවනු ඇත.
මකර - වියදම වැඩියි
විශාල අන්දමට මුදල් වියදම් කිරීමෙන් නොසිතූ ලෙස පාඩුවක් අත්වීමට ඉඩ ඇත. ඒ නිසා කල්පනාවෙන් වියදම් කරන්න. තමන්ගේ කටයුතුවලට විවිධ බාධා ඇති වන නිසා ඒවා ඉටුකිරීමට නොහැකි වනු ඇත.
කුම්භ - වෛරස් රෝග
සතුන්ගෙන් ඔබට හිරිහැර සිදුවන වකවානුවකි. ශරීර ශක්තියට බාධා ඇතිවෙමින් වෛරස් රෝග අවදානමක් ඇතිවනු ඇත. බුද්ධියෙන් තොරව කටයුතු කරන වකවානුවකි.
මීන - හිතේ සතුට
විරුද්ධ ලිංගික බැඳීම් වර්ධනය වනු ඇත. සිතේ සතුට ඇති වනු ඇත. අලුත් දේ මතක ශක්තියට අතුළු කරගැනීමාට හැකියාව ලැබේ. හිත මිතුරන්ගෙන් උදව් උපකාර අත්වනු ඇත.
ජ්‍යොතිෂ නන්දන
ප්‍රවීණ ජ්‍යොතිෂවේදි ජ්‍යොතිෂාචාර්ය
රේණුක වික්‍රමසිංහ
සුවණැන ජ්‍යොතිෂ පර්යේෂණායතනය
ඔලබොඩුව, ගෝනපල