රස වගේම හරිම ගුණ දොඩම්
පැඟිරි කුලයට අයත්වන දොඩම් විටමින් සී බහුල පළතුරකි. වර්තමානයේදී කරන ලද සමීක්ෂණයකට අනුව බෝනොවන රෝග සඳහාත්, නිරෝගී පුද්ගලයන්ගේ නිරෝගිකම ආරක්ෂා කිරීම සඳහා විටමින් සී වලින් බොහෝ පිහිටක් ලබාදේ. විවිධ රටවල්වල දොඩම් කහ, කොළ, තැඹිලි ආදි වර්ගවලින් දැකියහැකි වුවද ඒවායෙන් ඇතිවන ගුණය යම්තරමට වෙනස් වුවද බොහෝවිට එකසමාන පෝෂණයක් එයින් ලබාදේ.
කාන්තාවක් සඳහා ඇතිවිය හැකි හෘදයාබාධ ඇතිවිය හැකි ප්‍රවණතාවය අඩුකළ හැකි බව කරනු ලබන පර්යේෂණවලින් සොයාගෙන ඇත. එමෙන්ම දොඩම්වල බොහෝ ලොව ඇති ස්වභාවික ආහාර ද්‍රව්‍යවලට සාපේක්ෂව බොහෝ ප්‍රතිඔක්සිකාරක වර්ග ප්‍රමාණයක් අන්තර්ගත වේ. ඇතිවිය හැකි පිළිකා වැළැක්වීම හා ඇතිවුණු පිළිකා සුව කිරීමේ ගුණයක් ද දොඩම්වල ප්‍රතිඔක්සිකාරක සතුව පවතී. පෙනහළු, පියයුරු, ආමාශ, මහබඩවැල ආශ්‍රිතව පටන්ගන්නා බොහෝ පිළිකා තත්ත්වයක් සඳහා දොඩම් ඉතා ගුණදායක පළතුරකි. එමෙන්ම අක්මා පිළිකා සඳහා ඉතා ගුණදායක පළතුරක් මෙන්ම ඖෂධයක් ලෙසද ජපානයේ කරන ලද සමීක්ෂණයකදී සොයාගෙන ඇත. මෙහි ජලයේ දියවන සැලකිය යුතු කෙඳි ප්‍රමාණයක් ද අන්තර්ගත වේ. එයින් ශරීරයට අහිතකර කොලෙස්ටරෝල් එක්රුස්වීම නවතාලයි.
දොඩම්වල පොටෑසියම් සැලකිය යුතු ප්‍රමාණයක් ද අන්තර්ගත වේ. මෙමගින් හෘදය නිසිලෙස ක්‍රියාකිරීමටත් රැධිර පීඩනය නිසිලෙස පවත්වාගෙන යාමටත් උපකාරි වේ. එබැවින් හෘදයාබාධ, අධි රැධිර පීඩන රෝගින්ට ද දොඩම් ඉතා ගුණදායක පළතුරකි.
බොහෝ වෛරස් රෝග සමඟ සටන් කිරීමේ හැකියාවක් දොඩම්වල පවතී. දොඩම්වල ඇති පොලිපිනෝල් මේ සඳහා උපකාරී වේ. දොඩම්වල පවතින කෙදි තත්ත්වය නිසා ආහාර මාර්ගයේ එන්සයිම උත්තේජනයෙන් හොඳින් ආහාර දිරවීමටත්, මලබද්ධය, අර්ශස් වැනි රෝග තත්ත්වය අඩු කිරීම සඳහාත් උදව් වේ.
දොඩම් ආහාරයට ගැනීමෙන් ඇස් පෙනීම නිසි ලෙස පවත්වා ගැනීමටත්, සමේ වියපත් භාවය දුරුකොට සම පැහැපත් කිරීමටත් උදව් වේ. බොහෝ රූපලාවණ්‍යය ආලේප සඳහා ද දොඩම් යොදාගනු ලබන්නේ ඒවාවල ඇති මෙම ගුණය හේතුවෙනි. දොඩම්ලෙලි අඹරා මීපැණි කිරි මිශ්‍රකර ෆේස් පැක් එකක් ලෙස සාදා සම මත ආලේප කිරීමෙන් ඉතා සාර්ථක ප්‍රතිඵල ලබාගත හැක.
බොහෝ දෙනා දොඩම්වල අධික සීනි ප්‍රමාණයක් ඇති බව කියති. නමුත් දොඩම්වල සීනි අඩංගු වුවත් ඒවා සරල සීනි වර්ගයට අයත්ය. එහි ග්ලයිසිනික් ඉන්ඩෙක්ස් අගය හතළිහකි. මෙහි ග්ලයිසිනික් ඉන්ඩෙක්ස් අගය පනස්පහට අඩු බැවින් දොඩම් දියවැඩියා රෝගීන්ට ද ඉතා ගුණදායක වේ. අනවශ්‍ය ලෙසින් ශරීරයට සීනි උරාගැනීම වළකාලයි. වකුගඩුවල ගල් සෑදීම වළකාලයි. අහිතකර කොලෙස්ටරෝල් අඩුකර ආහාරවල ඇති මේද කොටස් අවශෝෂණය අඩු කරයි.
ආතරයිටීස් රෝගයට මෙන්ම වෙනත් සන්ධි රෝගවලදී ඉදිමුම අඩුකර වේදනාව දුරුකරලීමට ද උපකාරී වේ. කුඩා දරුවන්ට ඉතා ගුණදායක පළතුරකි. විටමින් සී මගින් ශරීරයේ සුදු රුධිරානු වැඩි කරයි. එමගින් ප්‍රතිශක්තිය වර්ධනය කරයි. අඩු කැලරි ප්‍රමාණයක් සහ වැඩි කෙදි ප්‍රමාණයක් ඇති නිසා තරබාරු අයටද ගුණදායක වේ. මෙහි කැල්සියම් ද අඩංගුය. මේ නිසා අස්ථි, දත්, නිය, කෙස්, සම නිරෝගීව පවත්වා ගැනීමට උපකාරි වේ.
දොඩම් ලෙලි හොඳින් වේලා එය හොඳින් කුඩුකර තේ සමඟ හෝ පානය කිරීමෙන් මුඛ දුර්ගන්ධය අඩු කරලීමට උපකාරී වේ. ලිංගික බෙලහීනතාවය දුරුකර ලිංගික ශක්තිය ඇතිකරයි. ආහාර දිරවීම පහසු කරයි.
විශේෂඥ ආයුර්වේද වෛද්‍ය
නිමාලි සොලොහොකාර
කුරැණෑගල ආයුර්වේද රෝහල