රටේ දරු උපත් ඉහළට

වක්‍රගමනකින් ගමන් කරමින් සිටින බ්‍රහස්පති රාහුට අයත් සා නැකතේ 4 වන පාදයෙදී 2018 ජූලි 10 වන දින රාත්‍රි 10.34ට ආපසු ගමන් කිරීම නවතා නැවත සුපුරුදු ලෙස තුලා රාශියෙන්ම ගමන් කිරීම අරඹයි. 2018-10-11 වන දින දක්වාම එලෙස බ්‍රහස්පති තමාට සතුරු රාශි භවනෙහි ගමන් කරනු ඇත.

අප රට කෙරෙහි අවධානය යොමු කිරීමේදී රට තුළ දරු උපත් වැඩිවන වකවානුවක් වනු ඇත. ආගමික කටයුතු පිළිබඳව ප්‍රශ්නද වාදවිවාද ඇතිවීම්ද සිද්ධස්ථාන ආගමික ස්ථාන ආශ්‍රිතව යම් යම් අශුභ සිදුවීම්ද වාර්තා වනු ඇත. චිත්‍රපටයකට හෝ යම් කලා නිර්මාණයක් සම්බන්ධයෙන් ප්‍රශ්නයක් පැනනගී. රටෙහි සාමයට බාධා ඇතිවෙමින් යම් අර්බුදකාරි තත්ත්වයන් ඇතිවනු ඇත.

විදේශීය වශයෙන් විමසා බැලීමේදී රුසියාව, ලිතුවේනියාව, ස්වීඩන්, පෝලන්තය ආශ්‍රිතව මහජනයාගේ සුබ සිද්ධිය උදෙසා නව නීති ක්‍රියාත්මක කරනු ඇත. චීනය, ඊජිප්තුව, ආජන්ටිනාව, බුරුමය, යන රටවල ජාත්‍යන්තර වෙළඳ කටයුතුවලට බාධාවන් ගෙනදේ. බැල්ජියම, ඊජිප්තුව, එංගලන්තය, අමේනියාව ආශ්‍රිතව සන්නිවේදන කේෂත්‍රයේ ප්‍රශ්න පුනරාගමනයක් ද වන අතර එංගලන්තය, ජර්මනිය, සිරියාව, පලස්තීනය, යන රටවල රජවල කටයුතුවලට එරෙහිව මහජන විරෝධතා පැනනගී. මේ රටවල මහජනයා අතර සාමය කඩාකප්පල්කාරි වීමේ සිද්ධි ඇතිවනු ඇත.

මේෂ - නීති ගැටලු ලිහේ

ඔබට යම්කිසි නීති ප්‍රශ්නයක් ඇති වී තිබුණේ නම් එයින් මිදීමට හැකිවන වකවානුවක් වේ. ව්‍යාපාරික කටයුතු පිළිබඳ පැවති ගැටලු මඟහැරි යනු ඇත. කීර්තිය අත්කර ගත හැකි වකවානුවකි.

වෘෂභ - මුදල් පාඩු 

ඔබගේ කටයුතුවලට පැවති බාධා මඟහැරි යනු ඇත. සතුන්ගෙන් ශරීරයට පීඩාවක් ඇති විය හැකි බැවින් පරිස්සම්වන්න. ආර්ථික දුෂ්කරතා මෙන්ම මුදල් පාඩුවීම්ද ඇතිවනු ඇත.

මිථුන - සිතේ සතුට

සිතේ සතුට ගෙන එනු ලබන වකවානුවක් වන අතර අධ්‍යාපන කටයුතුවල නිරත වී සිටින අයට යහපත් වනු ඇත. ශරීර ශක්තියට බාධාවන් තිබුණේනම් එම බාධාවන් ඉවත්ව යනු ඇත.

කටක - නිවසේ අලුත්වැඩියා 

ඔබට ද යහපත් වකවානුවක් බවට පත්වනු ඇත. සිතේ සහනය ගෙනදේ. විශාල වශයෙන් මුදල් යොදවා කටයුතු කිරීමේදී පරිස්සම් විය යුතුවේ. තම නිවසේ අලුත්වැඩියාවන් කිරීමට යහපත් කාලයකි.

සිංහ - හවුලට හොඳයි

හවුල් කටයුතුවලින් ඵල අත්වනු ඇත. හදිසි කේන්ති ගති වර්ධනය වේ. සහෝදර සහෝදරියන් සමඟ සමගිය ඇතිවේ. අත්වල පීඩාවක් ඇතිවනු ඇත.

කන්‍යා - පවුල් ප්‍රශ්න ලිහේ

පවුල් දිවියේ පැවති ප්‍රශ්න තරමක් හෝ අඩුවී යනු ඇත. මුදල් අත්‍යවශ්‍ය හේතුමත වියදම් වී යාම නිසා අත ඉරිතිය අඩුවී යනු ඇත. ඔබගේ යම් යම් කටයුතුවල ප්‍රමාද ගති ඇතිවනු ඇත.

තුලා - හිසේ පීඩා

විශාල අන්දමෙන් මුදල් යොදවා කටයුතු කිරීමේදී පරිස්සම් වීම වැදගත්වේ. අධ්‍යාපන කටයුතුවල නිරත වී සිටින අයට ශුභ ඵල අත්වනු ඇත. හිස ආශ්‍රිත පීඩාවක් ගෙනදේ.

වෘෂ්චික - ආර්ථික හානි

ඔබට අයහපත් ඵල අත්වන අතර ඔබගේ කටයුතු අඩපණ වීමක් වනු ඇත. විශේෂයෙන් විශාල ආර්ථික පාඩු ලබනු ඇත. සිතේ සහනය අඩු වන්නාවූත් වකවානුවක්වේ.

ධනු - හදිසි ධන ලාභ

ඔබගේ කීර්ති නාමය ප්‍රසිද්ධියට පත්වනු ඇත. හිතමිතුරන්ගෙන් උදව් උපකාර අත්වන අතර කටයුතු සාර්ථක වීමත් හදිසි ධනයක් ලැබීමටත් ඇත. අලුත් අලුත් දේ ඉගෙන ගැනීමට හැකියාව අත්වනු ඇත.

මකර - බලාපොරොත්තු ඉටුවේ

සේවා ස්ථානය ආශ්‍රිතව පැවති ප්‍රශ්න මගහැරි යනු ඇත. භූමිය ගැන කටයුතු කරන අයට ශුභඵල ලැබේ. තම බලාපොරොත්තු ඉෂ්ඨ වන වකවානුවකි.

කුම්භ - උත්සහයට පුතිඵල

ඔබට ද ශුභ ඵල ගෙනදෙන අතර විශේෂයෙන් උසස් අධ්‍යාපන කටයුතුවල නිරත වී සිටින අයට යහපත් ඵල අත්වනු ඇත. තම උත්සහය මත වැඩ කොටසක් සාර්ථකව කරගත හැකි කාලයක් වේ.

මීන - හිසේ පීඩා

ඔබට එතරම් ශුභ ඵල අත්නොවනු ඇත. සේවා ස්ථානයෙන් ස්ථාන මාරැවක් බලාපොරොත්තු වූයේ නම් තම බලාපොරොත්තුව ඉෂ්ඨ කරගත හැකිවනු ඇත. හිසේ පීඩාවක් මතුවනු ඇත.

ජ්‍යොතිෂ නන්දන
ප්‍රවීණ ජ්‍යොතිෂවේදි ජ්‍යොතිෂාචාර්ය
රේණුක වික්‍රමසිංහ
සුවණැන ජ්‍යොතිෂ පර්යේෂණායතනය
ඔලබොඩුව, ගෝනපල