මාස 05ට මිනීමැරුම් 214 ක්
ගෙවුණු සතිය ඇතුළුව මෑත කාලය තුළදී රටේ විවිධ ප්‍රදේශවල සිදුවූ පාතාල ගැටුම් හේතුවෙන් මිනිස් ජීවිතවලට සිදුවූ හානිය පසුගිය සතියේ පුවත් සිරස්තල මැවීය. බැලූ බැල්මට එම සිදුවීම්වල ප්‍රමාණාත්මක වර්ධනයක් පෙන්නුම් කර තිබිණි. වෙඩි තැබීම්, තියුණු ආයුධවලින් පහරදීම, කපා කොටා තුවාල සිදුකිරීම සහ ඝාතනය කිරීමේ සිදුවීම් ඉහළය. ගතවූ සති කීපය තුළදී කරන්දෙණිය ප්‍රාදේශීය සභා මන්ත්‍රී ඩොනල්ඩ් සම්පත්, දෙහිවල මහනගර සභාවේ නාගරික මන්ත්‍රී රන්ජන් ද සිල්වා සහ කොළඹ මහනගර සභාවේ නාගරික මන්ත්‍රී ක්‍රිෂ්ණන් පිල්ලේ ඇතුළු පළාත් පාලන ආයතන නියෝජිතයන් තිදෙනෙක් වෙඩි තබා මරණු ලැබූහ. කිරිවෙහෙර විහාරාධිපති හිමියන්ට සහ තවත් හිමි නමකට වෙඩි ප්‍රහාරයකින් බරපතළ තුවාල සිදු කළ අතර රත්මලාන ප්‍රදේශයේදී යුද හමුදා රියදුරකුට වෙඩි ප්‍රහාරයක් එල්ල කර තිබිණි.
මාතර ස්වර්ණාභරණ අලෙවිසලක් කොල්ලයකට පැමිණි අපරාධකරුවන් එල්ල කළ වෙඩි ප්‍රහාරයෙන් පොලිස් නිලධාරියෙක් ජීවිතක්ෂයට පත්වූ අතර තවත් නිලධාරියෙක් සමඟ සිවිල් පිරිමි පුද්ගලයෙක් හා කාන්තාවක් තුවාල ලැබූහ.
මෙවැනි වෙඩි තැබීම්, ඝාතනය කිරීම් එළිපිට මහමග සිදුවීමත්, එවැනි ක්‍රියා හදිසියේ හිස එසවීමත් බරපතළ සමාජ ගැටලුවකි. එක පිට එක පෙළට සිදු වූ ඝාතන සිද්ධීන් නිසා රටේ ආන්දෝලනයක් ද හටගෙන ඇති අතර මහජනතාවට බියෙන් සිටීමට ද සිදුව තිබේ. මහ මග සිදුවන පාතාලේ කොකා ගැස්සිලි හේතුවෙන් කම්පනය වන සමාජීය ගැටලු රටේ දේශපාලන කරළියට ද දැනෙමින් තිබෙන බව කුඩු කප්පිත්තන්ට මරණ දඬුවම ලබා දීමට රජය ගත් තීරණයෙන් පැහැදිලි වෙයි.
පාතාල ක්‍රියාකාරකම් හා සංවිධානාත්මක අපරාධවල හිස එසවීමක් මේ හරහා දක්නට ලැබෙන බව ජනතාවගේ මතය වී තිබේ. එවැනි පසුබිමක ඉකුත් දින කිහිපය තුළදීද වාර්තා වූ වෙඩි ප්‍රහාර හා ඝාතනය කිරීම් ගණනාවකි. එකකට එකක් නොදෙවැනි හා බරපතළ අපරාධ සිදුවීම් ප්‍රසිද්ධියේ එළිපිට සිදුවෙද්දී ඉන් සාමාන්‍ය ජනතාවගේ ජීවිත වැටෙන්නේද දැඩි අවදානමකටය.
ජූලි මාසයේ 3 වැනිදායින් ආරම්භ වූ දින 10 තුළදී වෙඩිතැබීම් හා තියුණු ආයුධවලින් සිදුකළ පහරදීම්වලින් පුද්ගලයන් 7 දෙනකු ඝාතනය වී තවත් පුද්ගලයන් තිදෙනෙක් තුවාල ලබා සිටියහ. එම ඝාතනවලින් 6ක් කොළඹ නගරය හා බස්නාහිර පළාත ආශ්‍රිතව වාර්තා වී තිබෙන අතර එක් ඝාතනයක් වාර්තා වූයේ අනුරාධපුරය ප්‍රදේශයෙනි.
මෙහි ආසන්නතම වෙඩිතැබීම සහ ඝාතන සිදුවීම වාර්තාවූයේ කොළඹ පිටකොටුව ආදිවාල් වීදියට හැරෙන හන්දිය අසලදී ඉකුත් 9 වැනිදා පෙරවරුවේය. ඒ කොළඹ නගර සභාවේ නාගරික මන්ත්‍රීවරයෙක් හා ව්‍යාපාරිකයෙක් වශයෙන් කටයුතු කළ ක්‍රිෂ්ණන් පිල්ලේ තිරුබානන්දන් වෙඩිතබා ඝාතනය කිරීමයි. පසුගිය පළාත් පාලන මැතිවරණයට ස්වාධීන පක්ෂයකින් තරග කොට නාගරික මන්ත්‍රීවරයෙක් වශයෙන් තේරී පත්ව සිටි ක්‍රිෂ්ණන් කලක පටන් පළතුරු අලෙවිසලක් පවත්වාගෙන ගිය අයෙකි. ඔහු සුපුරුදු ලෙසින් පසුගියදා පෙරවරුවේ වෙළෙඳසලට පැමිණ විවෘත කර සුවඳ දුම් අල්ලමින් සිටියදී යතුරුපැදියකින් පැමිණි පුද්ගලයෙක් හිස් වැසුම සහිතව වෙළෙඳසලට පැමිණ තිබුණේ පළතුරු මිලදී ගැනීමේ මුවාවෙනි. එසැණින් ක්‍රිෂ්ණන් වෙත පිස්තෝලයකින් වෙඩි තැබූ ඔහු පැමිණි යතුරු පැදියෙන්ම පලාගොස් තිබිණි. ඝාතකයා පිළිබඳ හෝඩුවාවක් නොවීය. බරපතළ තුවාල ලබා සිටි ක්‍රිෂ්ණන් කොළඹ ජාතික රෝහලට ඇතුළත් කර ප්‍රතිකාර ලබමින් සිටියදී මියගොස් තිබුණි.
නාඳුනන තුවක්කුකරු වෙළෙඳසලට පැමිණ යන ආකාරය ආසන්නයේ තිබූ සී.සී.ටී.වී. කැමරා කීපයක සටහන්ව තිබුණි. 39 හැවිරිදි වියේ පසුවූ ක්‍රිෂ්ණන් පළතුරු අලෙවිසලට අමතරව පොත් හා ලිපිද්‍රව්‍ය අලෙවිසලක්ද පවත්වාගෙන ගොස් ඇත. ඒ අතර ඔහු කේරළ ගංජා ජාවාරම සිදුකරමින් මුදල් උපයා ඇති බව පොලිස් ආරංචි මාර්ග හෙළිකරයි. එම ජාවාරම් සිදුකිරීමේ වරදට දෙවතාවක් සිරදඬුවම් විඳි ඔහු වැලිකඩ සහ වව්නියාව බන්ධනාගාරවල රඳවා සිටි අයෙකි.
මොහු මැතිවරණයට ඉදිරිපත් වූ සමයේදීම කුඩු ලාල් නැමැත්තාගේ පුත්‍රයාද ඡන්දයට ඉදිරිපත්ව සිට ඇත. එහෙත් ඔහුට ප්‍රධාන පක්ෂයක නාමයෝජනා නොලැබීම නිසා ඔහුද ඉදිරිපත්ව ඇත්තේ ස්වාධීන පක්ෂයකිනි. මේ දෙදෙනාම ඡන්දය දිනා නාගරික මන්ත්‍රීවරුන් වශයෙන් කටයුතු කර තිබේ. කලක පටන් ගංජා ජාවාරම සම්බන්ධයෙන් දෙපාර්ශ්වයක් අතර පැවති ආරවුලක් හේතුවෙන් ක්‍රිෂ්ණන්ගේ ඝාතනය මුදල් දී සිදුකළ කොන්ත්‍රාත්තුවකින් කර ඇතැයි අනාවරණය වී තිබේ.
එම සිදුවීමට පෙර දිනයේ එනම් 8 වැනිදා රාත්‍රී 8.15ට පමණ කොළඹ, වෙරළබඩ පොලිස් වසමේ කොටහේන ජම්පටාවීදිය සෙල්විගෙවත්ත ප්‍රදේශයේදී සිදුකළ වෙඩි තැබීමක් හේතුවෙන් පුද්ගලයන් හතර දෙනෙක් තුවාල ලබා රෝහල්ගත කර සිටියදී දෙදෙනෙක් මියගියහ. එලිසබට් පෙරේරා (50) කාන්තාව සහ සෙල්වයියා සෙල්වරාජ් (58) නමැති ඇයගේ සැමියා මෙහිදී මරණයට පත් වූහ.
එම ඝාතන ඊට දෙසතියකට පමණ ඉහතදී ජූනි 24 දින රාත්‍රී 9.15ට පමණ කොටහේන ජම්පටාවීදියේ 137 වත්ත ප්‍රදේශයේදී සිදුවූ මිනීමැරුමක් හා සම්බන්ධ යැයිද කියති. එහිදී යතුරුපැදියකින් පැමිණි නාඳුනන පුද්ගලයන් දෙදෙනකු විසින් ගනේෂ් නැමැත්තකුට සිදුකළ වෙඩි ප්‍රහාරයට පළිගැනීමක් වශයෙන් මේ ප්‍රහාරය සිදුකළ බව කියති. මේ සිදුවීමට වසර දෙකකට පමණ ඉහතදී ගනේෂ්ගේ බිරිය වූ කුඩු සෙල්වි නැමැත්තියට වෙඩි ප්‍රහාරයක් එල්ලකර තිබුණි. එම වෙඩි ප්‍රහාරයෙන් ඇය මියගොස් තිබූ අතර ඇයද කුඩු ජාවාරම්කාරියකි. එම ප්‍රහාරය බුම්බා නොහොත් කෙනඩි නැමැති පාතාල සාමාජිකයා විසින් එල්ල කර ඇති බවට පොලීසියට තොරතුරු ලැබී තිබිණි.
කලක පටන් හෙරොයින් ජාවාරම සම්බන්ධයෙන් දෙපාර්ශ්වයක් අතර පැවති ගැටලුවක් හේතුවෙන් ඉකුත් 8 වැනිදා එල්ල කළ වෙඩි ප්‍රහාරයකින් අඹු සැමි යුවළ ඝාතනය කර ඇතැයිද එම ප්‍රහාරය කුඩු සෙල්වි පාර්ශ්වයට එරෙහිව කෙනඩි පාර්ශ්වයේ පිරිසක් විසින් සිදුකර ඇතැයිද වාර්තා වී තිබේ. පසුගිය ජූනි 24 දින වෙඩි ප්‍රහාරය එල්ල වූ මොහොතේ ඉහත කී එල්සබට් පෙරේරා සහ සෙල්වයියා සෙල්වරාජ් යුවළ එම ස්ථානයේ සිට ඇති බවත් ගනේෂ්ට වෙඩි ප්‍රහාරය එල්ල කිරීමට ඔවුන් සම්බන්ධ බවට වූ සැකය නිසා ඔවුන් මරා දමා ඇති බවත් අනාවරණය වී ඇත.
කපා කොටා ඝාතනය කරන ලද මළසිරුරක් පසුගිය 9 වැනිදා අලුයම වත්තල හුණුපිටිය නාහේන පාලම අසල ත්‍රිරෝද රථයක් තුළ තිබියදී සොයාගෙන තිබුණේ ප්‍රදේශවාසීන්ගේ තොරතුරු මතය. මෙසේ ඝාතනය කර තිබුණේ හුණුපිටිය, නාහේනවත්ත මැතිව් නිවාස සංකීර්ණයේ පදිංචිව සිටි ත්‍රිරෝද රථ රැකියාවේ නිරතව සිටි ධනුෂ්ක තරංග ගුණරත්න නැමැත්තෙකි. ඔහු රාත්‍රියේ සිය නිවසේ නිදාගෙන සිටියදී පිටතින් පැමිණි පිරිසකගේ පහරදීමෙන් හා කපා කොටා දැමීමෙන් ඝාතනය කළ බව ප්‍රකාශ වුවද පොලිස් පරීක්ෂණවලින් අනාවරණය වී ඇත්තේ එම ඝාතනය ඔහුගේ බිරිය හා ඇගේ අනියම් පුරුෂයා එක්ව සිදුකර ඇති බවය.
අනුරාධපුර ප්‍රදේශයේ ව්‍යාපාරිකයකු ඝාතනය කරනු ලැබීමද පසුගිය දිනවල කතාබහට ලක්විය. පසුගිය 5 වැනිදා එසේ ඝාතනය වී තිබුණේ වන්නියකුලම්, රාහුල මාවතේ පදිංචි සුජීවන් ප්‍රසංග හෙට්ටිආරච්චි නැමැත්තෙකි. කාලයක් තිස්සේ පවුල් දෙකක් අතර වූ ආරවුලක් හේතුවෙන් ඝාතනය සිදුකර ඇත්තේ එම ප්‍රදේශයේම පදිංචි පුල්ලෙයාර් චමින්ද නැමැත්තකු බව සැක කෙරේ. මේ දෙදෙනාටම එරෙහිව පොලීසියේ පැමිණිලි කීපයක් හා නඩු කීපයක් තිබෙන බවට අනාවරණය වී ඇත.
මේ ආකාරයට විවිධ ගැටුම් හේතුවෙන් පුද්ගලයන් 214 දෙනෙක් 2018 වසරේ මුල් මාස පහ තුළදී ඝාතනයට ලක්ව සිටිතියි පොලිස් මාධ්‍ය ඒකකය වාර්තා කරයි. එම ඝාතන සිදුවීම්වලින් සිද්ධීන් 182ක් සාර්ථකව විසඳා අවසන්ව ඇති අතර සංවිධානාත්මක අපරාධකරුවන් සතුව තිබූ ගිනි අවි වලින් ටී.56 අවි 14ක් පිස්තෝල 11ක්, රිවෝල්වර 10ක් ගල්කටස් 16ක් සමග වෙනත් අවි 284ක් මේ වසරේ මුල් මාස පහ තුළදී අත්අඩංගුවට ගෙන තිබෙන බවද පොලීසිය වාර්තා කරයි.
මිනීමැරුම් සහ සංවිධානාත්මක අපරාධ අඩුවෙමින් පවතින බව පොලීසිය පැවසුව ද රටේ ජනතාවට දැනෙන්නේ එහි ප්‍රතිවිරුද්ධ පැත්තය. එනම් මිනීමැරුම්, අපරාධ, කුඩු ජාවාරම් හිස ඔසොවා රටට දැඩි පීඩනයක් ගෙන දෙන බවය. කුඩු ජාවාරමට මරණ දඬුවම යළි ක්‍රියාත්මක වනු දැකීම රටේ බොහෝ දෙනාගේ කැමැත්ත බවට විවාදයක් නැත.
♦ සමන්ත ප්‍රදීප් විල්තෙර
2015 සිට මේ වනවිට අපරාධ අඩුවෙලා
පොලිස් මාධ්‍ය ප්‍රකාශක පොලිස් අධිකාරි නීතිඥ රුවන් ගුණසේකර
පසුගිය දින කීපයේදී ළඟ ළඟම වෙඩිතැබීමේ සිදුවීම් කීපයක් වාර්තා වුණා. සෑම සිදුවීමක් පිළිබඳවම පොලීසිය පාර්ශ්වයෙන් කෙටි පණිවුඩ ඉඳලා සෑම මාධ්‍යයකින්ම ප්‍රචාරණයට අවශ්‍ය තොරතුරු සපයලා තියෙනවා. මේ නිසා එම සිදුවීම්වලට ප්‍රසිද්ධියක් ලැබුණා. ඒ හැර සිදුවීම්වල වර්ධනයක් නෑ.
සියලුම පොලිස් ස්ථාන ඇතුළු විශේෂ පොලිස් ඒකකවලට පොලිස්පතිතුමා නියෝග කර තිබෙනවා විෂ මත්ද්‍රව්‍ය සම්බන්ධයෙන් හා සංවිධානාත්මක අපරාධ හා මෙහෙයවන්නන් පිළිබඳව වැටලීම් හා විමර්ශන සිදුකිරීමට. මේ නිසා පසුගියදා අපරාධ පරීක්ෂණ දෙපාර්තමේන්තුව මගින් රුපියල් මිලියන 118ක් වටිනා හෙරොයින් තොගයක් අත්අඩංගුවට ගත්තා. අදාළ ඒකක බාර උසස් පොලිස් නිලධාරීන් සමඟ නිරන්තරව සාකච්ඡා පවත්වනවා. ප්‍රගතිය පරීක්ෂාවට ලක්කරනවා. මේ ක්‍රියාව වැටලීම් හා මෙහෙයුම් සාර්ථක වීමට හේතු වෙනවා. එමෙන්ම හදිසි වැටලීම් ප්‍රමාණය වැඩිකර තිබෙනවා. එහිදී සැකකරුවන්, සංවිධානාත්මක අපරාධකරුවන් ගැවසෙන ස්ථානවල තොරතුරු ලැබෙනවා. මේ සඳහා පොලීසිය යටතේ ඇති පොලිස් විශේෂ කාර්ය බළකාය, සංවිධානාත්මක අපරාධ කොට්ඨාස, පොලිස් මත්ද්‍රව්‍ය නාශක අංශය, කොළඹ අපරාධ කොට්ඨාසය, අපරාධ පරීක්ෂණ දෙපාර්තමේන්තුව සහ දිවයින පුරා පිහිටි සියලු පොලිස්ථාන එකමුතුවෙන් මෙහෙයුම් සිදුකරනවා.
මේ නිසා අපරාධ මර්දනය වීමක් හා සිදුවීම්වල පැහැදිලි අඩුවීමක් දකින්න තිබෙනවා. 2015 වර්ෂයේදී මිනීමැරුම් 476ක් 2016 දී 502ක් 2017දී 452ක් වශයෙන් මිනීමැරුම් වාර්තා වෙලා තියෙනවා. 2018 මැයි 31 වැනිදා විට මිනීමැරුම් 214ක් සිදුවී ඇතැයි වාර්තා වෙනවා. එම අපරාධවලින් සුළු ප්‍රමාණයක් හැර සියල්ලම විසඳලා අවසන්.
මේ අයුරින් 2015 වර්ෂයේ සිට මේ දක්වා ස්ත්‍රී දූෂණ හා කොල්ලකෑම් සිද්ධි ශීඝ්‍රයෙන් අඩුවෙලා තියෙනවා. 2017 වසරේදී ගිනි අවි 702ක් අත්අඩංගුවට ගෙන තිබෙන අතර මේ වසරේ මුල් මාස පහ තුළ ගිනි අවි 284ක් අත්අඩංගුවට ගෙන තිබෙනවා. මේ හැම තොරතුරක්ම මාධ්‍ය හරහා ප්‍රචාරය කිරීමට අවස්ථාව සලසා තිබෙන නිසා සහ ළඟ ළඟ සිදුවීම් වාර්තා වීමේදී අපරාධ සිදුවීම්වල වර්ධනයක් වෙලා කියලා ජනතාව හිතනවා. නමුත් පැහැදිලිවම කිවයුතුයි. 2015 සිට 2018 වෙද්දී අපරාධ, මිනීමැරුම් ස්ත්‍රී දූෂණ, කොල්ලකෑම් සියල්ලම අඩුවීමක් තිබෙන බව.