මයිකල් ආන්ජලෝ ක්ෂණික පිට්සා
රාජගිරිය අවට ජීවත් වන අයට පීට්සා කිව්වොත් මුලින්ම මතකයට එන තැන තමයි මයිකල් ආන්ජලෝ අවන්හල. මොකද 2008 අවුරුද්දේ ඉඳන් තියෙන මේ අවන්හල කොළඹ අවට පීට්සා අවන්හල් අතුරින් ගොඩක් සාර්ථක අවන්හලක්. මෙතැන සාර්ථකත්වයට ලොකුම හේතුව විදිහට සලකන්න පුළුවන් වෙන්නේ ඉතාමත් ඉක්මනින් පීට්සා සැපයීමට මොවුන්ට පවතින හැකියාවයි.
මෙතැන ප්‍රධානම ආහාරය පිට්සා වුණත් පැස්ටා, කේක් වර්ග, අතුරුපස, ජූස් වගේ ආහාර වර්ග රැසක්ම පිළිගැන්වෙනවා. මෙතැන තියෙන starter’s අතුරින් Grilled Chicken Salad කියන්නේ බොහොම හොඳ තේරීමක්. හොඳට ග්‍රිල් කරපු ලොකු චිකන් කෑලි සලාද එක්ක හොඳට මුසු කරලා රසවත් විදිහට ඉදිරිපත් කරලා තියෙනවා.
පිට්සාවලට ලාංකිකත්වය එකතු කරලා තිබීමත් මයිකල් ආන්ජලෝ අවන්හලේ විශේෂත්වයක්. අපි මුලින්ම තෝරගත්තෙත් ඒ වගේ පිට්සා එකක්. ඒ තමයි හොට් බටර් කට්ල්ෆිෂ් පිට්සා ඒක. ඒක thin crust පිට්සා එකක්. Seafood with Bacon and Spinach කියන්නේ ටූනා, ඉස්සන්, දැල්ලන් වගේම බේකන් පවා එකතු කරගත්තු තවත් රසවත් පිට්සා එකක්. ඊට අමතරව පිට්සා ඇතුළෙ හැංගිලා ඉන්න ලූණු, මොසරැල්ලා චීස් හින්දා හැබෑම ඉතාලි පිට්සා රසය මතුවෙනවා.
මෙතැනදී රස විඳින්න පුළුවන් හොඳ පැස්තා ඒකක් තමයි Ravioli Milanese කියන්නෙ. ඒක පෙස්ටෝ, තක්කාලි, බැසිල් හරි පදමට දාලා හදන බීෆ් අඩංගු පැස්තා ඒකක්. ඒකෙ තියෙන ලුණු ගතියත් ගම්මිරිස් සැරත් ඒකට එකතු වෙලා අමුතුම රසයක් විඳින්න පුළුවන්.
නියම පිට්සා සහ පැස්තා ආහාර වේලකින් පස්සේ අතුරුපසත් හොඳ විය යුතුමයි. ඉතින් අපි තෝරාගත්තේ Tiramisu සහ Lemon Meringue කියන අතුරුපස කේක් වර්ගයි.
♦ නටාෂා ප්‍රනාන්දු පුල්ලේ
- සේයාරූ - කණිෂ්ක ගනේවත්ත