වෙනස සොයා දෙඇස අයා
වෙනසක් පිළිබඳව රට තුළ සිදුවූ සිදුවන කතාබහ අඩු නැත. වෙනසක් වෙනුවෙන් අපමණ බලාපොරොත්තු සමාජය තුළ ගොඩනඟා බලයට පත්වන බොහෝ පාලකයින්ගේ කියුම් කෙරුම් එකිනෙක ගැලපෙන්නේ ද නැත. වෛද්‍ය ශාන්ත හෙට්ටිආරච්චි වෙනස සොයා දෙඇස අයා මැයෙන් සිය නවතම කෘතිය මෙරට පාඨකයා වෙත ඉදිරිපත් කරන්නේ මෙවැනි වකවානුවකය. ඍජුව සක්‍රිය දේශපාලනයක නිරත නොවූවද කතුවරයා රටේ වර්තමානයට අදාළව විවිධ කේෂත්‍රයන් පිළිබඳ විවෘත විමසුමක යෙදෙන්නේ දශක කිහිපයක දේශපාලන හා සමාජ සංසිද්ධීන් සමීපව ස්පර්ශ කිරීමට ලද අවස්ථා, අත්දැකීම් පරිහරණයට ගනිමිනි. ඒ අනුව රටට වෙච්ච දේද, අපට වෙච්ච දේද ගැන මැදහත්ව හිතන්නට හා වෙච්ච දේ අනාගතයට නොවන්නට විය යුතු දේ විමසන්නට ඔහු පාඨකයාට සපයන්නේද අතිශය ස්වාභාවික හා අව්‍යාජ උත්තේජනයකි.
නිදහස් විද්වත් අදහස් නොඉවසන පාලන තන්ත්‍රයක් මගින් නිවැරුදිකරුවන් වැරැදිකරුවන් බවටද, පණ ඇත්තන් පණ නැත්තන් බවටද පත්වන ආකාරය ජීවිතය බෝනස් වූ 89 ලිපියෙන් ඔහු පැහැදිලි කරන්නේ පෞද්ගලික අත්දැකීම් උපයෝගී කොට ගනිමිනි.
ගෝර්කිගේ අම්මා සහ අපේ අම්මා ලෙස වන දිගහැරැම තුළ සැසඳුමට ලක්වන අපේ අම්මාගෙන් නිරෑපණය වන්නේ මෙරට අම්මාවරැන්ගේ සැබෑ කතාවය.
අහවර නොව, තහවුරු කළ යුතු ගුරු සිසු සබඳතාව, අම්මලා නොලියන අම්මලාගේ විභාගය, අධ්‍යාපනය නට්ටම් වීම සහ සමරැ ඵලක කුඩු පට්ටම් වීම ලිපි තුළින් අවධාරණය වන්නේ සමාජයානුබද්ධ අධ්‍යාපන ක්‍රමයක වටිනාකමය.
වර්තමානයේ මෙරට උසස් අධ්‍යාපනයේ බරපතළ අර්බුදයකට මාතෘකා වූ පෞද්ගලික වෛද්‍ය විද්‍යාල සම්බන්ධයෙන් වෛද්‍ය ශාන්ත ලිපි කිහිපයකින්ම අදහස් දක්වන්නේ තිස් අට වසරකට ඉහත පැන නැඟුණු ප්‍රථම පෞද්ගලික වෛද්‍ය විද්‍යාල සටනේ පුරෝගාමියකු ලෙස ලද අත්දැකීම් ඇසුරිනි.
වෛද්‍ය ශාන්ත මෙරට යෞවනයේ, තාරුණ්‍යයේ පසුවන පිරිස සමඟ සමීප සන්නිවේදන ගනුදෙනුවක යෙදෙන්නේ දශක කිහිපයක සිටය. 2015 වෙනසට පෙර, විශ්වවිද්‍යාල නවක සිසු සිදුවියන් වෙනුවෙන් ක්‍රියාත්මක වූ නායකත්ව පුහුණු වැඩසටහනේ සම්පත්දායකයකු ලෙස කටයුතු කිරීමේදී ද, විශ්වාසවන්තව ඔහු හා එක් වූ තරුණ තරුණියන් බොහෝය. එහෙයින්ම මේ පරම්පරාවේ අතිශය පෞද්ගලික ගැටලු ඔහු වෙත යොමුවන්නේ නිරන්තරයෙනි. ශික්ෂාවක් නැති රටක නොපවතින ළමාරක්ෂාව ගැනද, සියතින් වැනසෙන ජීවිත ගැනද, වැලේ ගෙඩි වැලට බරවීම ගැනද මෙම කෘතියෙහි විවෘත විමසුමකට ලක්වන්නේද බොහෝ වැඩිහිටියන් ද නොදන්නා එහෙත් කතුවරයාට ඍජුවම ග්‍රහණය කොට ගත හැකිවූ බරපතළ ගැටලු අනුසාරයෙනි.
කෘතිය තුළ විවෘත විමසුමකට ලක්වන්නේ රටේ, සමාජයේ වර්තමාන කතාවය. එහෙත් ඒ කතාව තුළ වෛද්‍ය ශාන්ත සිය චරිතාපදානය ද මැනවින් ගලපා ඇති බවද පැහැදිලිය. දශක පහක හයක සමාජ පරිවර්තන පිළිබඳ කතාවද කෘතිය හරහා පාඨකයාට අසන්නට, දකින්නට ලැබී ඇත්තේ එහෙයිනි. පෞද්ගලිකව ලැබිය හැකි ප්‍රතිලාභ හෝ අලාභ ගැන නොතකා ලේඛන හා සන්නිවේදන ක්ෂෙත්‍රයේ දශක හතරකට වැඩි කාලයක වෛද්‍ය ශාන්ත සිදුකරමින් සිටින සංවාදයේ තවත් සුවිශේෂී සන්ධිස්ථානයක් වෙනස සොයා දෙඇස අයා කෘතිය මගින් සටහන්ව ඇති බව පැහැදිලිය.
මෙම කෘතිය ෆාස්ට් පබ්ලිෂිං ප්‍රකාශනයකි.
මහාචාර්ය සුදන්ත ලියනගේ
පීඨාධිපති - ව්‍යවහාරික විද්‍යා පීඨය
ශ්‍රී ජයවර්ධනපුර විද්‍යාලය
